تعـــاليل .. تبي الفزعه .. بســــــاع

[تعاليل]

[align=center]الســـــــــلام عليكم ورحمـة الله وبركاتوه ..
صبـــــــــــحكم بالخير ..

الصراحه اختكم تــــــــــــعاليل << اللي هي انا
ابي فزعتكم ..
من زمان سمعت قصيـــــــده للشـــــاعر فـــــــــهيد المجماج .. << هقوتي اني قلت الأسم صح
بهاك الوقت حيل جازت لي .. ومن يومه وانا ادور على هالقصيده ولا لقيته

عاد ابي فزعتكم خواني ..
انا حافظه بيت شعر من هالقصيده <<<<<< أكثر بيت جايزن لي

اللي يقول بوه الشاعر ..

..... حبــــه يـــخج القـــلب ما يوجع أوجاع ...
..... لا شك قلبي مـــودعه بيت نمـــله ...

أتمنى من الاخوان أنهم يساعدوني
وأحصل القصيده ...





وأيه على فطنه .. تراني والله مدري كان حطيت هالمشاركه بالمكان الصحيح
أعذروني ساعه افكر وين احطه وين أحطه . آخر شين قررت اني احطه هنا
وخوذ و راحتكم لو تبون تغيرون مكانه ..


وعساكم على القوه ..
وانتظر الرد ..


أختكم .. تـــــــــــــــعاليل [/align]

[راعي الوقيد]

[align=center]ياحي الله الضيفــــة اللـــي تنشّــد

نعم اختي هذا متسان موضوعتس لا زاغ ولا راغ

وعلى فكرة تري اخونا ابو خليف واقف بباب المضايف يهلّي ويـرحب

بالضيـوف الجدد

وياليت اختي تعاليل تاخذ له فنجال عند الترحيب وتعرف بنفسه

لأخوانه إن تسان هي راعية طويلة ماهي بس ويدزة وماشية

هذا جواب لسؤالتس

الشاعــر الكبيــر فهيد بن عبدالله المجماج من المزاريع من تميم وهو

من سكان بلدة الأثلة في عالية نجد عاش بين الفترة من 1275إلى

1322هـ رحمه الله تعالى ..

من روائع شعره هذه القصيدة:

[poem=font="Simplified Arabic,5,white,normal,normal" bkcolor="black" bkimage="" border="groove,4,gray" type=1 line=0 align=center use=ex num="0,black"]


لا والله إلا شـدوا البـدو نـجـاع=كـلٍ هـدم مبنـاه وارتـد زمـلـه
شد الشديد وقربـوا كـل مطـواع=وراع المودة فـّرق البيـن شملـه
شدوا ودنوا الحنـي كـل مطـواع=كل أشقح ما أحلى قرينـه ورملـه
غدا لهـم فـوق الرفيعة(1)تمـزاع=واللي بغى يضرب طريق قسم لـه
وا بكرتاه اللي غدت بيـن الأقطـاع=مع زوعة العربـان ماينجهـم لـه
مدري مع اللي يم دخنـه بالاسمـاع=وإلا مـع اللـي سنـدوا مستهملـة
لا هيب لا حاشي ولا هيب مرجاع=عفرا فتاة وراعيـة مـا وسـم لـه
راعي هدب عينٍٍ مظاليـل ووسـاع=سـود عيونـة والمحاجيـر جملـه
وراعي مجاديلٍ مشطهن يجي بـاع=أشقر على هـاك الردايـف يعملـه
ياغصن مـوز ناعـم لـه تمريـاع=ومنين ماهـب الهـوا مـال حملـه
عليـه ماوقفـت عيونـي بالأدمـاع=وهجسٍ يلاحقني على الطول سمله
أعوي عوا ذيب ورا النزل لاجـاع=يقنب إليـن الله يجيـب اللحـم لـه
يامل قلب من هـوى زيـد ينصـاع=كما يصوع الصيـد رام خطـم لـه
حبه يخج القلب ما يوجـع أوجـاع=لاشك قلبـي مودعـه بيـت نملـه
[/poem]

(1)الرفيعة بئر زراعية للمجماج اشتراها جد الشاعر عام 1212هـ

عندما قدم للأثلة ...

عـز الله إنه خووووووووووش قصيــدة جزلة المعاني ...

تحيــتــــــــــي لك

والسلام ...
..[/align]

[تعاليل]

[align=center]بسم الله الرحمن الرحيم

أخوي :: راعــــــــــي الوقــــيد::

عز الله إن اللي حطك مشرف .. ماغلط .. مالي مكانك ياحيي

ومشكور على الرد .. وفيت وكفيت .. وعساك على القوه ..



وبخصوص مسياري على ابو خليف ... هذا شين لابد منوه
بس من كثر ماكنت مستعجله على القصيده .. ما أمداني اعرف
بنفسي .. اسمح لي .. ويسمح لي اخوي ابو خليف ..
هذا أنا بتمشى لين مضيف التعارف .. اتقهوى واتعرف ..
.. وعلى فكره تراها مهي بس "ويـــدزه " لاعز الله .. إلا النيه
إني ابي اصير من راعيين المكان .. تسان تسمحون ..



أرجع مره ثانيه واقول .. عساك على القوه

أختك .. تعاليل[/align]

[مشــــعل]

[align=center]حياك الله ياتعاليل

وتسلم يامشرفنا

وعزالله انه خوش قصيده
اول مره اسمعه[/align]

[هايس الشمري]

[align=center]حياك الله يا تعاليل


و اذكر اني سمعت هالبيت اللي تقولينه مرة بسالفة من سوالف الراوي


و قمت اردده يما ملوا خوياي يقولون ياخوي تراك ازعجتنا


و دمتم بخير

الذيب[/align]

[تعاليل]

[align=center]أخوي :: مشـــــــعل ::
الله يحييك ويبقيك .. مشكور على الترحيب
وعزالله مثل ماقلت .. خوش قصيده
ومعناها حيل حلو ..



أخوي :: الــذيب ::
انا قريت هالقصيده .. من فتره طويلة
وحبــيتها .. بس الصحيح عاد ينقال أنوه ما جازت لي حيل
إلا لما سمعتها بإلقاء الراوي "محمد الشرهان "
صراحه ماشاء الله عليه يعرف يبهر ويزين بالسالفه ويا قال القصيده
مير متمكن من كلماتها ..
أنا مثلك من سمعت آخر بيت وأنا بس أرددوه لين أهلين قامو
يرددونها معاي ...

تسلم على مرورك


تعــــــــــــــــــاليل[/align]