السلام عليكم ورحمة الله وبركاته
لاشك ان للفارس والشيخ ضاري بن برغش الطواله شيخ الاسلم من شمر قدر كبير عند شمر خصوص وباقي القبائل عموم لمكانته التي لاتخفى على احد ومواقفه مع قبيلته خير شاهد على كلامي وكثر به المديح من شمر وغير شمر ومن ضمن الذين مدحوه الشاعره وضحى العريفيه من العمود من شمر تقول وضحى :
ياراكب ٍ حمراء ذلول ٍ معنّاه ....... .......تلفي لدار مدلهين القريبه
راكبه يم اخو صلفه تنصّاه ...................يضحك بوجه منوخين النجيبه
وبشوش يضحك للمسيّر الى جاه........ويحط من فوق المناسف عصيبه
وله رفة ٍ تلقى بها كل مشهاه..........ودلال تعبى مع نفوس ٍ حبيبه
وصحون شتل ٍ للنشامى مسّواه.........وأذناب حيل ٍ مايراجع حليبه
وبيته لهتاش الخلا دوم تنصّاه.............يوم الدهر والزاد مثل اللهيبه
شيخ النماري يبين اليا حل طرياه.......لو كان عنا بالديار الغريبه
عشير من ذوب العسل من شفاياه......تنقض على الامتان شقرا الذويبه
وحرز الذليل اليا هفى بالملاقاه.........في ساعة ٍ فيها المنايا قريبه
ومصواط عج الخيل يوم الردي ضاه.........إليا حرّفو صم الرمك بالكسيبه
وإليا درع بالخيل كثرت رزاياه.................وتشبع به سباع ٍ تعاوى طنيبه
والخيل مع حيل النضا من عطاياه........وحمول كيل ٍ للضعافي يجيبه
ودفاف من سوق الغلا طال مشراه........ونقوشهن من فوق المناكب عجيبه
ومن عرض مايعطي بيوت ٍ مبنّاه.........وموازر ٍ مايشرب الماء صويبه
خيّال شقح ٍ كالبرد لون حلياه............ماهن ورث جدود هود ٍ لهيبه
شقح ٍ حماهن بالسيوف المحنّاه ..........وصمع ٍ خشوم اهل المعادي عطيبه
ينزلهن قفر ٍ نبت في شغاياه ............وحلو نبته في خطاة السهيبه
رمع الثريّا بأول الوسم سقّاه.............رخم ٍ يعقرب سيلهن مع شعيبه
النوم عنّه بالخطر ماتغالاه..................إليا صاح صيّاح براس الجذيبه
ويجلب لهن من فوق شقرا معفّاه...........وتتليه (....) من مهار ٍ عريبه
يا(...) لو هو منتويكم بعدواه.............رحتو كما فرز ٍ درع فيه ذيبه
الشيخ اخو صلفه زبون المجنّاه..........وتلقى الجموع الخايفه تتقي به
ضاري عسى شر المنايا تعدّاه .........عز الرفاقه ياسطام الحريبه
وجعل العفون المهزله من فداياه.........ويفداه من قربه يغث لنسيبه
إليا غاب عذله قال لاواحلولاه.........وا جرح سدّي وين عذلي غديبه
والله ماقلته تحرّي ومرجاه.............تعجب فعولك يابو فارس تعيبه
والحقيقه اسره الطواله من الحمايل اللي نعتز بعلومه من دور نعيس وعدوان وبرغش وسالم وضاري البرغش وفارس وضاري المحمد و...و...الخ والقائمه طويله وحبيّت اهدي هالاسره الكريمه بعض الابيات وهي للشاعر خضير الربوض في مرثيه طويله بالشيخ سالم الطواله (بعض الابيات لان القصيده طويله) يقول خضير :
طوالات والله من خيار البوادي...........اهل النقى وابطال بالعمر زهّاد
وان نادى لأهل الخيل حس المنادي..........صوّت لاهل العادات بالكون وطراد
وتلاوحو من فوق حرد الايادي............ولحقو هلا الهدلا على الموت وراد
وبأيمانهم يشرق لميع الهنادي...........ويرونهن بالكون من دم الاضداد
ويرونهن بالكون يوم الطرادي...........الما تحنّى بالحمر بيض الاحداد
شلف ٍ يقصّن الظلوع الفنادي..........ومركاضهم للذيب والطير ميعاد
ومركاضهم يلقى شجاع ٍ ولادي.........فوق الوطى مجدوع مخفي بالالحاد
وان صار من بين القبايل حدادي...........وسمية ٍ بأرض الخطر جاه رواد
يرعونها لو كان بأرض المعادي...........ويتلونهم من ربعهم مثل عياد
طوالات والله لو اعتزو بالوكادي.........عز الصديق الى اعتزو بجد الاجداد
وحريبهم مايهتني بالرقادي .............يخافهم صباح ٍ او زاد مهجاد
من فوق عيرات ٍ وقب ٍ تقادي ...........ولهن على العدوان هذبه وملكاد
وبأيمانهم ياما قدو كل غادي..........الحي واللي عدّهم ابن زيّاد(1)
اهل النقاء واهل الشرف والسدادي......واهل الوفاء ياواعد ٍ كل الاوعاد
المقصود بابن زيّاد هو الشيخ صاهود بن زيّاد الطواله وقصيدته المعروفه بكل الطواله رحمهم الله تعالى جميعا وجميع موتى المسلمين ولهم الرحمه ولكم طولة العمر (وسلامتكم)
رد مع اقتباس
المفضلات