[align=center]السلام عليكم
........................
بالخير ياعيال ..كلن باسموه
عندي حدا خواتي يقال له ( أم صالح ) .. وهي أكبر مني بسنه وحده
وبيني وبينها مساجلات مرحه وفكاهيه
وكل ماسيرت عليهم ( وصوووول للرحم )
كل ماسيرت عليهم .. تتولجن
إنت شايب ،، ونت صوابرك بيض وراسك أبيض
وقصدت بي قصيدة تعيرن بالشيب
ماسمعت بقصيدة بتهوفن اللي يقول بمطلعه :
عيرتني بالشيب وهو وقار .. ياليتها عيرت بما هو عار
قلت يابنت الحلال .. عيني خير
لاتنسين إنتس أكبر مني ..
قالت : بس أنا راسي أسود
قلت .. الله يخلي هالأصباغ ( أصفر وأحمر وفسفوري )
قالت .. والله إني ما أصبغ
قلت : وجهتس على الشيب ..جايتس جايتس
قالت : عسى اللي جاك مايجيني
( عاد هي قبل شهر دزت لي قصيده تشتكي من الشيب )
قلت .. المهم لاتستفزيني ،، تراني ماني قليل شر
قالت : افسر عن ذراعك
قلت : أنا اخوالعيال ( كنايه عن ثورة الغضب )
قالت : أنا أخت الأصيل أبوثوب
قلت : عليتس مردود النقا
قالت : عليك مثلوه
قلت : تراني أعرف من وين تؤكل الكتف
قالت .. ونا أعرف من وين توكل الضلوع
قلت : ماعنه ؟؟
قالت : ماعنه
قلت : تعوذي من ابليس .. ترا أهلتس مهم أهل شر
قالت : جاك العلم
عاد هي متزوجه من عشرين سنه من ابن عمن لي .. وشاعر من العيار الثقيل
قلت .. افرشي شليلتس ( كنايه عن بداية المعركة )
وهي لك تهيض قريحتي
قلت : يالقريحه .. اهجدي
قالت أبد .. ترن هضت
قلت .. مهو الحين .. عقب الغدا
قالت : لله ...
عاد تعرفون لاهاضت قريحة أبو ثوب ... يصير .. تسونامي الأصيل
ولايخفاكم ماجرى إذا زعل أبوثوب
والشاهد سالفة ( الانتقام ) اللي بالفله ... فليرجع لها ...[/align]
[poem=font="Simplified Arabic,5,white,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
سار القلم والخط واضح ومـسطـــور=مضــبوط بالميــــزان ذره بــذره
متوجهن للــي بـــه القلـــب مفــطور=اللي طريق الشــيب قــرب يمره
يالمبدعــه بالشـعـر قيفــان وشطـور=موالهـــا ( مــن حــر مابـــه ) تجره
ماجــاتس حــق وللمـخاليــق مــمـرور=ونا أدري انه مايجيب المــسـره
ماعابني ون لاح في عــارضــي نور= مادام عرضي ماذكــر به مضره
تسطع كــما حــب البــرد تــو منثـور=أو لمعة الأصداف في وسط دره
يابنت : لو شيــبت مانــي بمخطـور=ولا خفت من جــره تبــدل بجره
لكن أخاف أن أبــوصالح على الفور=لاشاف شيبتس جاب بالبيت ضره
بنت(ن) على تســعة عشر تشبه الحور=الله على تبديل حــلــوه بــمــره
لاياعــجــوز الشــر ماظـل لـتس دور=أقفى الربيع وجاتس صيفتس وحره
لامن طريت العـرس كـنتس بـتـنــور=حره على قلب العواجيــز حره
الشرع شرع الله ولا فـيـه محـذور=والكـــره الأولــى تعيــده بكـره
دارن بدل دارن ودورن بــدل دور=وحرمه على حرمه وغره بغره
لايابو صالح هاك من راسي الشور=لــــله در العـــــــرس للــه دره
عشرين عام تزيد أو تنقص شهور=لـــو إنـــها كالأم .. أوفــيت بِـره
جدد شبابك عيش بافراح وسرور=واللي مضى أقفى بخيره وشره[/poem]
[align=center]وسلامتكم وسلامة الحاضرين والمشاهدين والمستمعين
****************************
استراحه
***********************
ياشينين وشنوحكم
يادخلت المضايف
أقرا الاهداءات ( البليه اللي يقلب لحالوه )
فلان يهدي لفلان
وفلان يهدي ويسلم على فلان
وأبي أشوف اسمي
الحين يطلع .. شوين يطلع ...
يمار .. ماش
عاد .. الله عطاكم 32 ساعه
يا إن ماشفت اسمي
وربي ... لاعلم عليكم خالي أبو غازي
وتعرفون شغل المخاطر
قظى الموضوع[/align]
رد مع اقتباس
وانتم لاشبتوا تمدحون انفسكم بعد 
المفضلات