[align=center]السلام عليكم
عشت طفوله عادية مثل أي طفل في ربوع جريبستان العظمى لعب ومسابقات ورحلات للشواطئ وسفر للخارج خلال العطل والأعياد ومتابعة مستجدات الموضه<<أحلام وخيالات صلفيقية
الا طفولة عدوك لو درى عنها كوفي عنان وشلته تسان تقطعت قلوبهم علينا وسووا بنا مثل ما سووا باطفال العراق وافغانستان الي ما هناهم النوم لين زينوا أوضاعهم ولو انهم لضرورة تحريرهم من الظلم اظطروا:wink: انهم يهدمون بيوتهم ويذبحون أهلهم بس كله يهون من شان تحرير الطفولة البريئة من الظلم والدكتاتورية والظلامية<<نسيت نفسي أحسب اني بالعام
نرجع لطفولتنا وايام جريبستان سقاه السيل
أول النهار دراسة ما تخلا من مخامش وجيه ومماسك شوش وفلاق بين يوم والثاني ، ومن نجي حذفنا الشنط ولعب ومطارد وتصيد عصافير حول قلمة الماء لين تغيب شمسنا همن انهمدنا لين نصبح وهلون على هالحالة "ما ذكرت أوقات العيشة لأنا متعودين ناخذ سفري"
أهلنا مالهم بنا شغل ولا يبون خششنا الا تسان من حاجة نسويه او نعزم احد
، بعد ما كبرنا شوي بدت المتاعب ومغثة الغنم الي يسرح ولي يساعده ولي يحط العلف ويوَّرد وصار عزل وترضيع طليان وتسثرت الشطه واللطه "الجميع بنات وعيال يعني تسدح وبطاله مافيششششش"
محاتسيكم كان ترتيبه الثاني بعد أخوه ومثله الأعلى "حمود" وكنت اساعده بالسراحه واستقبله العصر اودي له ماء وخبيزه والي يقسم الله من طماطه او خياره ويمكن يحصل احيان قطعة جحة تاصله ماكولن أكثره واقعد العب معه لين نروِّح مع الغروب..
اخوي كانت مندبله تسبده من الغنم ومتضايق لأنه ما يحصل له لعب كوره العصر وتقل اعداني بكره الغنم بس عاد الشكوى لله ما غير نتشكوى لبعض ما نقدر حتى نبين انا متضايقين عند ابوي يدودحنا ولا انتم وجيه نعمه ومن هالحتسي
جانا الفرج
الله سبحانه ما يخلي ورحمته واسعة رحمنا الله بسنياتٍ عجاف تعاضد على أهل الحليّل دهور"مهي شاعرتنا المحترمه"+غلا شعير وهم يبيعون حليّلهم بتسلبٍ سرق هله وحنا نفتك من الغثا وناخذ حريتنا ونرجع للعب والمذرحه وكل عصر كوره ليما غدت رجلين الواحد تقل عكرة ضب من ملاتسم الرضم وضفور الرجلين تشلعت ما بقي منه ضفر يمكن تسميه ضفر وهذي من العلامات الفارقة لأهل جريبستان، فمستحيل تلقى جريبستاني اصلي وصل مرحلة البلوغ واضافر رجليه ما طاح نصفهن ، وان شفت احد ضفور رجليه سليمة فلا تصدق انه من جريبستان ولو حلف لك بصلاة امه وابوه
مثل ما قلت لكم قبل شوي بأن حمود كان مثلي الأعلى بكل شي وكنت معجب وأقلد تصرفاته مار لوهي ناكسه للمرح ، حمود من تالي قل اهتمامه بالكوره وقام يتمسمس ويتزين ولا هو حمود الأول ، المهم قمت أتحوفه وأنشده وهو مار يعلمن بأنه عاشدز الماخوذ ، وكل يوم يمار هو جايبٍ لي سالفه ، انا كبرت بنفسي السالفه وأقوم أفكر وشلون أسوي مثل حمود ومنهي الي أهله داعين عليه وتقبل تبتسم بكنهرتي
جانا الشهر الكريم "رمضان" وتسثر الطلب على الشربات ولبن المشيقح وبما ان الثلاجه هكا الفترة كنا ما نعرفه الا بالدكاكين فاللبن والثلج نجيبه قبل الفطور بشوي.
كان حمود يزين القهوة وأنا يرسلن ابوي قبل الفطور بشوي أجيب اللبن وكان بطريقي للدكان فريّدزٍ لنا عندهم شويهات يعلفونهن عندهم لهم بنت يقال له سميرة"مسمينه على سميرة بنت توفيق" وسبحان الي خلق وفرق ما خذت من سميته الا الأسم ولا هو لايدز عز الله بس عاد المشكى لله ، لكن ها تروه تساسيته القبله والملح منثر عليه ، مريت بجنبهم يمار هي تهزع بين الشياه تقل مرياع وهو يطري علي العشق على طول وابتسم له يمار هي من أمس فاتحةٍ حلقه ، وأنا أغدي لك سما وما:480r:
قلت بنفسي لا والله الا عشقت يا صلفيدز
وأروح وأجيب اللبين وأنا ما غير أهوجس به وأردد[/align]
[poem=font="Simplified Arabic,5,orangered,normal,normal" bkcolor="transparent" bkimage="backgrounds/11.gif" border="none,4,gray" type=0 line=0 align=center use=ex num="0,black"]
كل الحلا فيك والقبلة=سمّور يا بعد جداني
وش عاد عنتر ووش عبلة=انتي وانا حبنا ثاني[/poem]
[align=center]وصلت البيت يمار ابي اطير من الوناسه وما غير ابوسم ، وانا أفكر وش الخطوة الثانية وهو يطري علي شريطٍ لأخوي "حجاب أو خلف" داسه مع كتبه ويظهره ليا بغى يروح على ددسن أبوي يشغله ، قلت مالي الا الشريط أهديه لسمورتي وأنا أروح وأسرقه ويوم جا بكرى وأرسلن أبوي للبن وآخذ الشريط معي وأمر من عنده وأهدّي وأسلم وهي ترد علي وأنا أجسر وأمد له الشريط الا وهي تمد يده وتاخذه ، وأفوت للدكان وأشري اللبن وأجيك أتسحب
"الماخوذه أثريها يوم عطيته الشريط راحت ركض لأبوه وهي تعطيه الشريط قالت ابيك تشغله أبي أسمع هالشريط الي عطانيه صلفيق قاله زين زين عفيه يصلفيدز وهو ينوي لي النية الشينه"
جيت أتسحب على فالي ولا عندي من الشيطان قطعه وأمشي شوي شوي أبي أشوفه وإغديني أحتسي معه يوم صرت بجنبه وأنا أمشي وتسني واقف الا يوم فاع بي هكالبلايات"اثره ابوه ملبدٍ لي الأقشر خدعن المفروض يعلمن مهو يباغتن كذا"
من أمس الا هو تاصن من رقبتي وعينك ما تشوف الا النور لايتن يدي على رقبتي ويشتم ويطري لي البوق والدديسن طفت أظنه من الخرعة بعد وسمور أم نخرور "بدا الحقد" تراعي وتبوسم من ورى أبوه وأنا أنغبن زود
عقب ما برّد تسبده وغسل شراعي قال سلم لي على ابو حمود وهي لك تطيح مصراني قلت أيييييه نوي يعلم ابوي ما كفاه سواته بي سبيع الأبو
رجعت البيت يمار غير عن أمس ما عادني بخير مغسول شراعي ومتفشل وخربانن عشقي وفوق هذا مادري بأي ساعة يدري أبوي بالسالفة همن عاد تحصل أم الكوارث:untitled:
من بكرى صديت عن أبوي قلت إغديه يرسل حمود الا يوم صوت لي صلفيدز وعمى وين تسافت عند الحريِِّّم رح بساع جب لنا لبن وثلج وأنا لك أروح وأتجنب الدريب الي يمر حولهم بالمرة
كل ما يمر يوم وسملت السالفة تسني أتطمن شوي انه مهو معلمٍ أبوي وان تسليمته نوع من التخويف بس ، لكن بلشت بحمود وشريطه كل يوم ينشدن عنه وتسنه شاكن بي الماخوذ وأنا مالي وجه أعلم بالسالفة الا يوم أوذاني بالنشده قلت ياخي رح انشد بالدتسه عند شنقل حنا هالحين بالفلة
المهم يوم شفته مهو فاكن وأنا لك أفل شريطي وأعلمه بالسالفة من طق طق الى سلام عليكم:[/align]
[poem=font="Simplified Arabic,5,white,normal,normal" bkcolor="transparent" bkimage="backgrounds/10.gif" border="none,4,gray" type=0 line=0 align=center use=ex num="0,black"]
يا حمود وا شريِّطك ضاعي=ما بين مقبل ومضنونه
اهديته لشين الأطباعي=الي مراديفٍ سنونه
سلمته إياه باصباعي=وظني على السد مامونه
وراحت تقل زول مرياعي=لأبوه تسمّعه للحونه
وصد، ونوى غسلة شراعي=غسلٍ مهو غسل صابونه
وانا مغرٍ وملتاعي=ونفسي بسمّور مفتونه
ومريته أجرجر كراعي=مدفوع بلي يسمونه
عشقٍ غطست ابه لأكواعي=ولا ادري عن الغيب وشجونه
الا البلايات بي فاعي=والشر تقادح به عيونه
لوى على عنقي ذراعي=ويطري لي البوق والخونه
وسمّور من خلفه تراعي=وتضحك وانا التسبد مغبونه
وأقفيت أشكي من أوجاعي=ونفسي بعد عز مهيونه
خذيت انا وافي الصاعي=درسٍ عن العشق وفنونه
يا ليت ما صار ما ذاعي=الله ولا حب مجنونه
يا ناس ما للهوى داعي=نصيحةٍ كان تشرونه[/poem]
اهب ياصلفيدز أثريك شواعر مانت هين 
المفضلات