ادعوا لنا .. وان كان عندكم علاج لأخوي خبرونا

[اخو ريا]

[align=center]السلام عليكم ورحمة الله وبركاته

اولا عذرا لاني من فترة طويلة ما كتبت ...

ثانيا المشكلة ...

يا اخوان والله ما اعرف وش اقول لكم لكن انا احس بتعب وضيقة نفس بسبب مرض اخوي الصغير ( الله يشفيه ) وكل ما نوديه لمستشفى سواء بالسعودية ولا بريطانيا ما نلاقي علاج ..
مرض اخوي هو تقريبا مرض نفسى والله اعلم فهو الى الان مع ان عمره 12 سنة الا انه لا ينطق الكلام زين و تفكيره 24 ساعة بالسوني بلاي ستيشن والالعاب ... وبدأت حالته تسوء لما كان في الصف السادس فهو ترك المدرسة بحجة ان هناك طلاب يضربونه .. رحت انا معاه وفعلا وجدت ان بعضهم قد ضربه .. مسكتهم و ادبتهم .. لكن ما زال اخوي حالته تسوء حتى ان كثير من الاطباء قالوا ان المشكلة لاتكمن في الضرب فهناك مشكلة اخرى اهم ...
ومن دكتور الى دكتور ومن شيخ الى شيخ ... تحسن حالته شويتين ولله الحمد لكن ما زال يعاني خصوصا من فهم الناس المتخلف للحالة النفسية فهو عندما يعامل بطريقة زينه تلاقيه يتحسن ويكون مطيع .. اما اذا استعملت معاه العنيف فهو يصير عنيف ...
والاسوأ من هذا انه انقطع عن عيال عمه الصغار وما صار يخالطهم الا نادرا ... حتى انهم يتهربون منه ... لكن هو ماشاء الله عنده عزة نفس غير طبيعية ومن اول ماشافهم كذا ما صار يروح لهم ابدا ومع انهم لو استحملوه شوي كانت تحسن كثير وصارت علاقتهم مفيدة له نفسيا ...
واحيانا يظطر بسبب الطفش والجلوس 24 ساعة امام قناة ديزني والافلام كرتون والبلاي ستيشن ان يشتري اعزكم الله حيوان .. مثل الارنب ..و يلعب معاه ...
وبالنسبة للايمان بالله فالواضح من افكاره انه لايؤمن الا بما تخبره الافلام الكرتون ... حتى انه ماشاء الله يتكلم انجليزي بطلاقة .. لكن العربي مكسر ...
وللاسف احيانا نتعب من المستشفيات النصابة اللي تعطيه ابر ماهي مفيدة وتضحك علينا عشان تبي فلوس وماهم فيك حتى اني يا جماعة الخير اذا اخذته مستشفى اقول له اسمعوا : اذا تبون فلوس بنعطيكم ما هي مشكلة بس اهم شي اخوي تعالجونه زين ... ولاكأنهم يسمعون ...
وانا اليوم تأثرت كثيرا بسبب الم اخي لانه كان يلعب بعطر وانسكر وطاح فوق الجزاز وصار عنده جروح كبيرة في رجليه .. وفي المستشفى قطع قلبي بالابر اللي يعطونه بالخطأ ويطلعونها وبالخياطه للجرح بشكل مؤلم .. هذا قدر واحنا مؤمنين وان شاء الله يشفى قريب ..
دعواتكم يا اخوان ودعوات الامهات لمن تستطيع فهي ان شاء الله مستجابة .. واذا احد عنده فكرة عن علاج مقترح فيخبرنا الله لا يهينكم ...








ماجد الشمري [/align]

[المطنوخ]

[align=center]أخوي ماجد

عسى الله يشفي مريضكم

ويعجل له بالشفاء العاجل ويقر عينكم بشوفته راجع لحالته الطبيعيه

لكن اقول وانا وترى لاني خبره ولا شي ولكن على حسب ما قرأت

ان العله مو علة نفس يعني مو شي يستحق توديه للمشايخ

على حسب كلامك ان اخوك متوفر له كل شي من العاب

ولكن هل جلوسكم معاه واغراقه بالعطف والحنان والكلام معه بالقدر الكافي؟؟؟

ترى والله التلفزيون هو سبب البلاوي

وانا اخوك ترى الطفل ما ينخلى قدام التلفزيون الا مع ارشاد عائلي علشان يتبين السلوك الصح من الخطأ

حتى الاجانب يقعدون مع اطفالهم اذا بغوا يتابعون التلفزيون لانهم يدرون انه يزرع مفاهيم غلط بالطفل

والطفل بأول سنوات عمره اي شي يشوفه راح ينطبع بقلبه

فا وانا اخوك اعتقد انه الافضل لو تقلل من الاوقات لمشاهدة التلفزيون وبالمقابل تزيد الوقت في جلوسكم معاه والكلام معاه بالاضافه الى اخذه معاك لمخالطه الناس

والله اعلم

تقبل فائق تحيتي[/align]

[ابو غازي]

[align=center]

[align=center]أخوي ماجد

عسى الله يشفي مريضكم

ويعجل له بالشفاء العاجل ويقر عينكم بشوفته راجع لحالته الطبيعيه

[/align]

أمين [/align]

[اجوديه]

عسى الله يشفيه وماااقدااامه انشاللله الا العااافيه بس ياااريت توفرون له شوي من وقتكم تتكلمون معه وتتحسسونه انه انسااان مهم وفاااعل في نفس الوقت جرب هاااذي الطريقه ماااراااح تخسر شيء

[ابو خليف]

[align=center]الله يشفيه

ويشفي جميع مرضى المسلمين

انه سميع مجيب[/align]

[بدرالدجى]

الله يشفيه ويخليه لكم يمكن مشكلت النطق هي الي تخليه مايحب يختلط في احد حاول توديه اخصائي تخاطب وتعالج هالمشكله

[عبدالله المهيني]

[align=center]أخي العزيز

اخو ريا


أعتقد لو راسلت الأخ ياسر الفهد

هو بيفيدك أكثر

وهو يدخل بشكل سريع هنا

فياليت لو ترسله رساله على الخاصة او على بريده

لانه ولا أنا متأكد أنه إحتمالية أنه يكون أخوك طفل توحدي


طبعاً الاخ ياسر

راح يفيدك أكثر مني


لان مجاله بإضطراب التوحد

وأنا مع ذوي الاعاقة السمعية


أتمنى له الشفاء العاجل[/align]

[اخو ريا]

مشكورين لمرورك وماقصرتوا ..
انا براسل الاخ ياسر الفهد .. وان شاء الله خير ...






اخوكم ماجد الشمري

[مجد]

[align=center]اخو ريا

اولا .. الله يشفى اخوك .. ويعجل في شفاءك باذن الواحد الاحد

ولكن من خلال وصفك لحاله اخيك ..أتوقع أنه طفل توحيدي
مثل ما قاله الاخ المهيني ..



اختك المجد[/align]