[poem=font="Simplified Arabic,6,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
اشواقي اللي طوّعتنـــــــي بكيفــــــه = فكري وسط ذيك المواقف عماوي
ياكم حلفت انسى الحبيبه واعيفــــــه = واقول والله مانخطّ الخــــــــطاوي
انقض حلوفي بالعـــــنا والكليفـــــــه = كفّارة ايماني غدت لـــــي مخاوي
العشق سيّافٍ ضربنــــي بسيفــــــه = ضربة شجـــــاعٍ مايهاب العزاوي
قلبي بقربــــــــه مايوقّف رجيفــــــه = كنّه على جنحان طـــــــــيرٍ نداوي
يوم افقده صارت دموعــــــي ذريفه = وش حيلة اللي في حياته شقاوي
شاورت قلبـــي لوتركت الولــــــيفه = قطّع كلامي بالهزب والفـــــــتاوي
فتوى تشدّ القلب ماهــــي خفيفــــــه = واخرى تسبّ اللي على البعد ناوي
المشكله صارت حياتـــي محيفـــــه = مابين هرج الناس وســط القهاوي
وعذّال سوٍّ ماتعــــرف النصيفـــــــه = ابكل دربٍ له علـــوم ودعـــــــاوي
وانا غديت بوسطهم شبـــه جيفـــــه = كلٍّ يبي دفنـــــي ولاهــــــو بقاوي
وش حيلة اللي بالمرض زاد حيفه = طبيبه اللــــي زاد فيه المكـــــاوي
حبيبتي شوفــي بعين الكســــــــيفه = روفي وشوفي قلب ذاك الـهواوي
كنك سلوبٍ تعتلــــي من رفيفـــــــه = مطرها مرهاشٍ ولاهو متســــاوي
هلّت بوبله ثمِّ عــــــــادت نكيفـــــه = نفيضه اللي ساطـــــــــيٍ بالملاوي
الارض للما تشربه ثـــم تعيفـــــــه = مثل السما صارت بلونٍ سمــــاوي
قلبي ذكرته في تمام الوصيفــــــــه = كنّه مــــــــــع الخليان ورعٍ خلاوي
إيشوف خربوش الشعر شبه ليفــه = ويشوف بالوادي عراقيــــب شاوي
همٍّ وغمٍّ والعـــــــزوم الضعيفــــــه = تبخّر إحساسه وذيك الهقــــــــاوي
هذا الغلا كلّــه عذاب وحسيفـــــــه = من دور ابن مجماج وابن العطاوي
اللي يبي المرباع يصبر بصيفـــــه = دنـــيا تقلّب بالعــــنا والبــــــــلاوي[/poem]
رد مع اقتباس
المفضلات