[align=center]السلام عليكم
بالخير كلكم
بالخير كلكن
وللإخوة الفرنسيين : بنجور ... بنصوار
................
موجز السالفة يقرؤها على حضراتكم الأصيل أبوثوب
* الأصيل وخذ إخيذة الضحى بالمخيم ( والسالفه طويله )
.......................................................................
الأنباء بالتفصيل من إذاعة مضايف شمر .. البرنامج الأول .
....................................................................
سنه من السنين ...
بالشتا ... بالمربعانيه ..
أخوكم جالس ببيتوه .. ماعندوه من الشيطان طاري .
ونا ما أداني البرد ...
يعني بي عردز من الضب ( بيات شتوي )
المهم ..
دق التلفون ..
وهو يكلمن حدا الشباب ..
وشعندك ؟؟
قال يابو ثوب .. طالبينك .. قل تم
قلت : تم
قال : حنا طالعين بالمخيم ،، ونبيك تجينا
بلشت ...
قلت ياولد .. أنا بالليل شوفي مهو كل هذا .. وأخاف أضيعكم
قال : تجيك سياره وتاخذك ..
قلت .. خلاص .. ( وافقت على مضض )
مهي مشكله يالأصيل،تعلل معهم ساعه ،، وروّح للبيت ، ( وأهلي قالو : نحتريك على العشا )
جتن سياره وخذتن ..
وصلنا للمخيم ،، انبسطنا ..
قلت .. تسمحون لي ..
قالو أبد ..
نبيك تمرح
قلت : ياعيال ،، أنا ما حسبت حسابي ، ولاجبت فراش ولا حتى جبت فروتي
قالو .. نعطيك فراش وبطانيه !!!!!!!!!
أووووووووووووووووووووووووووووووووووووووو ووووووه
جابو لي فريّش مايوقيك القاع .. وبطانيه من عهد جدّي
قالو .. تكفيك ؟؟ قلت : إيه
ونا بي طارف حيا ..
فرشت فراشي ..
ومن حسن الحظ إن بوه فتحه بالخيمه من حدر ، مشقوقه ولا أحد خيطه
ونا لك أحد راسي مقابل الشق ( ولا أدري بوه )
وبدأت المأساااه
جوووووع ... وبررررررد ،، هبت شماليه ، وحنا بالمربعانيه
والهوا تقل متسلطن علي ..
صاير تيار هوائي ..
يمر من الشق .. على غاربي مروراً بظهري ليما يطلع من طرف إبهام رجلي الأيسر
يالييييل مطولك
خوياي كلن يشخر من عندوه ..
ونا عجزت أندزلب من البرد ،، أحس إن تسلاي تجمدن ..
( حسبي الله على اللي كان السبب )
والله ( ولالكم علي يمين ) إني شلت الفراش وحطيتوه على ظهري
وخليت جنبي على القاع ،، ولكن ...
( زاد الطين بله والمريض عله )
تقول حدري قطعة ثلج ( صاير من أهل الإسكيمو .. هاللي شمال الارطاويه )
عدّت الليله بشرها وشرها ( ماشفنا من خيرها شي )
وكانت ليله عسى ماتلفي على الصديدز ..[/align]
[poem=font="Simplified Arabic,5,white,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
لا وا حلولات يافراشي=طلعتْك ( ياصيل ) ملويه
ليتن من البر منحاشي=والبرد بالمربعانيه
أرغي كما يرغي الحاشي=اللي مخليه راعيه
وعظامنا صابه رعاشي=من يوم هبت شماليه
تقول تبريد ( هيتاشي )=وموردن للسعوديه
حدري كما قطعة الكاشي=وجنبي تجمّد كلاويه
والوقت عيا مهو ماشي=والليل زادت بلاويه
وبطني تقل فيه نهاشي=ينهش كما تنهش الحيه
وسط الحشا فيه حشاشي=أو صايبه مس جنيه
صرنا مثل طاش ماطاشي=كل المواقف فكاهيه
حسبي على الصاحب الواشي=الله يجازيه بالنيه[/poem]
[align=center]................
قدمنا لحضراتكم أهم الأنباء
قرأها عليكم الأصيل أبو ثوب
شكراً لحسن متابعتكم
والسلام عليكم ورحمة الله وبركاته
..................
حكمة الأسبوع :
ابعد عن الداب وشجرتوه .. وابعد عن المنحاش وغبرتوه
........................
ياسامع الصوت ... لاتنسى الوعد اللي بآخر رساله[/align]
رد مع اقتباس
مشرف مضيف الترحيب والتعارف
المفضلات