بطل قصتنا هو الشيخ دبيس بن مهلهل بن علوي من العليان من عبده من شمر والشيخ دبيس (رحمه الله) له من القصص مانرفع به روسنا ياشمر وهو من الناس اللي علمه تفخر فيه شمر وهو كذلك راويه من روات شمر المعروفين وهو امير قريه المعترضه جنوب حائل . ونبي نذكر لكم قصه من قصصه وافعاله الكثيره ونبدأ بسالفتنا وهي جرت تقريبا قبل عشرين سنه كان هناك رجل اسمه مشاري وهو من الثابت من زوبع من شمر وانت يامشاري من اهل العراق جاء الى حائل وقدّر الله عليه يصير له حادث مروري ويموتون( قبلاه) يعني الاشخاص الذين في السياره الاخرى وعددهم شخصين ويسلم مشاري ماجاء عمره خلاف وهو يسجن مشاري ويطالب بالديه للشخصين اللي ماتو وهو ياخذ بالسجن فتره من الزمن الظاهر حول السنه ماقدر يدبر المبلغ المطلوب وكان يسمع بدبيس وفزعته مع أي شمري وهو يرسل مكتوب لدبيس بن مهلهل العلوي يقول يادبيس انا وضعي ( كذا وكذا ) واليوم ابيك تعلن بالجريده ان فيه شخص يبي يبيع كليته ويوم وصل المكتوب لدبيس وقراه يوم العلم اللي مايسر وهو يقوم دبيس ويجمع حق الديتين من جماعته ويقوم يمشي على حائل وقراياه ويجمع منهم حق الديتين ويوم كمل المبلغ المطلوب وهو يروح للمحكمه ويعطي القاضي الدراهم قال القاضي يادبيس المبلغ كمل وزاد منه حوالي اكثر من العشرين الف قال دبيس للقاضي هذا مصرف لمشاري الثابتي ويوم طلع مشاري من السجن ويقوم دبيس بن مهلهل ويحط عيد لطلعته ويعزم اهل حائل وقراياه عموم بالمعترضه عيدٍ لطلعه مشاري الثابتي ويذبح قعودين وثلاث عشر خروف ويصير هاك السنه ثلاث اعياد بحائل وانا اخترت لكم قصيده من ضمن قصائد كثيره جداً قيلت بالمناسبه هذي والقصيده هي لواحد من حاضره اهل حائل اسمه ابراهيم الرديعان يقول فيها:
عمار ياديره دبيس عمار ............دارٍ بها للغانمين وقار
دارٍ بها ملجى ويلقى الذرى به..............هل الضيف والعاني وجار الدار
يلقى بها ظلٍ الى من يلتجي به...............بعسر السنين وغلية الاسعار
هاتو لي الدفتر وهاتو لي القلم.................نبني على الكاغد جديد أشعار
على صفحة القرطاس حبيت اعّبر...............ببيوتٍ من صفي الكلام مختار
فكري علي يملي بما حاك خاطري................هاضن علي مثل الدبا الى سار
هاضن علي مثل الجراد التهامي...................الى طار من دارٍ وتنصّى دار
اسباب ماهاضن وحرّك حواسي..................علمٍ تحاكو فيه رجال أخيار
علمٍ لفى غطّى من ادنى المدينه................وشمال عرفو به الى سنجار
قالو دبيس معيّد عيدٍ ثالث.....................بآخر شهر واحد عزم زّوار
عزم من الوادي الى حد لينه.................عيدٍ لوجه الله على ماصار
لمشاري اللي عيّدو يوم طلعته................من سجن حائل مابها معيار
سجنة شرف حادث مروري مقدّر..........ولا هو على خنبه ووصمة عار
السجن لطوال الشوارب حمايه..................لاصار مايكسر لك التعبار
ولا ينشمت بأمرٍ مقدّر من الولي.............تقدير من رب السماء القهار
تمشي ومقسومك ورزقك مقدّر...............ومن عاش قبلك تجعله تعبار
ابن آدم مسيّر ولا هو مخيّر................ولا هي على كيف البشر تختار
رجلٍ من الثابت لجى لابو خالد................ سجين دم وبالدّيه محتار
ومن يلتجي لدبيس ماخاب ظنه...............فدا في راس عيطا عن السموم الحار
عزالله إنه قمةٍ يلتجى به...................ويبين الى جن السنين عسار
من اللاّبة اللي صيتهم ذاع واشتهر.........الذيب يذبح له مع الخطار
مكازي ذبح للذيب يوم إلتجى له............وعلمه على كل الجزيره سار
من أولاد علي افعالهم عارفينه.............مواقفٍ ترخص بها الاعمار
ومنهم دبيس إلى تبنّى قضيّه................تهون لو هي صعبة المظهار
يقدم على الكايد وبالله يقتفي................والخوف ماطوّل قصير أعمار
ومن هاب غبّات البحر ماجنى الدر............ولا يجني اللولو من المحار
ولا كل من قدم لحملٍ يشيله...............ولا كل من يملك صقر صقار
ولا كل من رام المعالي يطوله.............إلا الذي يصبر وياطا الحار
سجّل لنا مجدٍ يتجدد مع الزمن.............مادام ليله والنهار نهار
المرجله صعبه ومرٍ مذاقه...............أعطيك عنها موجز وإقرار
وتاقف معه شمر الى حل قاله.............عموم مامنهم قصير اشبار
حصلتوه يوم المساعر صعيبه............يوم الدره تجلب من الامصار
وإيدامها من مير فج الخوافي.............دبسٍ على كل الصحون يدار
ومره بهيل الهند تبّهر دلالهم.............ومره تصب ببهارها مسمار
ومره يغيبن كلهن عن يديهم..............ومره يصبونه بغير بهار
سويلم ذكرها في ماضي زمانه.............وقال المجرّب يقبل الاعذار
ومن عاصر الدنيا عرف من تجاربه..........وكثر التجارب تودعك بيطار
دنياك ياما بها من الكيد والنكد..............وكم واحدٍ منها يذوق امرار
لو أسقتك بالكاس من حلو مابها............وضحكت بوجهك ضحكة الغدار
بواقةٍ لاتامنه تنقض العهد................وتجزاك من عقب الوفاء بإنكار
إصبر على الدنيا بعسرها ويسرها..........وتر كل عسرٍ يقتفيه إيسار
بالله يالمندوب جّهز زمالتك.............وخله مع الدرب السهل والقار
وحّرك على موتر جديدٍ مجرب..........آخر موديلٍ لواصفه يحتار
يسبق خفيفاتٍ شياهينٍ الى مشو............تعشيق قيره مايبي له غيار
مع درب رّمان الحمر هو طريقك.........قبل الغزاله لف به يسار
مر المهاش وتلفي المعترضه.............ديرة دبيس هي آخر المشوار
تلفي دبيس وبلغوّه تحيتي...............بإعداد ماساق الظلام نهار
وعد النجوم اللي علينا مطله............بإسم الحضور ونعيدها تكرار
تسمع هلا من حين تاقف زمالتك..........قبل السلام وقبل شب النار
وتجلس على فرش الزوالي بمجلسه..........وساعة تقهوى العود الازرق سار
وكانك في وقت الظهر تقلط على الغداء.........وجابو صحون ٍ تتعب الحدار
وكانك بليلٍ يقدمونك على العشاء............بصياني فوقه عريض فقار
والصبح لاجيته فطورك يقدّم................وعندي على هذا شهود كثار
والقصيده اطول من ذالك وقد قيلت قصائد كثيره بدبيس لمواقفه الكثيره التي ترفع الراس وحقه علينا نترحم عليه
وختام القصه لكم طولة العمر وله جنات النعيم
(القصه بلسان الشاعر ابراهيم الرديعان ومسجله بشريط ومنتشر عندنا بالمنطقه)
اخوكم خالد الجعفري ـ حائل
رد مع اقتباس
[/align]
المفضلات