[align=center]السلام عليكم
بالخير يابدو
.....................
أبو الأصايل .. أشوف مويضيعاتك كله بالقصايد
ياخوك ترا هنا الفله !!
والشعر الشعبي .. حدر !!
** أدري يافلان .. لكن الشعر الشعبي مالي المخش
تقول بورصة ( طوكيو ) زحمه 24 ساعه
ولو تبي تكتب لك تسم بيت .. مايمضي خمس ساعات
ألا وهي بالصفحه الرابعه ( عيني عليهم بارده )
وبعدين .. مجموعة نبراااس وهكا الربع .. مالنا معهم أكل عيش
والمثل يقول : رحم الله امرءاً عرف قدر قصيدتوه
لكن هنا بالفله .. الشباب والشباباتيجاملون ويشجعون ويغضون الطرف
وكلكم عزيزين أنتم وأهل الشعر الشعبي
......................
السالفه ..
جاني حدا الغالين ،، وقال لي ، يالأصيل عندي لك هديه
قلت مقبوله
قال : شريط ( VXR ) كلوه قصايد لأخونا الشاعر براك الفريسي
رتسبت سيارتي .. وأنا لك أحطوه بالمسجل ،،
ليوالله قصايدن ما أزين منه ،،، انبسطت بالطريدز
قظى الوجه ... وأنا لك أقلبوه
وببداية الوجه الثاني .. دريت أن الفريسي برفحا
قالو لوه أهل رفحا : نبي قصيده بالكامري
قال : والله إني ما أداني الكامري !!!
عاد أنا سيارتي كامري
(( ولاتحسبونن شباب .. ترو نص شعر راسي أبيض ))
المهم ..
مافطنت ألا سيارتي خذت يمين .. وهي لك تودزف
العلم ؟؟
قالت : ماتسمع شيقول الفريسي ؟؟
قلت : بكيفوه ،، للناس فيما يعشقون مذاهب
قالت : ما أمشي ألا تقصد بي قصيده !!
قلت يابنت الحلال مهو وقتوه ، ونا مستعجل وعندي شغل
قالت : لله ،، ما أتحرك
قلت أنا ما أعرف أتغزل بالسيارات ولا بالبنات
وبعدين .. الفريسي ،، ماقصّر ،، مدح ولد عمتس ال( VXR)
وكلكم من عايلة اليابان طيور شلوا !!!!
قالت : ترن علمتك .. مايدور الكفر ألا بقصيده ..
قلت : مهو الحين ... بعدين بعدين ...[/align]
[poem=font="Simplified Arabic,5,white,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
قالت أفا ( ياصيل ) يالقرم وشجاك؟!=ماتسمع اللي يقْصد ،، ويحْمسن حمس
والله يلولا خوّت الدرب وياك=أحلف يمين إنك فلا تلمسن لمس
ياشَين ...خلك شاعرن مثل براك=يمدح من الفكسار للجيب للجمس
قلت العفو .. وش جابتس إنتي لذولاك=للكامري توقيعي .. وبصمة الخمس
يانجمة(ن) تاظي على كل الأفلاك=كل الكواكب مشيها يتبع الشمس
فازت على صنعة كلنتون وشيراك=باقي المواتر بالوطى تنرمس رمس
سته سلندر .. جير أرضي .. وايرباك=وبلوفها ... صوت العشيقين بالهمس
كشنه أوتوماتيك ( قدام) ( والباك )=كل المواتر غيرها تنطمس طمس
دقّه عجيبه بالزراير والاسلاك=ومسجله ( سي دي ) مع ( التتش ) باللمس
يجحد فعولتس كل حاسد وشكاك=لاشاف زول الكامري ينعمس عمس
ماهمها دربن تغطيه الأشواك=ولا روّعه فز الجرابيع والنمس
ياموتري لك ملبس العز يزهاك=دور الجموس أقفى زمانه من الأمس
حجمه صغيرن مثل حر(ن) ليا جاك=والنسر مع حجمتس من الرُبع للخُمس
قالت : كفى ياصيل ... نفداك نفداك=قلت الأصيل بحبكم منغمس غمس[/poem]
[align=center]أخوكم ... أبو ثوب[/align]
رد مع اقتباس
مشرف مضيف الترحيب والتعارف
2n3@w.cn
المفضلات