من المعلوم ان كثيرا من الشعراء لايستقرون في مكان واحد بل يذهبون لمشائخ القبائل ولأمراء المناطق بحثا عن النفع لهم من المال والاعطيات وغيرها.......الخ....... وشاعرنا اليوم هو الشاعر خلف ابو زويد فالشاعر خلف ذهب عند الشيخ سطام بن شعلان شيخ الروله من عنزه وجلس عنده فتره من الزمن ومدحه هو وجماعته بقيصده يقول به خلف:
ياراكبٍ حمراء تسوف العراقيب.............حمراء تسوف كعوبها بي سبيبه
تلفي لهل العلياء هم منقع الطيب............ونعمين بالعلياء ومن ينتخي به
رويلات والله مابهم عد أجانيب.............ولا منهم اللي نازحٍ عن قريبه
سطام مثلك ماحمل به ولا جيب .............من مطلع البيضا لغربي مغيبه
مايستوي للبيض غيرك ضواريب...........البيض خطو المشتبه وش تبي به
ياشوق من عيّت على كل خطيّب...........قبلك على كل القبايل عصي به
والقصيده أطول من ذالك ومن المعروف هنا بقيه القصه يوم يشكي سطام ان حريمه كلهن زعلن ويشاور خلف ويش الحيله علشان يرجعن يوم يقول خلف قصيدته اللي اوله:
(قالو تشير وقلت انا اليوم ماشير...........عيبٍ على من جاب شوره ولا جاز) وهن يرجعن معه.
المهم ماهذي سالفتنا نرجع لقصيدة خلف ابو زويد بسطام الشعلان يوم يقول:
مايستوي للبيض غيرك ضواريب........البيض خطو (المشتبه) وش تبي به
يقولون انه يقصد بالمشتبه ألأمير محمد بن عبدالله الرشيد لأن الأمير محمد الرشيد عقيم ماله ضنا وهو اللي يقول:
لو الضنا كسبٍ خذيته بالأيمان..........ولو ينصفط كثيرٍ اللي صخى به
رد على ابو زويد الشيخ خلف الأذن الشعلان من شيوخ الروله يقول خلف الأذن:
يابو زويد فاطرك به شواذيب...........يرتك على هطل المزاود هذيبه
وش جاب ابن شعلان شيبٍ ولد شيب...........لاغرّ من الصيدات ياكل قريبه
ماقلتها بالضيغمي منقع الطيب.............مقيم الضحى للمنهزم وش يجيبه
ورد عليه الشاعر شفق الجهيلي يوم يقول :
يابو زويد ياردّي المطاليب............هذاك قول اللي تردّى نصيبه
ويوم علم الأمير محمد الرشيد هدّد ابو زويد وتوعده بالقتل وابو زويد يوم دري بتهديد الأمير محمد الرشيد وهو ينزل حائل باليل وينام عند واحدٍ يعرفه وبعد صلاة الفجر وهو يدخل على الأمير محمد ومعه قماش أبيض وشاةٍ يقوده قال ابو زويد ياطويل العمر انا خلف ابوزويد دريت انك تهددن بالقتل فجيت ومعي كفني وذبيحة الدفنه وهو يقول :
نجدٍ جفتنا بالمحل وأبعدتنا.............ويوم أخصبت حنا هذولاك جينا
لولا محمد ماإفتدت سابلتنا.............كان تاخذ الحكام باقٍ علينا
ويوم سمعه الأمير محمد الرشيد عفى عنه وسمح عنه . فرحم الله المهاد والشاعر خلف ابو زويد
................................................................................ ................................................
ملاحظه القصه موجوده بأشرطه للراويه المرشدي الشريط رقم 9 وبدايه القصه بين سطام وخلف موجوده للراويه رضا طارف
اخوكم خالد لشمري ـ حائل
رد مع اقتباس
المشاركة الأصلية كتبت بواسطة الامسح
المفضلات