[poem=font="Simplified Arabic,5,white,bold,normal" bkcolor="transparent" bkimage="backgrounds/15.gif" border="ridge,2,white" type=2 line=1 align=center use=ex num="0,black"]
داعــي المشتاق
________________________
ذعذع الغربي وبادلها شمالي=وانتحى بالوسم ريحة للجنوب
واعتلى الخايل من المشراف عالي=والسحايب بالفضاء قبل الغروب
واتّقت شمس العصير وضاق بالي=والظلام اجتاح مع صوت الهبوب
تستثير أصواتها ميت خيالي=داعي المشتاق باموات القلوب
الرياح الموسميّة والهلالي=هي بلا المشتاق للطرف اللعوب
تستفز الريح صبري واحتمالي=وترتكبني لعنة الفرقا ركوب
ميلة الحظ الردي واللي مضالي=حمّلت نفس الرهينة بالذنوب
ياهبايب مبتدى الوادي تعالي=واحملي قولا صحيحا ومحسوب
السلام لدار حايل وامتثالي=والتحية للفرح عني تنوب
مع صدوق الود وآمال الليالي=يارجايه والرجا من كل صوب
انتحيت من المفارق وانتحالي=بين ميل القلب غالب ومغلوب
ان شكيت أشكي من المقفين غالي=ليت لي قدرة على التوبة واتوب
يانديم العمر والدنيا زوالي=حبكم بالقلب من ربي وجوب
مانسيتك لو نسى حظي وصالي=في رجا الغفار علام الغيوب
وساقك الله ياهبايب من شمالي=يم وادينا على حايل دروب[/poem]
رد مع اقتباس
[/align]
المفضلات