المصايب تجي دفعه وحده

[الأصيل]

[align=center]بالخير يابدو( بقت هالكليمه بوق من حدا الأجاويد دازه برسالتوه الخاصه )

المصايب تجي دفعتن وحده ، تقول سباق 400 متر حواجز

والمشكله إن أخوكم بغا ينفضح فضيحه بجلاجل ( مهي جلاجل اللي دون الرياض )

باختصار

هكا اليوم ..

منبطح على الكيبورد .. أراقب شريط العناوين عن كثب ( تعرفون كثب ؟؟ )

( شبثاااان : تعرف كثب ؟؟؟؟ ) ( أدري بك ماتعرفوه )


المهم ، وهو يطلع هكا العنوان ( شموع .. شموع ورومانسيه )

ولا أدري هالماضوع بأي مضيف ..

بس إني هقيت إنوه بالفله .

ماتساذبت خبر ...ونا لك أضغط العنوان

فتحت لي صفحه ..

قلت يابو الأصايل .. شارك ( خاصه ان اسمك ينكتب فوق إنك تسفت هنا)

المهم كتبت المقسوم ،،

ونا أضبطوه تضبيط ماحصلش

جاهز للارسال ؟؟ قال : جاهز ،،،،

ارسل ..

خلال لحظات .. فصل معي النت !!!

طلعت لي صفحه خلاصتها ( تعرفون معنى : خلاصتها ؟؟ )

( نطلالالالان : تعرف معنى : خلاصتها ؟؟؟ )

خلاصتها إن مدة استخدام الكرت قد : قظت ( انتهت )


وهو يجي أبو مره ( هذا لقب للشيطان في لغة العرب )

قال : يالأصيل ... ياخوف قلبك إن الرد اللي كتبتوه تابع لمضيف ( الحريم الخاص )

لالالالالالالالالالالالالالالالالالالالا لالالالالالالالالالا

لأن أخونا المشرف العام ، كاتب موضوع مفاده ( تعرفون وش معنى مفاده ؟؟ )

أبوغازي : مساك الله بالخير .

مفاده إن أهل الشوارب واللحى لايجون بهذا ..

أنا بهكا الساعه تمنيت إن الكيبورد ينشق ويبلعن .

والفضيحه الكبرى إني دخلت ولاتنحنحت ولا قلت : درب درب

المهم ،قلت ، لازم تمسح اللي هببتوه يالأصيل قبل لايقراو المشرف العام

والمعروف إن مدة التعديل هي ساعه واحده فقط بس لاغير

وبدأت المأساة

ركض ...........

خابر لي هنيدي عندوه بقاله ويبيع من كروت النت

كومار

نعم بابا

قلت : أبوك للنار ( عاد هو بوذي ولد بوذي أبا عن جد )

قلت : كرت نت بسرررررعه

قال : ماكانش يتعز ( الظاهر خوالوه من مصر)

لييييييييه ؟؟؟

قال : كلص ( خلص ) بابا

قلت : خلصن أيامك .

برضوه ركض إلى الموتر ،،

أقرب متسان بوه كروت على بعد 6كم

عيني على الساعه ..........

وكل همي من الشماته والشماتات .

قام عرقي يتخابط وحنا بالمربعانيه

( أنا لو محصل لي عامل يمسح عرقي من كثر صبوه )


شغلت الموتر ...

دي ( أوتوماتك ) رووووح

غريب عجيب ... السياره ماتمشي ،، تسن قاضبينه أربع صعايده من الخلف

حولت ... لياوالله الكفر حاط خدوه على القاع ... ( مش وأتوووووه ياكوتششش)

جلست أمامه ... واضعا كفي على خدي ( أكسر الخاطر )

جا حدا الجيران ..

هاه أبوفلان .. عسى ماشر ..

قلت ، مايجيك الشر ،، شوفت عينك .

قال بسيطه ،، ركب الستبنه

وهو لك يفسر ذرعانوه ( لأنوه شباب ، وأخوكم كبر القاع )

قلت : ياولد على كيفك ،

قال : ليه

قلت : أدري ،، المصايب تجي ( ون وي ) دفعه وحده

أكيد الستبنه منبشره برضوه

وفعلاً ...

يوم ضغط عليه .. صايرتن تقل صميل .

المشكله إن موتروه أمريكي ،، وموتري ياباني .


بهالحتسي : قطعت الرجا بتعديل المشاركه ، ومتحري رساله توبيخ

من المشرف العام .



( الطفاقه شينه يابو الأصايل )

مفروض إنك تتركد شوين .



مالكم بالطويله ( أكثر من هالطول )

عقب ثلاث ساعات ..


حصلت على كرت

فتحت صفحة المضايف ( على استحياء ) ( تعرفون وش معنى على استحياء )


أبو مقرن : أكيد تعرف معنى ( على استحياء ) ياخوك : علّم نبراااس .


دخلت ..

وأدور موضوع : شموع شموع ( دموع ... ورجفه بالضلوووع )

آخر رد : ملاك غيدا ..

قلت : عز الله انفضحنا ، أكيد شافو مشاركتي ( عساه ماتفيد )

يوم فتحت الصفحه

مالقيت أي رد لي .

قلت : الحمد لله

ثم الحمد لله ..

الظاهر إن النت فصل قبل لايتم إرسال الرد

أفيييييييييييييييييييييييييييييييييه





لهذا ..

ومن هذا المنبر الذي أعتليه

أنصح جميع رواد الفله

وأخص التماسيح فقط شرواي ( شرواي الطيب )

لاتغركم العناوين ياشباب

بوه صفحات يشمه الذيب ويعوي

وتحياتوووووه الحاااره [/align]

[الـمـحـروووم]

[align=center]الأصيل
الأصيل

الحمد لله على السلامة
[/align]

[المطنوخ]

[align=center]

( نطلالالالان : تعرف معنى : خلاصتها ؟؟؟ )

اي اللي ليا قظى الفلم نقول خلص!!

======================

ابوثووووب

هذا ابوسلطان المشرف سوا بك هاللون

اجل لو كنت انا المشرف تسان وش تعمل؟؟؟<<<يبي يرز نفسه ومايدري وشلون [/align]

[ابو غازي]

[align=center] هههههههههههههههههه
ههههههههههههههههه
هههههههههههههههه
هههههههههههههه
ههههههههههه
هههههههههه
هههههههه
ههههههه
ههههه





ياشين احولت عيوني وانا اتابع هالفلم
تسان معلمن اجيب صلفيق ابو قنااة
والله مايهوطك الزقيمي وهو حولك هو والفروة والقنااة ساهده [/align]

[المخاوي]

[align=center]الاصيل

جاين امشي الفين

لكن لي رجعه بعدين

لاحد ياخذ دوري [/align]

[الجازي]

[align=center]أخبر التعديل لمدة يوم وراه معك بس ساعة ؟؟

<<<<<<< هذا أقصى تفاعل لها مع الموضوع

عموما المرة الجاية لايضيق صدرك ولا تشيل هم ,, أخواتك هناك راعيات فزعة من يوم يشمون ريحة تمساح تلقاهم شايتين رده قبل ماينزل [/align]

[سلطان الشمري]

[align=left]بنسوااااااااااااااااار ..خيو



تئوبش البي يادب( بكسر الدال) تطلع دٍب .. بالسوري





تدري عاد .. والا بلاش.. انا مستعجل القلايه به ماء ابي اضبط لي راس كابتشينو











سي يو ليترررررررررررررررررر[/align]

[ابو خليف]

[align=center]بارك الله بهالفصله

الي فكتك من فضيحة جلاجل

بعدين انا ماعمري شميت شين وعويت[/align]

[شنقل]

[align=center]الاصيل


يافلان من كثروه


انا ياواحدن من هالفله


مامن مضيفن الا ودوجت به

وياكثر ما تعامش انا والشبث

خارج نطاق الفله ( حلوه نطاق)

وياكثر مانكرش بس ولاهمن[/align]

[مفتاح14]

[align=center]
خلك مثلي وانا اخوووك اذا شفت شي متعلق بالنسوان دقيته لطمه ومسكت اقرب مخرج تحسبا لاي موقف محرج (الاصيل اذا ماتعرف معنى تحسّباً انشد البوذي اللي ببقالتكم )


كل شي يهون الا انك ترتبك مثل هالربكه..يعني عدة ارتباكات بربكه وَ حَ دَ هـ



على فكره شكل حبل افكاري كان مفصول(مثل اشتراكك) وانت وصلتوه بهالموضوع..




الاصيل..من زماااااااان وحنا قاطعين عليك انك غييييييييييييير..


لاتحرمنا من هالتميّز[/align]