للرجل : ماذا تريد من المرأة ؟؟
[align=center]الظاهر هذي أول مرة أعرف أكتب عنوان سنع
الله يستر عاد لايطلع الموضوع ماهو بيم السنع
طرى على بالي هالموضوع بعد ماذكرت سالفة واحد من ربع أبوي ومن أصدقائه المقربين يوم جاء عند أبوي يشتكي له من حياته مع زوجته ,,
طبعاً الشكوى ماهيب رسمية
من إيش يشتكي بالضبط ؟؟ هذا ماستعرفونه في الحلقة القادمة
شيء طبيعي لو كان يشتكي من كثر مشاويرها أو كثرة طلباتها أو إنها قلق يعني حنّانة ورنّانة >>>> أوصاف مسكتة
أو إنها مثلاً عجازة أو مشاكسة أو عنيدة أو مسيطرة ومستبدة أو مهملة لزوجها أو أو أو ... إلخ من قائمة الصفات العسل
لكن صاحبنا هذا ,, قصدي صاحب أبوي
يعني شلون ؟؟
هذا ماستعرفونه في الحلقة القادمة
أبد ,, كل السالفة إن الأخ يشتكي من مثالية زوجته ,, يقول عنها بعظمة لسانه على قولة المصاريا >>> مع إن اللسان ماله عظم بس مضطرين نجاريهم ونشلح أمثلتهم للضرورة القصصية
يقول : عمرها مارفضت لي طلب ,, كل ماطلبت منها شيء قالت : أبشر ,, إن شاء الله ,, سم ,, مايصير خاطرك إلا طيب ,, ولا يهمك ,, اللي تبيه يصير ,, أهم شيء إنه يعجبك ويريحك .... إلخ من الردود المؤدبة والمطيعة
يعني عمرها ماقالت لي : لأ ,, أو صارحتني بشيء مايعجبها ,, أي شيء أجيبه أو أسويه أو أشتريه تقول إنه أعجبها,, مع إني أحياناً (( والكلام له مب لي
قال له أبوي : أنت مهبول !! >>>>>> تسن أبوي متعقدن من أمي
نرجع لـ قال أبوي : أنت مهبول !! ,, هذي حورية ماعاد تلقاها في هالزمن ,, حافظ عليها يالخبل (( خبل ؟؟ عادي يمون على خويه
قال صديقه : والله ياأبو فلان >>>> فلان هذا هو أخوي الكبير
مليت من هالحياة ,, أنا أبي وحدة ترد علي الصوت ,, ما أبي أسمع صدى صوتي >>> مشروع أغنية
أبي أسمع صوت جديد ورأي ثاني ,,أبي وحدة تعطيني رأيها بكل صراحة حتى لو كان عكس رأيي ويخالفني 180 درجة ,, وحدة تشاكسني ,, تعاندني مرة وتخالفني مرتين ,, تزعل مني وأزعل منها ,, يتغير جو البيت شوي ,, أما كذا أحس إني عايش كأني سي السيد أربع وعشرين ساعة
>>>>> ليت من يعطيها من يبسة راسي شوي عشان يعرف طعم المشاكسة ويقدّر النعمة اللي عنده ويحرّم يتميلح مرة ثانية
قال أبوي : الله يخلف عليك ,, إحمد ربك بس,, الناس مايلقون مثل هالعينة الحين ,, والله بكرة لو تطيح لك في وحدة من هاللي تبي إن تندم على الساعة اللي هوجست فيها مثل هالهواجيس ,,
النهاية ,, >>>>> خلاص مافيه تابعونا في الحلقة القادمة
هذي هي خلاصة القصة أو تقدرون تقولون هذا اللي وصلني منها >>> كل هالبربرة وخلاصة
طبعا القصة حقيقية ميتين بالمية وسامعتها بإذني من أبوي مباشرة>>> أجل بعيني
بس أكيد حطيت فيها بعض البهارات والتوابل الهندية للحفاظ على النكهة القصصية
بالنسبة لزوجته أنا أعرفها مثل ماأعرفكم
تزورنا في المناسبات ,, إنسانة أخلاق وذوق وأدب وحشمة ودين وثقافة وفي نفس الوقت موظفة ,, يعني مافيها شيء يعيبها
بس تبون الصراحة ,, بعد ماحطيت نفسي مكان زوجها ,, بيني وبينكم عذرته ,, حسيت بمعاناته الحقيقية ,, لأنه فعلاً هالوضع يجيب الملل ,, وتطلع حياته كلها روتين بايخ ,, كأنه مدير شركة ,, يعني اللي يشوفه يحسده على هالعيشة وهو مايدري عن حقيقة الوضع
السؤال الحين اللي يطرح نفسه >>>> خطيرة يطرح نفسه ذي
المعروف أو على الأقل اللي كان معروف عندي ,, إن الرجل أو الزوج بالأخص يحب في زوجته طاعتها له في كل أوامره ونواهيه وإنها تسوي له اللي يحب وتترك اللي يكره ,,
لكن بعد هالسالفة اختلّت الموازين عندي ,, وحسيت إن فيه حلقة مفقودة بين الزوج والزوجة سرّها موجود عندكم يالرجال ماراح يدلنا عليها غيركم ,, عاد عطونا وجه وتكرموا بأرائكم ونظرتكم حول هالموضوع ,,
أتّينشن للصبايا
اصبروا لاتطبون بوسط الموضوع وتعلقون عليه ,, خلونا نسبر أغوار هالرجال ونطلع اللي في بطونهم ,, وبعدين نعقد اجتماع مغلق نتفق فيه على تكتيك مناسب للرد عليهم
رد مع اقتباس
[/align]
المشاركة الأصلية كتبت بواسطة الريم
المفضلات