تراكم مصختوها عاد !!
[align=center]كل شيء له حد ,, حتى الصبر له حدود ,,
وأنا صبرت عليكم وقلت يالله الشكوى لله عيال عمي وعلى قولة المصاريا ولاد حتتي,, ولازم أتحمل مصالتهم وغثاهم ,, وعلى قولة القايل مالك إلا خشمك لو هو عوج
لكن عاد توصل المواصيل لهالدرجة ,, بصراحة ماأقدر أتحمل ,, والظاهر ان اللي يتغاضى عن حقوقه هاليومين محد يسأل عنه ,,
وحنا تركنا لكم الحبل على الغارب وصرتوا تاخذون راحتكم وتلعبون بذيلكم
من جد مصختوها بقوة ,, >>>>>>>> طيب وش السالفة تراهم الى الحين مايدرون وش تبين ؟؟
السالفة إننا حامت تسبودنا من كثر حتسيكم عن بنات الشام
وحطيتوا مواضيع عنهم طق طبلون عدّاد الصفحات فيها وسقط على عدّاد مجموع الردود الموجودة في الفصيح>>> ماش ضايقن صدرها الا لازم تدخل الفصيح في السالفة
وقلنا الشكوى لله رضينا بالهم والهم مارضي بينا
وصبرنا على شهبتكم ولهبتكم وزواجكم بهالشاميات كله حفاظاً على العقد الأسري من الانفراط
ولا ودي أعذرب ببنات الشام ماهو لأني مانيب لاقية بهن عذاريب
بس لأني خايفة من شن هجمة مضادة علينا يابنات نجد
والا بالله وش فيهن من الزود
لا والمصالة وأكبر نصبة عاد إذا قالت : تئبر عظامي
والبلشة انكم ياجعلكم بعدهن
والا تعال شف حتسيها إذا صالت وجتها أم العبيد
أو : العمى بألبك شو أجدب
إلهي يوريني فيك يوم أسود >>>> هذي بالمصري وش جابها هنا ؟؟
والا حنا ياحبيلنا ,, صح ان الوحدة تقعد لها سنة تستحي ماتعرف تحتسي حتسي زين
بس بعد السنة يجيك حتسي العجز اللي يبرد القلب
يعني عندنا بدل كلمة تئبرني
والا : ياجعلي مااذوق حزنك
أو : يابعدي أو تسانها تحب روحها قالت يابعدهم
أو يابعد حيي او او او ........ يعني عندكم قاموس متعدد اللهجات والمذاق في ترجمة : تئبرني
عندكم : الله لايحرمنا منك هذي للكشخين ,, الله لايفجعنا عليك هذي للي لها مع رجلها قرن
المهم ان فيه قائمة طويلة عريضة وش ملحها بلهجتنا ,, بس مدري وش طاعونكم مضربين عنها
الزبدة >>>>>> عقب كل هالمعلقة وتوني أجيب الزبدة
الزبدة اننا يوم صبرنا على عيونكم الزايغة على بنات الشام ,, تماديتوا وتعديتوا حدودكم ,, وصارت الدعوى ماهيب بس للبنات
وتروحون لهالماصلة ثقيلة الطينة :
صدز لاقالوا : شف وجه العنز واحلب لبن
بالله عليكم شغلكم هذا حلال والا حرام ؟؟
الحين هالماصلة تصير ملكة جمال وتشترونها بمئات الألوف وبنت الوطن قصدي عنز الوطن
وش دعوى ,, لهالدرجة مفتونين في هالشاميات
يعني حتى العنز الشامية صارت ملكة جمال الماعز وسعرها أغلى
وقسسمن بالله من شكلها وراسها وعيونها أحس إنها مضيّعة
يعني تخلون الملاحة والجمال الطبيعي
ويعمي الله قلوبكم وترشحون هاللي ماتدري وين ربها حاطها فيه لملكة جمال :
لا , لا,, فيكم بلا انتم ,, ماينسكت عليكم ,, أجل عنز شامية اسمها سلاسل بنت الكوري
والله لو شكلها حلو على عيني وراسي بس وقسسمن مافيها من الملح ذرة
المهم عاد ,, شوفوا لكم صرفة ,, ياعنزنا ياهالعنز الشامية ,, حنا بناتنا مانرضى عليهن بالضراير ,, قصدي عنزاتنا
والا ترى والله نبي ندخّل التيس الشامي في المنافسة
هو عموما عن قولة تهديد كود الله يهديكم وتعقلون وتعرفون السنع من أنفسكم
رد مع اقتباس
مشرف مضيف الترحيب والتعارف
>> مالكن إلا العرس عليكن وبس 
المفضلات