لاتقولون لي صح النوم !!

[الجازي]

[ALIGN=CENTER]فيكم ,, فيكم ,, لازم أحلل غيابي وأغثكم بالمواضيع اللي فاتتني حتى لو كانت بايتة أهم شيء الأخلاق

السالفة وما فيها إني حبيت أتكلم عن بعض الأخطاء اللي لاحظتها على بعض الناس في شهر رمضان ,, وودي تشاركوني وتقولون لي ملاحظاتكم أنتم بعد ,, عشان يكون عندنا فكرة عن الأخطاء الشائعة ,,

أول شيء قبل ماأبدأ في التعليق وسرد الملاحظات لازم أعترف لكم إني إنسانة قلق >>> مايعجبني العجب ولا الصيام في رجب

يعني فيه بعض التصرفات أتضايق منها بقوة ولا أقدر أتجاهلها أو ألعب على نفسي وأتخيل إني ماانتبهت لها

ومن بينها هالتصرفات اللي راح أذكرها لكم الحين >>>>> يالله إخلصي علينا

مثلاً :

1/ في صلاة التراويح كانت جنبي وحدة أجودية وباين عليها فيها خير كثير ,,

بس اللي هبّل بي إني إذا سجدت تبخرت كل أدعيتي ولا عاد أقدر أقول شيء والسبب إني عرفت أسماء العائلة المالكة لهالحبيبة وتفاصيل حياتهم وسيرتهم الذاتية

لأنها الله يهديها ترفع صوتها في الدعاء بشكل مزعج للي حولها >>>>>> يعني أنا ,, والضحية أنا راحت علي ذيك الليلة وانا مابردت قلبي من الدعاء

بس عاد إبراءاً للذمة استفدت من صوتها العالي في دعاء سجود التلاوة عجزت أجيب بدايته ,, وهي ماقصرت صوتها تكفل بتذكيري ببداية الدعاء ,,

بصراحة الله يجزاها عني كل خير من هالناحية >>> عالم مصالح

2/ ليلة من الليالي على بالي سنعة كانت بيني وبين اللي جنبي مسافة سنعة يعني تكفي لحرمة ثانية ,, وتوقعت إنها بتقرب جنبي إذا كبّر الإمام بحكم إن الصف كله منتظم وهي تقريبا في نهاية الصف يعني الحق لنا >>> صارت عزيمة

المهم إنها ماش ماقربت ,, قمت أنا بعد مادخلت في الصلاة وطلبت منها تجي عندي >>> طبعاً بالإشارة والإشارة في مفهومي إني أسحبها بيدي بس برقة مراعاةً لعباتها المخصرة الله يهديها ,,

بس البنت يابسن راسها ومعندة لاعبن عليها إبليس ماطاعت تقرب ,, بعد ماسلّمنا كبر راسي عليها ,, قلت والله ماأنصحها ,, بالطقّاق >>> إلا والله أنا اللي لاعبن علي إبليس

قمت وإلتفت على الصف اللي وراي وناديت وحدة في نهايته عشان تكمل صفنا ,, وفعلاً ماقصرت بنت الحلال وتقدمت ,,

بس هي تقدمت من هنا وأنا رجلي راحت فيها من هنا صارت من اللي يحسبون أنه من تمام الصف وسد الفرجات إنك تفحش برجلينك من أقصى اليمين لأقصى اليسار ,,

يعني إلا لازم رجلها تصير ناشبتن في رجلي وكل ماأبعد شوي عنها تدعس بأقوى ماعندها كنها تقول لي : حتروحي مني فيني ياتفيدة

آخر شيء طبعاً استسلمت والشكوى لله وش أسوي ,, بس تمنيت لو معي دبوس أحطه في إصبع رجلي عشان تحرّم تسوي هالحركة >>>>>> مشروع نذالة

3/ من ملاحظاتي بعد إن بعضهم ترفع إصبعها السبابة إذا سمعت آية فيها تسبيح ,, ماأدري إذا هالحركة صحيحة ولا بدعة ؟؟

لأن اللي أعرفه إن الرسول صلى الله عليه وسلم كان يشير بإصبعه إذا ذكر لفظ الجلالة أثناء الخطبة فقط ,, أما في الصلاة فما عندي خلفية عن هالموضوع ,,

4/ ومرة بعد ماكبّر الإمام ولا والله هالثنتين توهم يكتشفون بعض كنهم لهم قرن ماشافوا بعض ,, ووحدة منهم تسلم على الثانية بصوت عالي وتسألها وش اخبارها ووش صار على سلمان ومحمد وكم عندهم من العيال وووو ارتفع ضغطي

ياشيخة اعزميها بعد الصلاة على فنجال قهوة وفصفصي حياة سلمان ومحمد من طقطق لسلامو عليكو ولا تزعجين العالم وهم يصلون بهالأسئلة اللي مالها سنع

هذي تقريبا هي أهم الملاحظات والباقي يبيله قعدة خالية من الزوالة مدري عنكم اذا عندكم ملاحظات والا ماانتم قلق مثلي ؟؟ [/ALIGN]

[سكون]

هلا وغلا اخيتي الريم وربي ماقصرتي في كلامك احمدي ربك ماجاك شي بعد ،،، مو كنك نسيتي موضوع العيال مع امهم كنهم رايحين ملاهي هههههههههه لمستي الوتر الحساس عندي .. لي عوده إن شاء الله سلمت يدااااك ،

[دواس علف]

مراعاةً لعباتها المخصرة الله يهديها

[poem=font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
ههههههههههههههههههههههه
=هههههههههههههههههههههه
ههههههههههههههههههههههه
=هههههههههههههههههههههه
ههههههههههههههههههههههه
=هههههههههههههههههههههه
ههههههههههههههههههههههه
=هههههههههههههههههههههه
ههههههههههههههههههههههه
=هههههههههههههههههههههه
ههههههههههههههههههههههه
=هههههههههههههههههههههه
ههههههههههههههههههههههه
=هههههههههههههههههههههه[/poem]


[align=center]الله يخارجنا


اما هذي الي عرفتي السيره الذاتيه ... اقول ماعرفتي اسم شغالتهم واسم السوااق خحخخخخخخخخخخخخ


الله يهديهم بعض من التماسيح بعد والله زي كذا برمضان الله يتقبل منا ومنهم صالح الاعمال يقعد يصرخ ولوه ونين وانين >>>>بالحسي خاشع

ولوه دعاوي كذا وكذا طيب بينك وبين نفسك ...


على العموم موضوع ممتاز ومهم ايضا شكرا لك اختي الغاليه[/align]




.


.

[glint][align=center]مثبت[/align][/glint]

[تذكار]

[align=center][align=center]
هلا1111111 وغلا11111111 بالغالية الريم صـــــــــح النووووووم

الأخطاء اللي ذكرتيها كلها واقعية مع الأسف .. وأسلوبك الشيق والطريف زاد الموضوع حلاوة

أنا أصلي في البيت بس إذا سافرت مكة أصلي في الحرم ..

مثل ما ذكرتي اللي يرفعن أصواتهن بالدعاء يشوشن على المصليات .. والضغط عندي يوصل ألفين ..

واللي ما يصفن في الصلاة زي الناس .. على قولتس خايفه على عبايتها المخصرة هههه .. مدري ليش جاية تصلي تراويح وهي أصلا طالعه من بيتها بلبس غير محترم .. يعني تجلس في بيتها أستر لها ولا تكسب آثام .. وبعضهن متعطرات الله يصلحهن ..

في الحرم تجي الوحده منهن تجلس مكان سجودك .. طيب أنا وين أسجد ؟ على ظهرها أسجد ؟ والله تتعجبين من تصرفات البعض عديمين ذوق وجايين للعبادة ..

أما سالفة اللي ناشبتن برجلتس هذه صارت لي العام الماضي في صلاة التهجد .. البنت كبيرة ذبحتني و أنا مثل الشابورة طحنتني برجلها
ما قدرت أكمل صلاتي هربت ورحت مكان ثاني ..

بالنسبة لرفع السبابة عند سماع آية فيها تسبيح .. بدعة لم تصح عن النبي صلى الله عليه وسلم
السبابة ترفع فقط في حالة التشهد وعند الدعاء إشارة إلى التوحيد ولا ترفع في الصلاة عند سماع القرآن .. وهذا قرأته في فتوى للشيخ الفوزان ..


الحريم يا حبهن للحتسي والبربرة كل وحدة تقل قصة حياتها .. والقهر اللي تجيب عيالها المزعجين اللي يبكي واللي يلعب .. وكم مرة إمام الحرم الشيخ السبيل بعد صلاة العشا ينصحهن يقول لا تجيبون عيالكم لأن الإمام ما يقدر يركز في صلاته ولكن لا حياة لمن تنادي ..

مره وأنا أصلي بالطابق الثاني في الحرم صلاة التهجد والشريم يقرأ هذه القراءة اللي تشرح النفس .. وفي أطفال مزعجين يلعبون بسيارة لاسكلية .. والله ما قدرت أخشع في صلاتي ولا قدرت أسمع الشيخ والأم تضرب عيالها .. الحرم منتزه للعوائل مهزلة وربي .. مع الأسف الناس ما يستشعرون حرمة هذا المكان ..

واللي يجلس مع زوجته وعياله داخل الحرم ومعهم دلالهم كنهم في منتزه .. والقهر أنه يجلس في قسم النساء .. ما يخجل ..

الكلام يطوووول ..

<<== قالت قصة حياتها

الريم أنتي كذا

أختك

تذكار[/align][/align]

[الجازي]

[align=center]عزيزتي سكون ,,,

هلا بك ,, وعز الله انك صدقتي ,, باقي البزورة وحوستهم بس مثل ماقلت لك ,, الباقي يبيله قعدة خالية من الزوالة

وعموما المسجد اللي صليت فيه أزين مافيه إنهم عندهم قحط في عدد الأطفال يعني ماتعرضت لازعاجهم هالسنة

في انتظار عودتك يالغالية ,,[/align]

[ديمــــه]

[align=center]الريم

جزاكِ الله خير
وللاسف فعلا هالاخطاء منتشره كثيراً
يعطيك العافيه

ديمه[/align]

[الجازي]

[align=center]أخوي دواس ,,

عندنا وعندكم خير ,, بس أتوقع أنتم أخف بكثير

شكرا لمداخلتك ,,[/align]

[الجازي]

[align=center]الغالية تذكار ,,

يعطيك العافية على هالملاحظات القوية ,, والحرم يبيله موضوع لحاله ,, كأنك في عالم ثاني ,, الناس من كل جنس ولون ,, وخذي من الطبايع اللي مدري من وين جاية ,,

على قولتك اللي ماخذها تمشية وسعة صدر ,, واللي كنه قاعد في بيت أبوه ,,

واللي تلقينها نايمة في الدرج والعالم مايعرفون كيف يمرون ,,

عسى ربك يفرجها ياشيخة ,,

وجزاك الله ألف خير على فتوى الفوزان الخاصة برفع الإصبع ,, كنت أدور على حكم هالتصرف من زمان ومالقيت عندي شيء ,,

بورك فيك يالعزيزة [/align]

[الجازي]

[align=center]الغالية ديمة :

واياك عزيزتي ,,

وسالفة انها منتشرة ,, هذي مايبيلها كلام ,, بس المشكلة كيف نعالجها ؟؟

شاكرة مرورك أيتها الكريمة[/align]