[align=center]على طاري المدرسه اللي تبي تبداء باتسر
طرت علي مدرستن من هالسنين هنا بالمضايف ( مادري انتم تاعونه ولا لا )
هالمدرسه كانت قسمين حريم ورجال
تدرون وشوله ابلشكم اخليكم تتابعون تفاصيل هالمدرسه
مدرسة المضايف للبنين :
به قطعة مدرسين ( عدة )
1/ ابو غازي
مدرس الحساب ( الرياضيات )
ويدرسهم على الناقص والزايد والعدد من واحد الى عشرين
2/ اخو سعدى
هذا مدرس العلوم
وكل حصه ذابح ذبيحه علشان يوريهم التسبد والطحال والمعده
وغيره من اجزاء الجسم ( ويحصلهم بتالي الحصه حميس وشوي )
3/ راعي الوقيد
هذا مدرس الاجتماعيات ( التاريخ والجغرافيا )
بالتاريخ يعلمهم بسوالف اهلهم ومغازيهم
والفلان وين يرجعون والفلان وين يرجعون
وبالجغرافيا يعلمهم اهم الشعبان والحزوم بالمنطقه
ويعلمهم متى يبدا الوسم ومتى يبدا القيض والصفري
4/ ابو مقرن
هذا عاد مدرس الرياضه ( مامن رياضتن تسوا العنوه )
يلعبون طرحي وزقطه ( ويحطون نيشان ويتطوشونوه )
وهذي هي المواد اللي يدرسونه بس
اما مدير المدرسه فهو بورائد
خادم لوه قطعة سنين بالمدرسه وخذا الاداره بذراعوه
يوم فززززززع اخوتوه على المدير اللي قبلوه ( مصري ) وهربوه
وصار هو المدير
اما الطلاب فهم
( شنقل,المخاوي,ذيب شراف,الفاضي,نبراس,متفاءل,عذب المشاعر,الشبث )
وكانوا نبراس والفاضي ومتفاءل وعذب المشاعر خوش طلاب وعاقلين
ويحلون واجباتهم وشاطرين بالحيل ( يتنافسون على الاول )
اما شنقل والمخاوي وذيب شراف
فكانوا مسوين شله بالفصل مسمينه ( شلة الذياب الهلتسانه )
ودايم جالسين باخر الفصل ويسوون ازعاج ويطبلون على الطاولات
ويغنون اكثر شين ( من ورا التنور ناولني الرغيف )
اما الفاهي الشبث فهو لا مع هذا ولا مع هذا
مسوي روحوه عربجي وهو ماعندك احد
ويتلزق بشلة الذياب الهلتسانه يبي غديهم يخلونوه معهم
والشباب استغلوا هالمسيكين وقاموا يرسلونوه نوبن يسرقلهم
ونوبن يحل لهم الواجبات ونوبن ياطا رجلينهم بالفصل
الوكاد مره سعلوه مدرس الرياضيات ابو غازي
قال عشره ناقص عشره كم
قال مادري
قال ابو غازي عندك عشر خرفان بالشبك وبعتهن كلهن وش بقي عندك
قال بقي الشبك!!!!!!!!!
مدرسة المضايف للبنات..
هذي بعد به قطعة مدرسات ( ابلات )
1/ شموخ
تعلمهن القرايه والكتابه
وتعلمهن نقش الخضاب ( الحناء )
ولم الشعر ( تصفيف الشعر )
2/ تركواز
تعلمهن الخياطه ( وشلون يرقعن الثوب )
3/ ريم شمر
تعلمهن الطبخ
ومن طبخاته المشهوره الجريش والمرقوق والتشريب
والكبسات بانواعه
كذالك تعلمهن طبخ الذبايح ( تحسبا لاي كرمه مارقه )
اما الطالبات فهن
( الريم,الدهور,تذكار,السطامه )
وكلهن كانن عاقلات
بس بوقت الطلعه يقمن يتقرطن العيال
وطايحاتن بقصه هكا الوقت معلمتهن له ابله شموخ وهي لم قرنين
( تغدي الوحده تقل اذان جرون مرمي )
وهالمدرسه ماكانت تراجع وزارة المعارف ولكن تراجع التعليم العالي
لان مديرهم بورائد بينوه هو ووزير المعارف حارش مارش
ولهو مدانيه فلذالك مايراجعوه
وهالمدرسه كانت تعتبر اهليه لان النجاح شبه مضمون ( الا عاد واحد مايفتهم هي نوبه )
وكانت رسوم التسجيل ريالين ( ولو تجيب للمدير جريده سجلك )
.
.
.
.
.
.
.
.
.
.
.
.
.
.
.
.
.
وعقب عشرين سنه
.
.
.
.
.
.
.
.
.
.
.
.
.
.
.
.
.
.
تم تقاعد جميع المدرسين والمدرسات
اما الطلاب
فقد تم ابتعاث نبراس وعذب المشاعر للخارج لاكمال دراستهم
والفاضي مدرس باحد المدارس بحايل
ومتفاءل مهندس في احد الشركات الكبرى
وشنقل وذيب شراف والمخاوي بعد ماخلصوا من سادس سجلوا جنود
ولهالحين ما ترقوا
اما الشبث فعاد الى نفس المدرسه ولكن كحارس مدرسه
والطالبات ..
فقد اصبحن ربات منزل ( وبعضهن صارت جده )
الله يطول عماركم جميع ويرزقكم الذرية الصالحه
وعفوا على الاطاله
وتقلدوا تحية اخوكم الشبث [/align]
رد مع اقتباس
ههههههههههههههههه 
مشرف مضيف الترحيب والتعارف
المفضلات