[align=center]بواحد من هالالمبياد اللي قابستن عجاجتوه هالايام في
احد البلاد ( احلى الولد مايبي يسوي دعايه ) كنت مشارك
ولكم قصة مشاركتي .
كنت وليد على اولي بدوي اسرح بالغنم اروح الصبح قبل تطلع الشمس
ولا ارجع الا مع الغياب
وفي احد الايام كنت الحق الغنم وهو يصوتلي واحد
وانا اقف
قال الحق جاي قلت الحق انت
قال اقول تعال لا امردغك
وانا اجيه
قلت انت منهو ؟
قال انا مسؤل في الاتحاد السعودي لالعاب القوى
واسمي ذيب شراف
قلت حياك الله ( انا ما فهمت الا السعودي )
قال وانا جاي ادور على المواهب اللي مثلك
قلت الزم حدودك مواهب حضرتك
قال ياحووووول
يابن الحلال وش بلاك هذي زينه
انا ابيك تمثل السعوديه بالسباق وتفوز
وتاخذ فلوس وتشري ثلاث مية راس غنم
( يحاتسيني على قد عقلي )
الوكاد انا خشيت جو
قلت مايخالف بس متى السباق
قال اجيك بعد يومين وتروح معي بس علم اهلك
ويوم رجعت لاهلي وانا اسكت واقوم افكر
وعقب يومين جاني ورحت معوه للرياض
ودخلنا بلنا ديار
وهو يدخلن بملعب يمار هاكا الرجل لابس فنيلة علاق
وسروال خضر عليه خطين بيض
وهو يجينا قال ذيب هذا مدربك اسموه شنقل
وحنا نتسالم
قلت اما التدريب مابيه
قال الكبتن شنقل
لا يالشبث لازم تمرين علشان عضلاتك تكون قويه قبل السباق
قلت انا يا واحد مابي عضلات انا كلي عصب
الوكاد اقنعتهم ورحنا وتعللنا عند شنقل
ويوم جاء يوم السفر للديره اللي به السباق
وانا اركب بالطايره مع الكبتن شنقل يميني
والاداري المسعول ذيب شراف على يساري
وهي تطير الضحوية ويوم جاء المغيرب قبل الغياب بشوين
يمار حنا واصلين
مار ماوصلنا وحنا نعرف الناس
وصلنا منتهين من التعب
وهم يودوننا يم غرفنا وحنا نجلس بهن شوي
وعقبه بربع ساعة الله يجيرك ما تسمع الا الشخير
ويوم قعدنا من باتسر وهم يجوننا وياخذوننا انا ومرافقيني
وهم يودوننا للملعب المخصص للتمرين يحسبوني افتهم
ويوم نزلونا وذلفوا قمنا نتمشا بهالعشب اللي
من سنة الربيع الطيب ما شفت مثلوه
الوكاد مالكم بالطويلة يوم جاء يوم السباق الظهر ( السباق المغرب )
وهو يقوم شنقل ياطا رجليني
وذيب شراف ياطا بطني مهو بطني قصدي يهمز متوني
ويوم طبيت الملعب يمار الجماهير ياكثره
وانا انخرع وهم يعطوني ملابس قالوا البسه
قلت والله مالبسه
قالوا ليه قلت مهو انا اللي يطلع وروكوه عند هالعالم
تبوني اسابق اسابق بثوبي
قالوا مايخالف انت بس انجز علينا
ويوم صفينا يمار الجمهور كلوه يشجع واحدن امريكي
وانا ما يشجعن الا خوياي
الوكاد يوم انطلقنا قال شنقل هو وذيب شراف ( يوم شافوا الامريكي فز قبلي )
الشبث لعيونه
يوم سمعتهم وانا اعض شليلي وانا اطير عن رحمة الله
وانا احفر حفرة بمكاني من سرعة الفزه
الوكاد يمار رجليني يالله يلمسن القاع من السرعة
واذا لف المضمار ما يردني الا المدرجات
الوكاد وانا اصل قبلهم وانا اقع عند خط النهايه
وهم يجوني خوياي ذيب شراف وشنقل
وهم يقومون يصبون ماء على رجليني
وهن يقومن يدخنن من الحرارة
وحنا نتحرا التتويج ( ضامن الولد )
يمار الامريكي الاول والثاني مدري وشو والثالث ..
افا ليه
قالوا انت اخطيت بشيين
الاول انك ما تقمز الحواجز
والثاني اطلع من مساري واصفق بالمدرجات ( يحسبوني استهبل )
وانا افلس من الجوايز وانا ارجع
وتقلدوا تحيتي[/align]
رد مع اقتباس
مانت بسيييط 
مشرف مضيف الترحيب والتعارف
المفضلات