خطبة العيد ... وش صار تاليها ؟؟؟؟

**محروم** · 12-08-2004 02:22

السلام عليكم ورحمة الله وبركاته
مسيتم بالخير
حياكم الله
ابقول لكم سالفتن حتساه شايبن ... والسالفه هذي مبطيه
يقول الشايب :
طرشت لحدى القرايا ( نخفي اسم القريه لزوم الخصوصيه )
وحنا يوم العيد ( ماحدد اي عيد كانهو عيد رمضان او الضحيه )
كان ماهو عيد رمضان وهو عيد الضحيه مامن غيرهن ( للمعلوميه )
يقول الشايب صلينا وعقب الصلاة قام الخطيب وهو يسج اكالخطبه
ويقول شايبنا وانا اعاد اتحرا الخطيب يخلص ابسلم عليه واعايدوه
لحيثنه بينهم معرفة قديمه
وبالخطبه الثانيه قال الخطيب : اخواني حنا يوم عيد والعيد تجديد
اللي بينوه وبين احد خصومه يسلم عليه وادحروا الشيطان وسلموا على بعضكم
ايه ومن هالحكي الزين
يقول شايبنا وانا اتحرى الخطيب لاخلص من خطبتوه ودي اعايدوه
ويقول : والله يوم خلصت الخطبه وانا اقوم يم الخطيب
والا دونوه اكالظول حولوه وانا ارتخي شوين قلت لاانفكت هالناس حولوه
غدينن اسلم عليه
ويقول والله والا الظول كل مالوه يزود والله وان السالفه ماهي سالفة سلام
اخو ابوي ؟؟ الناس تحجز وناس تفزع وش سالفتهم ؟؟
ويقول شايبنا والله وانا اندعس بين هالزحمه وانا اتغلغل بينهم
ويقول وانا اشوف الناس تحجز الخطيب والخطيب يتفلت عليلوه واحد اخر
ويتهددوه
والا الخطيب يلعن ويشتم ويقول والله ياملعون ابو الجدف ما تروح باه هين
والا بشتوه طايحن بالقاع والخطيب مفرع ومفسر ذرعانوه
ويبي يشابط والناس تفرق وناس قاضبين الخطيب وناس قاضبين خصيموه
ويقول شايبنا وانا انشدلي شايبن بصفي وش بلا خطيبنا وش علموه ؟
قال هذا الخطيب يتهدد خصيمن لوه لحيثن بينهم خنقتن مبطيه والخطيب يبي يتقاضا
يوم يدبونه ...............
نتوقف هنا ( لزوم الخصوصيه طبعن ) ......
وسلامتكم
اخوكم : المحروم