[align=center]بسم الله الرحمن الرحيم
السلام عليكم ورحمة الله وبركاته ها قد عدنا لكم بعد الغيبه
وجتكم اترنح من كثر السوالف اللي عندي لكم ( مالي لي ست عدول سوالف )
اخواني اخواتي على قولة الشاعر القديم
ان انت لم تعــــشق وتـــعـرف ما الهوي *** ولم تـــبكي صـــبابــــة وتــدمع دما
فأنا اشهد انه ماعندك من السوالف*(ى) *** ماعند بعض الناس اللي ببالي **(ا)
* الالف المقصوره هذي على شان وزن البيت
** وهذي مثله بعد
8
8
(والله من السنع)
يا الربع ترونن عشقت وعشقتي هذا قصد به واحدن لي والا انا ماني قصاد
قال به :
لي عشقة مثل الطماطم عيونــه *** والايا ضحكت مثل المساحي ثناياه << (عطاكن الّلي)
اطلب من الله الناس لا ينحتونه *** ماشفت انا مثله ولا ريت حــــلياه << (هلا والله)
هذا هو وصفه اما اسمه ياهولي ياهولي من اسمه وترونن ما انا معلمكم بوه << (لأسباب أمنيه)
وصارت من السوالف قومتن وقعده بس ابي اعلمكم بالزين والشين اعذرونن عاد
في يوم من الايام صار عند اهل عشقتي عشاء وهم مشتطين وانا معهم ( قطة وجه ) من الصبح وانا اودي واجيب واخذ واعطي لا وحتى بعض الناس انا اللي اروح لبيوتهم واعزمهم على العشى ( على فكره تروا عمري
اكا الحين حول عشر سنين ) و (وعلى فكره بعد تروا عمر عشقتي اكا الحين حول ثمان وعشرين ) مامن فرق
صح المهم تروا انا مدبتس مع العالم ولا ادري وش السالفه حقت العشى اذن الظهر وانا ملعلع اودي واجيب
وعقب الصلاة طلع ولدهم يبي يجيب اغراض من الدير وانا اتعوتل بباب السياره ابي اخاويه والله وهو يكرشن
تخبرون عاد الروح الرياضيه اللي ماتندم عليه الا بعد مده مديده وعلى قولة الشاعر:
والله ما انسى اللي عطاني طراقه *** الله يلعن نوب تحسين الاخلاق
يوم ان ربعي تعلموا بي الحلاقه *** لين استوى راسي على موس حلاق
المهم ان اهلي يوم شافوا حالتي قضبونن وصكوا على بلي غرفه ولا طلعونن الا بعد العصر
وفجاءه جانا منهم مرسال يستفزعوننا قالوا سرندل الغاز تبي تقضي والولد راح للديره ولا جاء ليا الحين وتسان
عندكم سرندل نبيه وانا اطير على طول للمطبخ وانا اتجود باللي حق الغاز ابي امصعه مجوده بيديني وحاط
رجليني على الاسطوانه وانفلتن يديني وانا اجيك محول على دمجتي بالقاع وانا اقوم على طول ( من زود النذخ)
وانا اعض الهوز بسنوني وانا اجره يا ما انملص القفيز اثارينن ما سكرت الغاز وعلى ما طلع الهوز من الساعه
وهو يقوم الغاز ينفخ وانا تصعطته وعلىطول جضعت السرندل وقمت ادربيه لهم ويوم اقبلت على بيتهم فكرت قلت الحين يا مني دخلت عليهم وانا ادربي السرندل يبون يقولون ها اللولد مابوه حيل وانا ازدخ السرندل من
القطع الكبير على متني وهن يشركن عيوني من ثقله وانا اتكرفت عليهم بالمطبخ والسرندل على متني وعلى
مادخلت يامار الناس يصايحون علي نزله نزله اتارينن كاتمن نفسي من تصعطت الغاز ببيتنا وانا ما تنفست
الوكاد اني جدعت السرندل من الموت الحمر وهي تنهج تدربى يم القدر اللي يطبخون بوه العشى يامار الدنيا
منكبه والمفطحه راحت تمزلح على جنبه بالبلاط والجنوب يبترمن والمرق انكب والحالة حاله واخر كلمه
قبل لا انصفر ( فود عوجان ) والسبب اللي خلانن انصفر ماهو قلت التنفس السبب ان عشقتي هي اللي قالت
ها اللكلمه وبصراحه صار عندي انصدام بالنفسيه من ها اللكلمه ( اللحين على شان حمار عيونه مسوين ها
الفوضى كله وهي تقولي كذا ) الوكاد اني ما وعيت بروحي الا وانا ببيتنا ويرشون على وجهي ماء .
واخيرا اكتشفت بعد مده ان العشى لخطاطيب جاينن يبون عشقتي .
وانهم وافقوا وعطوهم .
وصارت سوالف بعده بالعرس ابي اذكرهن بعدين .
الوكاد ما ابي اطول عليكم .
والوكاد اللي يقدر يعد كلمة ( الوكاد ) بموضوعي له جايزه
مع التحيه –( برق النفود)-[/align]
رد مع اقتباس
[/align]
المفضلات