كليمتن عقدت شنقل

**شنقل** · 06-06-2004 23:47

يالربع قللبته يمين ويسار وشنقلته
وكايزته مكايز ونشدت

عنه محدن عطاني جواب

نصه الاوله عرفته

ونصه الثاني ماعرفته

حلوه هههههههه

ماطول عليكم

الكلمه هي
0
0
0
0
0
0
0
0
0تبطي عظم

تبطي وعرفناه

بس عظم هاذي منين جايه مدري

اللي يعرف يعلمن

تحيات مشنقله من

شنقل

**سلطان الشمري** · 07-06-2004 00:24

[align=center]شنقل..

والله لتبطي عظم اسأل عنها الدهور...والريم ..وشموخ..

وعند جهينة الخبر الاكيد..

وانت هذا كبرك وابوك يعطيك كل صبح فسحه ريالين واذا انطنخ ثلاثه ..وتدرس ...وتحل الواجب..

وشطور وحليو..وما تعرف تبطي عظم...

خلاص ارجع لكتابي ...الكلام المفيد في ما جاء عن الحوايل من تجديد

ص72 المجلد8...السطر الثاني...تبطي عظم..وانزل تحت للحاشيه تحصل معناه..

بس لا تعلم احد بها السالفه...

تحياتي..[/align]

**شنقل** · 07-06-2004 01:36

نبراس مساك الله بالبراد
يافلان عمري ماتفسحت بريال ولا ريالين
أعلمك وش فسحتي بس ماتعلم أحد

ههههههههههههههههه

مصليه مدهونه ( ولها اسم اخر تسمى منغوز)

ههههههههههههههههه
ومن زود الطناخه حاطه بمخباي ونتخانتق انا وخوي شمقل عليه طبعا مامن غسل يدين
(انواع المشق) واغسل يدك اننا نفرش سنوننا

المهم

نكورب لمحور حديثنا
نبراس والله انك عجبتن من العجب الحين انشدك عن معنى تبطي عظم
تقولي تبطي عظم واسأل الحريم (الدهور والريم وشموخ)
تخبرن يافلان انا حياوي وبي الحياء مكوم
سانك تبيلك خيشتين حياء ابشر ارسلهن لك بسابتكو مع اخوي شمقل
وهو رايحن بليا حجن بحاجه

فاصل(برحه) اعلانيه
ما سمعت هجينية عمرو دياب
أنا عايش ومش عايش

من كلمات خيي شمقل

ياخوي وش معنى تبطي عظم

لو بالاوردو او اليورو

اكرمكم الله ويعله حالن واصل
ههههههههههههههههه

عاش واقف

تحياتي لك

شنقل

**شموخ** · 07-06-2004 02:17

مقطعكم الحياء ،

ياكبر هولهم وجورهم .....

الحين انتم اللي معلمينا معنى تبطي عظم تسألون عن هالمعنى p...

تبطي : ماخوذه من ابطأ يبطي اذ تأخر في الشي .
المصدر شرح ابن عقيل ..p
عظم . من عظم من العظام اذا خليت من اللحم . المصدر لسان العرب

وبجمع هاتينن الكلمتين يتضح لنا المعنى سوف تتاخر ولن ياتيك شي او خبر ...

وصل المعنى والا اعيد الدرس ....

ترى مااحب يتنح الطالب عندى بعد مااخلص الدرس يقول عيدي .

تحياتي ياشنقل " اسم غريب " الا وش معناه هذا "

شمـــــــــــــوخ

الغثه · 07-06-2004 02:20

سؤال رائع اخوي شنقل

واذا لقيت الجواب ارسله لي خاص ياخلف ابوي

تحياتي

**ابو خليف** · 07-06-2004 05:03

تبطي عضم

يعني والله ان ينشف لحمك لحد ماتومت ولا يبقا الا عضامك ما حصلت الي تبي

فهمت

هذا التفسير من كتا ب

(ابو خليف في مفردات الصيف)

وتبطي عضم انك تلقاه

لاه مايوجد الا بمكتبة
ماني قايله خلك تبطي عضم

ككككككك

**اخو سعدى** · 07-06-2004 08:44

[align=center]شنقل ..

والله تبطي عظم ..
تبطي يعني منذ مبطي ..
مبطي .. اللي توه ما جاء يمشي شوي شوي
والشوي هو الشوين ..
والشوين اللي اذا حرشته قمز بوجهك
والوجه هي ديره .. فوقا من ام اذن ..
والاذن .. فيها عظام ..
والعظم .. ما يوكل .. تبطي عظم ما تاكله .. يمكن يعرش بس ..

ها وش وقع كلامي .. هههههههههههه[/align]

**مفتاح14** · 07-06-2004 11:23

المشاركة الأصلية كتبت بواسطة شنقل

فاصل(برحه) اعلانيه
ما سمعت هجينية عمرو دياب
أنا عايش ومش عايش

من كلمات خيي شمقل

ياخوي وش معنى تبطي عظم

لو بالاوردو او اليورو

اكرمكم الله ويعله حالن واصل
ههههههههههههههههه

عاش واقف

تحياتي لك

شنقل

^
^
^

رد ينبئ عن مولد (ملتمس) جديد بفلة الحجاج

تصدق ان اسمك رومنسي ومن زود الرومانسيه ان اللي يقراوه يحس بتكّاك بالحويصلات الرؤيه

نجي لمعنى (تبطي عظم) :
يقال والعهده على الراوي إن أول من قال هالجمله هو أحد البنائين يوم تاخر عليه راعي العماره بالدراهم زعل وتربع عند عتبة الباب وصرخ بأعلى صوته: (تبطي عظم)

يعني بدون لياسه ولا دهان ولا كهرباء فماكان من راعي العماره الملويّه الا ان يخرج مبلغا من المال ويصفق بوه البناء بالجبهه

فأعجب الناس بذكاء البناء وحسن تصرّفه واصبح هذا المثل متداولاً الى يومنا هذا

<<-- ماودّكم تنزلون عندوه مواضيع به اسئله لأنه ماشاء الله عليه من النوع اللي مايبحل به

كان ودّي أسأل محارش عن المعنى بعد ما لمحت واحدن مثل زوله يتمخطر على مقربة منا ولكن خفت انه متلاقطن هو ومديروه على هالصبح همّن عاد تجي الطقّة براسي

تبطي عظم

**محارش** · 07-06-2004 13:27

فصل في الكلام المستورد

قال محارش بعد ان فرغ من اداء واجبه ( ما اظنه يخفاكم )

سيادة مقام شنقل (( شنقلت بالخير والعافيه ))

لما قرأت استفهامك عرفت اهتمامك , فالعرب لا تخجل من السؤال ولكنها تخجل من عدم الجواب ( امحق )
قيل له : وش قصدك ؟ وخل عنك التعالي الله يرحم والديك !!!
قال محارش : الشرهه علي اللي مراتسيك ثم زعل ورضي من كيفه ثم اكمل كلامه وقال اعلم يابني ان العرب عاربة ومستعربه والبدو بدو (ن) ومتبدوين والحضر حضر وحيضران متحضيرين .
وما اتانا من جمل غير مفهومه وكلمات مادري وش تسنه الا نتاج اختلاطنا بأقوام اخذت مهنهم منهم كل مأخذ وما يغثن في الدنيا الا كلام اصحاب المهن عن مهنهم فلو جمعتك الشبة مع مدرسين فسيتظلمون اليك من مديرهم وانه اعطاهم حصصا اضافيه وانه لا يقدر مجهوداتهم , وابتلاشهم بعيال الناس اما ان جلست الى عسكر فهم يبون يدبلون تسبدك بسوالف الخفارة وحصة الصباح وقد يبهرون السالفة ببعض التوابل عن قصص تجيب الهم عن خوياهم المقضمين ( وكأنهم يتفاخرون بذلك ) اما ان جلست الى موظفي ارامكو ( بغيت احشهم فتذكرت كثرتهم وحاجتي اليهم من سلفة ونحوها فذكرت الله وعينت خيرا ) فهم سيتكلمون عن فلنجتن ليّكت وسبرنتدنتن متغطرس وابريزال تعبان اما موظفي الكهربا فكل كلامهم عن حظ موظفي ارامكو خخخخخخخخ

وما اسهبت الا لتبيين وجهة نظري حيال ما نعلجه بألسنتنا من غريب القول المعتمد على مهننا.
ولو عدتم بذاكرتكم الى ايام الطفرة ستجدون ان اغلب الناس قد اصبحوا مقاولين فجأه .
ولو عدتم اليها ايضا ( معليش اتعبتكم بالريوَسه ) فستجدون ان اغلب الناس قد بدأو البنيان على كيس البنك العقاري ولان البنك العقاري خار ودقّر دفرنسه منذو امدن بعيدن جدا والمقاولين قد بدأو بنيانهم فهي لم تتعد العظم ولو بفتر

فبما ان اغلب جيل الثمانينات استمرأوا المقاولات ثم توهقوا فقد كانت سوالفهم في شباتهم الآنفة الذكر كانت عن تحطم نفسياتهم بسبب ازمة البيوت العظم والتي لم تسعفهم المادة لاكمالها .

سيدي الكريم شنقل :

كانت قمة الاحباط عندهم وصول البيت الى العظم .
ولكي يحبطوا غيرهم اطلقوا هذه اللفظة التي ليست من تراثنا ولا حاضرنا .

فتراثنا معتمد على بيوت الشعر اما حاضرنا فقمة الأمل ان نفكر بالوصول الى العظم .

ثم تنهت محارش تنهيتة مهنا قوّه وقال انكبوا الغدا مت جوووع

محبكم
محارش

**محارش** · 07-06-2004 13:39

ابو اربع طعش

وش هالطخمه يالغالي هههههههه
تدري عاد انا كاتبن ردي قبل الغدا ويوم جيت ابكزه ياهذا الغدا والله وانا اتركه على المعاينه ويوم كزيته الا نفس تفسيرك يعني القلوب شواهد ( ما يجمع )

تشااااااااو