سؤال ماله داعي عارفة !!

**ابو خليف** · 21-03-2004 08:02

انا حايلي متعصب

الفرق

ان لهجتناااااا مثل الثريااااااا ولهجتم مثل الثرى

وانتي احسبي الفرق الي بينهم

|118|

**مفتاح14** · 21-03-2004 08:33

كاتب الرسالة الأصلية : شموخ
[ALIGN=CENTER]
بس لاحظت على القصمان انهم بعد يقولون كلمة" نوم " يقصدون انه نايم اذا احد سأل عن شخص وهو نايم ردوا عليه بقولتهم ( به مير نوم ) لاحظته على عايله قصيميه عاد مدري القصمان كهم كذا والا بس هذولا .

تحياتي

شمــــــوخ [/ALIGN]

شموخ:
قصدتس ( بوه مير نيم) |118| ؟؟

===========

والله يالريم القصمان ماماشيتهم كثير الله يصلحهم:D

بس فيهم ميزه بالكلام انهم يمغطووون الكلمه ودرجة الصوت عندهم منخفضه ( أقرب للنعووومه:p ) بعكس اهل حايل.. اللي يميل صوتهم للخشونه;)

مثال للسؤال:

أهل حايل يقولون:: وشنوحوه هاللّون؟؟ |118|

اهل القصيم يقولون:: ورااااااااااااااااااو تسذااااااا؟

p

<<-- مجتهد بالشرح..كنّه مصري بدرس خصوصي:D

موضوع حيوي ومثير.. تروني حولكم ماني مبعد

تشااااااااااااااو على وزن ورااااااااااااااااااااو:D

**الجازي** · 21-03-2004 10:33

شموخ ,, اللي ودي أقوله قاله لتس مفتاح |118|

وبالنسبة للأفاظ اللي تعجزين ماتفهمينها |118| حطيها في قاموس الكلمات المستعصية مثلي :D تراني مثلتس بعض الكلمات أترجمها بالكلمات اللي تجي جنبها :p يعني ماهو لازم أعرف كل السالفة |118|

>>>>> طالعة معهم كني هندية ;)

عندتس مثلا الفريفر اللي يقولها ابو غازي :p هذي شكلها دعوة على الخفيف يعني ان شاء الله انها ماتضر :D

أبو غازي ,, وش مضيقن صدرك الحين ;) هذا بدال ماتفزع لنا وتعطينا الفرق عشان مانلخبط بينكم |118|

بعدين أنا أبي أتعلم اللهجة قبل ماأركب الطقم عشان أول ماأحتسي أحتسي حايلي |118|

تذكار ,, وش هالعشقة ؟؟

ذيب شراف ,, الحايلي المتعصب |118|

طيب وش الفرق بين الثريا والثرى :p >>>هذي اللي تبي ترفع ضغطك ;)

لا من جد يالذيب عطنا بعض الفروق اللي بين لهجتكم ولهجتهم ;)

مفتاح عز الله انك مدرس خصوصي أدد الدنيا ;)

والله ان شرحك ممتاز وما عليه كلام |118|

(( أهل حايل يقولون:: وشنوحوه هاللّون؟؟

اهل القصيم يقولون:: ورااااااااااااااااااو تسذااااااا؟ ))

صدقت والله هذا أقوى فرق مر علي إلى الحين ;)

شكلي أبفقع تسبد خويتي |118| وأكسب التحدي ;)

**مفتاح14** · 21-03-2004 10:57

[ALIGN=CENTER]8
8
8

عندتس مثلا الفريفر اللي يقولها ابو غازي هذي شكلها دعوة على الخفيف يعني ان شاء الله انها ماتضر:D

ايه هين ماتضر:p

هذا الله يسلمتس مايخليتس تنامين الليل.. وبالنهار بس تدوجين:D

يعني الله يعين الدرج(بفتح الراء:p) عليتس:D
كأني اشوفتس طالع نازله ..نازله طالعه<< جاب جديد:D ..

واكالساعه مايحتاج تسالين هو هذا الفريفر والا لأ؟:D

قبل انسى.. ودي اعرف ليه ايقوناتس اكثر من كلامتس

؟[/ALIGN]

**الجازي** · 21-03-2004 14:29

كاتب الرسالة الأصلية : مفتاح14
[ALIGN=CENTER]8

قبل انسى.. ودي اعرف ليه ايقوناتس اكثر من كلامتس؟

[/ALIGN]

^
^
^
^
الله يغربل ابليسك ,, ماتخلي شاردة الا وتلقطها ,, تصدق توني انتبه لأيقوناتي ,,تسنها لمبات مولعة بالموضوع :D

بس هذا وأنا أختك بسبب قل هرجي مانيب حايلية :p

**عبدالعزيز** · 26-03-2004 06:53

جيبي لتس عصابة وحطيه على الطاولة جنبتس لان احتمال وجع الراس يجيتس كبير
شوفي
سالفة ان اهل حايل عموماً لهم لهجة ماهي صحيحة
عندتس أهل الديرة لهم لهجتهم والقرايا لهم لهجتهم وحتى القرايا تختلف اللهجات بينهن قرايا الشرق يفرقن عن الشمال او الجنوب او الغرب
والإختلاف عادة يكون بتسكين حرف أو ضمه أو كسره أو مخارج النطق <<---- اهه قام يتفلسف عاد
المهم هاذي الامثال وتبين تعرفين الفرق بيننا وبين مطرسة اهل الكليجا هالقصمان اللي مدري وش محبب جمس الهيئة هاذي بهم
عندتس مثلاُ سيارات , بنات , كفرات , إلخ من الكلمات اللي تنتهي بالتاء
هاذي بحايل تتحول للياء والهاء ونقول سيارايه , بنايه , كفرايه (عسى مااوجعتس راستس:D)
وهاذي ماهي بالسنة القصمان ابد ولأهل حايل (الديرة)
وعندتس بعض الحروف اللي يتثقل نطقها على السنة الحوايل مثل اسم عبيد
انتم والقصمان تنطقون الباء خفيفة وحنا نثقله
وأقرب مثال لهالشي طبقيه على نفستس انفخي شدوقتس وطلعي الهوا بنطق حرف الباء راح تجي معاك ثقيلة
بس انتبهي لاحد يشوفك يقول انخبلت البنت:D
وهاذي للحوايل عموم
وفيه بعد عندتس حرف الجيم غالباً يدمج بقاف عندنا (يانا طلعت فضايحنا)
وبالعكس القصمان عندهم تمطيط الحتسي وحنا نجاكر اليمانية بسرعة حتسيهم

عاد تكفين نبي نشوف وش قالت هالصقيمية <----(الله منن الشفاية|513|)
وبلغيه تحايا مضايف شمر وقولي له يسلمون عليكم يالقصمان عموم وعلى اهل المليدا خصوص |118|
ولو كنتي تبين تسمعين اللهجة ممكن اسوي لك مقطع من حدى شيبان حايل وهو يسولف سالفة
عندي المقطع بس يبي رفع للمضايف

**الجازي** · 26-03-2004 14:28

عندتس مثلاُ سيارات , بنات , كفرات , إلخ من الكلمات اللي تنتهي بالتاء
هاذي بحايل تتحول للياء والهاء ونقول سيارايه , بنايه , كفرايه (عسى مااوجعتس راستس:D)

هذي يبيلها قعدة :p,, وشلون تحولت التاء عندكم بقدرة قادر لياء وهاء :D,,, بنايه >>> تنطقها مثل نطقك للبنايه اللي هي العمارة والا لها نطق يختلف

يعني الله لايهينك اذا نويت تصك راسي مضبوط حط حركات على الكلمات عشان أستوعب الوضع ,,

بس وربي ولو حلوة ,,

وعندتس بعض الحروف اللي يتثقل نطقها على السنة الحوايل مثل اسم عبيد
انتم والقصمان تنطقون الباء خفيفة وحنا نثقله
وأقرب مثال لهالشي طبقيه على نفستس انفخي شدوقتس وطلعي الهوا بنطق حرف الباء راح تجي معاك ثقيلة
بس انتبهي لاحد يشوفك يقول انخبلت البنت:D

عاد وشوله كل هاللفلفة ,, اختصر الطريق وقل حطي عليها شدّه ;) >>>>مثقفة البنت :p

يعني خل نفخ الشدوق لوقت الازمات ,,

وفيه بعد عندتس حرف الجيم غالباً يدمج بقاف عندنا (يانا طلعت فضايحنا

)
وبالعكس القصمان عندهم تمطيط الحتسي وحنا نجاكر اليمانية بسرعة حتسيهم

الجيم تنطقونها يعني زي الدواسر :D بدال الجيم قاف ,,والله انك ترجمت كل اللي سمعته بالاشرطة من حتسي هالحايليين ياحبيلهم ,, والله رهيبين الله يعطيك العافية اخوي عبد العزيز ,,

عاد تكفين نبي نشوف وش قالت هالصقيمية

<----(الله منن الشفاية|513|)
وبلغيه تحايا مضايف شمر وقولي له يسلمون عليكم يالقصمان عموم وعلى اهل المليدا خصوص |118|

هي ماهي قصيمية ,,لو انها قصيمية كان عرفت الفرق ,, وسلامك ابشر يبي يوصل لها وابدور لي قصمان من اهل المليدا عشان أوصل لهم سلامك :p

ولو كنتي تبين تسمعين اللهجة ممكن اسوي لك مقطع من حدى شيبان حايل وهو يسولف سالفة
عندي المقطع بس يبي رفع للمضايف

ياليت والله ,, تسوي بي معروف لو تحط المقطع ,,,

يعطيك ألف ألف عافية أخوي عبد العزيز على هالفزعة ,, أول مرة أحس إني أبفحمها ,, ياخي رافعة ضغطي هالادمية الا كلامها هو الصح

**عبدالعزيز** · 27-03-2004 02:03

اللي اشترى لك حورنيات والمقناص خليه يشتري لك (تاريخ وقصص الآباء والأجداد) للراوي عبدالرحمن المرشدي
وبتدعين لي
لهجة الراوي حايلية100%
لدرجة ان بعض مفرداته آخر ماسمعتهن من جدتي قبل ماتقلش الله يرحمه

واذا ماحصلتيهن ارفع لك الملف (حاس ان ابوسلطان بيعطيه احلا بوز من كثر مايرفع على المضايف)