البارحة جاوبت لي حس عاوي
ــــــــــــــــــــــــــــــــــــــ ذيبٍ عوى لجيت بالحس وياه
ذيبٍ يجر الصوت حسه خلاوي
ـــــــــــــــــــــــــــــــــــــــ ياقلبي اللي جاوب الذيب بعواه
والصبح بانت في ضميري هواوي
ـــــــــــــــــــــــــــــــــــــــ صوتٍ زعجته ليت خلي توحاه
يادار ما شفتي ظبي المطاوي
ــــــــــــــــــــــــــــــــــــــــ أتلى علامي به غشنّك رعاياه
أنا على شوف الحبيّب شفاوي
ــــــــــــــــــــــــــــــــــــــــ ـــــ كانه هنيّا علميني بممساه
قالت لي الأوطان جلّع ضحاوي
ــــــــــــــــــــــــــــــــــــــــ ـــ اليوم راس الرجم هذا توطاه
أمسى بهذا وأصبح اليوم ناوي
ــــــــــــــــــــــــــــــــــــــــ ــــ يتلى سلف بدوٍ بعيدٍ معشاه
كشف لهم برقٍ سديدٍ عشاوي
ــــــــــــــــــــــــــــــــــــــــ ـــــ يخيّلونه حول خشم المسناه
يبون مرباعٍ بهاك الحراوي
ــــــــــــــــــــــــــــــــــــــــ ليا زاف زملوقه وشبعة رعاياه
إخذ الخبر ما هو بخرص وهقاوي
ــــــــــــــــــــــــــــــــــــــ أعطيك علم صويحبك وين تلقاه
أدنا مرابيعه بخشم الصداوي
ــــــــــــــــــــــــــــــــــــــــ ـ وبيوت مقياضه بقرية إمبناه
مير إطلب الله لو صوابك مخاوي
ــــــــــــــــــــــــــــــــــــــــ ـــ كم واحدٍ قبلك عشيره تمناه
يالعين ما تنفع كثير الشكاوي
ــــــــــــــــــــــــــــــــــــــــ إلا على اللي دبر الغيث وأنشاه
ياونتي ونة وحيدٍ جلاوي
ــــــــــــــــــــــــــــــــــــــ اللي سبب دينه من أقرب دناياه
ولا خلافه من يحل الدعاوي
ــــــــــــــــــــــــــــــــــــ ليا صار ربعه منه تبي المقاضاه
عليك ياللي لك بقلبي مكاوي
ــــــــــــــــــــــــــــــــــــــــ ــ ثلاث ردعاتٍ هوادي وعرقاه
عقبه فقدت من المنام الحلاوي
ــــــــــــــــــــــــــــــــــــــــ حتى متاعي قامت الكبد تجفاه
يا ليمي يا عل ما لك عراوي
ــــــــــــــــــــــــــــــــــــــــ ـ بلاك ما ولعك بالحب حلياه
من لا يعرف الحب عنده دعاوي
ــــــــــــــــــــــــــــــــــــ يشره على راعي المحبه ويشناه
يقول هذا في مماشيه غاوي
ـــــــــــــــــــــــــــــــــــــــ وحنا ندل الدرب والحمد لله
يالله عسى مثله كثير الهزاوي
ـــــــــــــــــــــــــــــــــــــ يِبلا ببلوى من لسانه تهزاه
حتاه يدري إن المحبه بلاوي
ـــــــــــــــــــــــــــــــــ ليا شاف مثل اللي من الولف شفناه
عساه يدرع في محبة حياوي
ــــــــــــــــــــــــــــــــ حب الهنوف اللي يحده على أقصاه
تفري ضميره فري دلو الرواوي
ـــــــــــــــــــــــــــــــــــ اللي ضربها الجال من حد ملقاه
ليا لجلجت له بالنظير السهاوي
ــــــــــــــــــــــــــــــــــــــــ كلامها لبيه عن قولةٍ هاه
كلامها للقلب مثل المداوي
ـــــــــــــــــــــــــــــــــــــ اللي عرف علة مريضه وداواه
يا ربي إني بالتفاتك رجاوي
ــــــــــــــــــــــــــــــــــــ تلم شمل الولف من عقب فرقاه
لو تنفع الفزعات ولا النخاوي
ــــــــــــــــــــــــــــــــــــــ على المحبة كان كلٍ نخيناه
مير الرجا والياس صار متساوي
ـــــــــــــــــــــــــــــــــــــ يا قلبي إصبر في تدابير الآله
لو كان حالك ما بقى له شلاوي
ـــــــــــــــــــــــــــــــــــ ما دبّر الوالي على العبد يرضاه
الشاعر / مرشد البذال ( رحمه الله )
رد مع اقتباس
المفضلات