شيخ الروله ......... وشيخ شمر

**سحابة صيف** · 26-12-2001 14:50

الاخ ابويزيد مراقب قصة وقصيدة
اللة يعطيك العافية على هذة القصة التي تدور رحاها حول الشجاعة
والسلوم الحلة القديمة
كما فعلها هذا القايد احد شيوخ شمر

**ابو يزيد** · 26-12-2001 19:58

اخوي/الوسي

السلام عليكم ورحمة الله

تشكر على طرحك المتميز وقد قلت يااخي:

((عموما الروله معروف عنهم الطيب والشجاعه والصدق واللي عرفت منهم اثبت هذا الشيء))

انا:
اشهد بالله ان كل ماقلت صحيح والرجال اول ماينقصون من قيمة فعل الرجال مثلهم.

ويعدونه لو هو عليهم والله يرحم حالنا هالحين.

اما قولك:

((بنيه الجربا فلاشك انه مغوار وصنديد
وفارس لايشق له غبار))

وهذا لايختلف عليه اثنان
\r
اما قولك:

(( يابو يزيد الله يعينك . انا واثق انك بتستفيد من هالمضيف فوائد وقصص مستقبليه

. والا عندي احساس انك تحضر هالقصص بصعوبه

لكنك انشاءالله قدها .
وودي من الاخوان بدل مايطلبون منك قصص انهم هم يبحثون ويعرضونها لتعم

الفائده والنفع والكل بيستفيد . والا اذا تركناها بس عليك ماراح نستفيد شيء .))

كلامك في مكانه وصائب 100%

اما بالنسبة للقصص بالعكس سهلة جدا ولا اتكلف ابد فعندي مصادري الخاصة

ولعلمك لااطرح الا القصص التي اتوقع انها صحيحة 99.9%

ما بالنسبة لبحث الأخوان وطرحهم فجزاك الله 1000خير كلامك في مكانه ايضا وهذا ماارجوه.

اخيرا مداخله رائعه وارائك تبيض وجهك الله يعافيك هذا الكلام اللي يجمد على

الشارب والله لايهينك اسعدتني بطرحك الرائع.

وتقبل تحياتي

اخوك ابو يزيد

**ابو يزيد** · 26-12-2001 20:22

اخوي العذب

السلام عليكم ورحمة الله وبركاته

اخي لم اجد في تعقيبك الا بيت هذا الشعر اللي رفع راسي دامك وجهته لي

ولذلك الله يرحم حالي ابرد عليك لو ان قصيدتي (تمشي الحال ) اذا بعد نقدر

نسميها قصيدة.

..........................................................

فانت قلت ياخوي العذب:

يابو يزيد القلب مل التعاليل ** حتى الغرام وشوفة الزين مله

............................................................

وهذا ردي ياخوي العذب:

ياالعذب والله ماتفيد المراسيل
***********************وعز الله ا ني عارفن كل عله
خل الدكاتر لا تسوي تحاليل
************************طبك اعرفه!! لا بغيته!!! ادله
اباصفه لك قبل مايمسي الليل
*************************خذ وصفتي؟؟ ترى كلامي بمحله.
لكن بلايا لابسات الخلاخيل
******************* ***قلبي خضر والصبر مااقاواه لله (1)
حسبي عليها ليش ماترسل ايميل
************************ ياالعذب قللي ويش اا عايشن له

(1)(لله في بيت الشعر) هذا ليس لفظ الجلاله لكنه نفي للقدرة على الصبر.

قبل النقاد :

((الشطر الأول من البيت الأخيرالاحظ انه يغرد خارج السرب لكن لابد منه))

اخيرا تراي كتبت هالقصيدة مستعجل وعسى مايشوفونه النقاد والشعراء والا رحت فيها .

اخيرا تقبل تحياتي

**شمالي** · 26-12-2001 20:41

الحمدلله بدا يتحرك مضيف قصه وقصيده
ومشكور ياابو يزيد
ولا تحرمنا من المزيد

**ابو يزيد** · 30-12-2001 00:20

الأخ/ابن علي

السلام عليكم

لاشكر على واجب

وهذا جزء من عملنا في هذا المضيف

اكرر شكري لك

اخوك/ابو يزيد

**ابو يزيد** · 30-12-2001 00:32

الأخت/سحابة صيف

السلام عليكم

شكرا لأطرائك وما قمت الا بما يجب ان اعمله

والشكر موصول لكي على ثنائك العطر.

وتقبلي تحياتي

اخوك/ابو يزيد

**طلال صعفق الحافظ** · 11-09-2002 11:37

موضوع صدر قبل وجودي على الشبكة

والحمد لله اللي كتب لي شوفتوه

المهم

سلمت يمينك ابو يزيد ويمين الاخوان اللي تفاعلوا ونشطوه...

والله انك ما انت هين .... شاعر....

ما شا الله عليك...

**النداوي** · 11-09-2002 22:46

أخي : أبو يزيد

قصة جميلة و رائعة

فهل تحفظ بعض من الأبيات التي قيلت بالمناسبة
أكون ممنون لو أتيت لنا ولو بعضاً منها

لقد سمعت أن هذه القصة قيلت في مجلس الملك عبد العزيز بن سعود فهل هذا صحيح؟
وشكراً على هذه المشاركة الجميلة

**ذياب بن غانم** · 14-09-2002 13:13

السلام عليكم ورحمة الله وبركاته

مشكور يابو يزيد على هالقصه الممتعه

وعندي بعض الاضافات عليها

بنيه بن قرينيس الجربا مهو شيخ شمر , الشيخ عمه فارس.
هو شيخ أو عقيد (الحرب)
يعني يقودهم بالحروب ... وذلك لكبر عمه بالسن
ولشجاعته المفرطه ولأنهم يعرفون منه الثباته بالحروب ,
لذلك عطاه عمه شيخة الحرب ولعمه شيخة الشداد.

وهذا قليل مع العموم ...
اللهم الشعلان فهالشي فيهم وراثه
الشداد للنايف من الشعلان(وتكون العطفه عندهم)
وشيخة الحرب للمشهور من الشعلان.
ومن ابرز شيوخ الحرب بالشعلان فهيد الشعلان ( راعي العصابه)
والدريعي بن شعلان ... وهذولا على شهرتهم
يعتقد الناس انهم هم شيوخ الروله مثل بنيه وهذا مهو صحيح
وانتهت هذه العاده فيهم بعد ان جمع صطام بن حمد الشعلان بين
المنصبين واصبحن في النايف الى اليوم.

اما محمد المعبهل فهو من عموم الشعلان وليس شيخ الروله ..
وهذا بسببه اشتعلت الحرب بين الروله والولد علي عشرين سنه .

وسالفته مع بنيّه أولها : نزل محمد ابن معبهل ومعه بعض جماعته عند قريه
بحايل .. وهي قرية" الموكا " وقومي يااباعر محمد وربعه وكولي زرع الشمري
راعي الموكا ..او ظنتي ان نبق الشمري الموكا ..!
المهم الشمري صاااح بأعلى صوته ينخى بنيه الجربا حتى ياخذ ثاره من ابن
معبهل لصيت بنيه اللي مالي الدنيا كلها بهكالوقت .

ووصلت نخوة الشمري لبنيه ... وهو يحطها بنيه بكبده .. ويتمنى ان الله يجيب
له ابن معبهل ...!!
لعظم هالنخوه عنده , وخصوصا ً ان الشمري خصه بالأسم.

ودوري يالايام ويامحمد المعبهل عند المهيد شيوخ الفدعان
وعندهم بنت تفضخ القلب ..!!
وهذا يسمع عنها .. لأن كل الناس تسولف عن جمالها ..
وهي تسمع عنه وتشوفه بالمجلس ... حريم قبل يوايقن من ورى القاطع
خصوصا ً اذا حضر فارس يسمعن بصيته .. يتمنن انهن يشوفنه.
وهو يتمنى شوفتها بس مهي حاصله .
لأن بنات الشيوخ مايطلعن واذا طلعت الوحده من بيتها وهذا نادرا ً
عبيدها يمشون وراها ...!!

وصارت على الفدعان غاره ... وتفازعو ا هل النزل ..
اما ابن معبهل ماجاب خبرهم ... راح يم بيت المهيد يبي يشوف البنت
لأن عليهم غاره والبنت اكيد تطلع .....!!
وهو يلقاها
قال اسقيني عطشان ..:D

وهي تسقيه لبن ... وهو مستانس ومنطنخ
وماهوا بهالدنيا ...
قال ابيها تشوف فعلي ... لأن البنات قبل مايبن الا الشجاع.
وهي تسمع عنه ... فرصه يوريها فعله

وهو يلحق بفرسه ... يوم جا ... ياهل النزل مهزومين
كاسرتهم شمر ... وماخذين الغنايم.

ومحمد من زود ثقته بنفسه يبي يفك الغزو للحاله.
وهو ينتخي " راعي العليا محمد بن معبهل "

يامار هذي الللي يدورها بنيه!!!!!!!!!!!!!!!!!
وهو يعتزي بنيه ...

وعرفه محمد وخاف منه ... وهو يلحقه بنيه الجربا
وهو يمر من عند بيت ابن مهيد .. يالبنت بوجهه وبنيه وراه
سطه يابنيه ... ياهو بالقاع!
ياعين محمد بعين البنت
وهو ينزل بنيه من فرسه وقال : هذي عن زرع الموكا .....!!

قال للبنت عطيني ما : وهي تعطيه اللبن;)
وهو تعبان ومنهك .. ومفلص ببنت ابن مهيد ..!!
وهو يشرب اللبن ...

طبعا ً اذا مالحت العرب او شربت من لبن نياقهم تحرم عليك ..!!
قال حرمت علينا ..?!
اركبي طلعي نياقك ..(طبعا ً باقي النياق ياخذونها ماعدا نياق اهل البنت).

وهو يعطيها فرس محمد المعبهل
وهي تركب على الفرس وهو يباريها على فرسه ...

وتقصد به وهم على الخيل تقول :

بنيه ياسمي البنت * هزمت خيل(ن)ماهزمها الا انت

ويوم صاروا مع البل قالها طلعي نياق اهلك
وترى الفرس هديه مني لك
وترى راعيها اظفر مني , لكن الله نصرني عليه بسبت خطاه على
زرع "الموكا" .

محمد يقول خفت منه وهذا يقول هو اظفر مني

اخلاق!

انـا أذا كتبت استرسل ماعرف متى أوقف أجيب طبلوني كله
عشان كذا عدلت الرد وقصقصت منه ...!!

الله يعين!