مساكم الله بالخير
بداية أنا وصلني الموضوع هذا بالإيميل (يعني مهوب أنا اللي كتبته وهو منقوووووووول)
لكن أنا حبيت آخذ رآيكم بالموضوع وأطرحه للنقاش لعلنا نتوصل إلى الحل الأفضل. ولا شك لا أحد يستطيع أن ينفسخ من أصله وعشيرته وربعه اللي هم لحمه ودمه لكن قد يضيق البعض ذرعاً بما قد يتسبب الانتساب إلى القبيلة من بعض المشاكل على حد قول الكاتب.
تحياتي
----------------------------------------------------
بداية الموضوع:
يا جماعة ملّيت وزهقت ...
وربي ، خلاص وصلت معي ...
منذ بداية الصيفية وإلى الآن ، تلقيت أكثر من صفعة على وجهي بدون ذنب
والسبب اسم القبيلة ...
للأسف ... أفراد قبيلتي من أقارب وأصدقاء ينظرون إلى نجاحاتي الشخصية ووصولي إلى مراتب وظيفية عالية ... بأنها الوسيلة لتوصيل أبنائهم وإخوانهم إلى الوظائف ، الترقيات وأخيرا تحقيق الأغراض التي في أنفسهم ...
يا فلان، الولد تخرج من الثانويه ولاهنت زبنه عندك في الشركة ( وهي شركة أبوي ) ...
يا فلان، أخوي مسكته شرطة الخبر يرقص بالكورنيش وكلم لنا اللي انت خابر من اخوياك يفكونه ... ( لاحووول )
يا فلان، تراني متهاوش مع رئيسي المباشر وأبيك تطرده والا تصقعه انذار وانت فزعتي ( أمري لله )
يا فلان، الشيخ يسلم عليك ويوصيك عليّ وداز لك معي هالرسالة ( يا مطولك يا روح )
وفي جميع الحالات إن لم أحقق مبتغاهم ورغباتهم اقرأ ماذا قيل لي :-
- والله فلان ماهو من ثوبنا ولا نعرفه .
- فلان صلبي وما له أصل وحنا بريين منه .
- فلان ما يقرب لنا ويخسى .
- فلان ماهوب رجال .
وغير ذلك الكثير والكثير ....
غير الحسد والبغض ، وكل يوم طابّين علي بالمكتب ويتحول مكتبي إلى قهوة واستراحة ترانزيت
غير اللي يحرق جرس البيت إلين تطلع ويحلف أنواع الحلوف الا تتعشى عندنا ، الا تشوف فلان وعلان وأعرفك على فلان .
وان جيت للعشا طبعا يجلسونك بصدر المجلس وهات من الأسئلة : وشلون أرامكو ؟ وش وظيفتك فيها ؟ تعرف فلان من قوم فلان وأخو فلان ولد عم فلان ؟ وش عندك من سوالف بالشركة ؟ تعرف أحد بالإمارة والبلدية والكهرباء ؟ ما رحت للشيخ يسلم عليك ويقول انه بينزل الشرقية ويبيك باليوم الفلاني ؟
وبعدين ؟
ولد ولد عم أبوي طق باب بيتي ومعاه شنطته وفيها أغراضه ، ولا أعرفه ولا عمري شفته ، خير من تبي ؟ ، انت فلان ؟ ، ايه نعم خير ؟ ، أنا فلان بن فلان آل فلان ولد عم أبوك نسيب فلان . سمعت ان عندكم تقديمات وجاي عندك تساعدني ... لاحوووووووول ... حياك اقلط ...
هذا من قبيلتنا ...أما قبيلة الوالدة - يحفظها الله - من الجنوب الأشم ، فهات يا وظايف وهات يا وسطات ، ونسألك بالله ونسألك براس شيخ الشمل ( أستغفر الله ) ونسألك برحمة جدك لأمك ... وباسم القرية والعباد ، وباسم وباسم وباسم ................ والله مليت
قالوا : اللي ما فيه خير لأهله مافيه خير للناس ، بس ماهو معناتها اني أصير مسؤول عن نص القبيلة ، أدبرلهم وظائف وأتوسط لهم ... وان سوى مصيبة تعال وافزع له وامسح وجهك بالأرض لجل فلان وفلنتان ...
مر شهرين تقريبا من بداية الصيفية وأنا في حالة حرب ، يا ليتهم يطلبون المستطاع ... يبون كل شيء جاهز ... وانا وش اسوي أشق هدومي ... الجوال يصيح من جهة 24 ساعة لا حيا ولا مستحى ، وجرس الباب شوي وينفجر ، حتى المسجد - أستغفر الله - بديت أتهاون في الصلاة في مسجدنا والسبب ترصدهم لي ولتحركاتي
قمت با ستخراج شريحة جوال جديدة ، وطرت إلى الإمارات لمدة أسبوع لبعض الاحتياجات ، وتوصلوا إلى رقم جوالي وبدأت الازعاجات من جديد .... رحمتك يارب ...
وانا قريت كم موضوع في هالساحة عن حذف اسم القبيلة واستبشرت خير والله ... ولهذا قررت وفي النهاية ، أن أذهب إلى أقرب مركز للأحوال المدنية لحذف اسم القبيلة وافتك من هالمصايب ... ولكنني أريد معرفة الاجراءات ...
وخل يقولون اللي يقولونه .... النسب الحمدلله نسبي محفوظ لألف سنة ورا ، وكلامهم لا يودي ولا يجيب ... وحنا عيال اليوم ، محنا ولد عمي وولد بنت عمتك وخالة أبو أبوك وجدك يافلان اللي متزوج فلانة ... وخير يا طير ... وبعدين ... ترى قربكم مني وبعدكم مايشفع لكم أصير وزير الخدمة المدنية ووزير التعليم العالي ورئيس التوظيف بأرامكو ... هففففففف
وان تكلم أحد بيمين والا يسار ، والله أبقول : أبوبكر رضي الله عنه يسمى بالصديق لأنه صدق النبي عليه الصلاة والسلام ونسبه محفوظ ولكن مهمل الذكر ...
وعمر ينسب إلى أبيه الخطاب ، ونسبه معروف ولكنه مهمل الذكر .
لأنه هؤلاء يكفيهم قربهم من المصطفى صلى الله عليه وسلم نسبا ... وتكفيهم أعمالهم الصالحة نسبا ، وتكفيهم خدماتهم الجليلة للإسلام نسبا ....
وأنا العبد الفقير إلى الله لا أقارن نفسي بهذين الصحابيين الجليلين ، لكنهما الآن سيكونان قدوة لي أكثر من السابق...
وهذا ما سأفعله بهذا الخصوص ...
وداعا يا ... اسم القبيلة ....[/COLOR][/COLOR][/FONT][/SIZE]
الدهمشي
رد مع اقتباس
المفضلات