من قصايد الشيخ الفارس الشاعر/مشعان الهذال شيخ قبيلة عـنـزه قبل 183 سنه :-
يالله يم دير الهبايـب والادوار*شانـك عسـى تصريـف شانـك لنـا خيـر
يالله ياعـالـم خفـيـات الاسرار*يامعتـنـي بالخـلـق وآل المـقـاديـر
قلته ونوم العين عـن جفنهـا طار*والقلـب كنـه فـوق حامـي المجاميـر
جانـا الخبـر يلابتـي وليـت الـدار*سكانهـا الاجنـاب هـم والبقاقيـر
من عقب ماحنا بها مثل الازيـار*نامـر وننهـى ونحمـي الجـار ونجير
حامينها في لابـة(ن) تسقـي الامرار*عدوهـم منهـم يشـوف المخاسيـر
ومن عقب ماكنا بنجد(ن) كما الطار*نقطع بها شر(ن) وناصـل بهـا خيـر
وحنا الذي ترجع لنا كـل الاشـوار*لاصـار بالقـولات شـوّار ومشيـر
لابـد ماناتـي لأبانـات زوّار*باسـلاف عجـلات(ن) تعـدّا المضاهـيـر
يهوم منهو مات(ن) بعيدات وعسار*وكم ذيرن من واحـد(ن) مابعـد ذيـر
وكم فاجنا العدوان غرات وجهار*إلا انتـون كـم يسبـق(ن) مـن معاييـر
ضعاين حطن لنا ملك(ن) بسنجار*وبنـن علـى الخابـور زيـن الدواويـر
وتواهلن الزور حصلـن لهـن كـار*مـن البطينـي للرهـا لـه معابيـر
نامر وننهـى مانـدور بهـا ادوار*ونهـدي العاصـي بيسـر(ن) وتيسيـر
وكتم مع الحاوي وداجن بالامصـار*وجابـن خفارتهـن بفكـر(ن) وتدبيـر
وحطن على السلمان طيحات الامطار*وصار لهن لينه وخضـرا مصاديـر
ومالن على رجم الهيازع وسنّار*وجابن حـلال محمـره مـن ورى النيـر
وحطن على الشنبل وداس(ن) الاخطار*وخذن خضرات(ن) بسيف(ن) وتدبير
ثم انتحن من كفّة الشـط عبّـار*وهاجـن وماجـن فـوق روس العناقيـر
وقضّن وكالن مـن شثاثـا بالاسعـار*وحطـن لملـوم المسمـى مصاديـر
بقطعان يطون الخطايـط والاقفـار*ويطيـرن جـول الحبـاري المخاميـر
وخلن فوق البشوك عج الرمك طار*وإحـرو هـاك اليـوم خـز المعاشيـر
وحطن على ورد الدجاني لهب نار*وغـدو بهـا الويـلان مثـل المداويـر
وأباذراع أضحى مجيم(ن) على الدار*وقطعن حـلال محمـره المساميـر
وشدّن وحطّن الثمامي بالايسار*وخلـن علـى المطـران مثـل المعاصيـر
وسارن بنا الزرفات بإقبال وإدبار*من غوطـة الفيحـا إلـى غشلـة الديـر
نـروم مـن زيـن المنـازل ونختـار*ونستـرد الخـوّه بحـدب البواتيـر
ليامن نخونا اللي على نجد حضّار*وجانا كتاب(ن) مـن زبـون المقاصيـر
من ماجـد بـن عريعـر حـر الاوكـار*يقـول وليـة داركـم يالمناعيـر
وجيناه مثل السيل طمّام الاوعـار*ليامـا غـدت عنـه البـوادي شعاثيـر
أولاد عم ولا بنا قول شبشـار*وشيـخ(ن) لنـا عنـده جـلال(ن) وتقديـر
ورفاقة(ن) واللي حذاهم لنا جـار*وحنـا عليهـم نحمـي الجـار ونجيـر
وحنا شبـات الحـرب وان شبّـت النـار*وتوايقـت بيـن الحنايـا الغناديـر
وحنّا هل الجمع المسمى إلياسـار*مركابنـا يشبـع بهـا السبـع والطيـر
وحنّـا بنـي وايـل بعيديـن الاذكـار*إليا تناخـوا بالجمـوع المشاهـيـر
وين انت ياللي تايه(ن) منك الابصار*جيناك حوله من شثاثـا وابـي الجيـر
وصحنا عليهم صيحة(ن) تجلي الامرار*حتى جبرناهم عـن الـدار تجبيـر
باغي عليهم صاير(ن) مثـل ماصـار*ذبـح الشفايـا واغتنـام الخواويـر
وهج المعـادي مالقينـاه بالـدار*زبـن علـى الحـرّه وذيـك الشناخيـر
كسيرة(ن) ماقـط ذكـرت بالاذكـار*بهـا القلايـع مثـل روس الخنازيـر
لـولا شفاتـي فيـك يانجـد مااحتار*فكـري ولاكثـرت علـي التفاكـيـر
ولولا شفاتـي فيـك ماجيـت مـرّار*نـداري ديـرة الهواجيـس وإنذيـر
وإندير حريات(ن) بالاريا وتبصار*وأرجي مـن البـاري عساهـا مسافيـر
نجد(ن) جفتنا وكل دار(ن) لنا دار*ماهـي معافـه ميـر جـوع ومداهيـر
يامـا ركبنـا بالسـرا قـب الامهـار*وعيـرات الامـه كنهـن السنانيـر
مابيـن مسنـاد(ن) ومابيـن محـدار*يامـا قطعنـا بدربنـا مـن مشاويـر
نعتاض عن دار(ن) عليها الدهر جار*ديـدل عسـا فيهـا تعيـش المفاقيـر
قطعاننـا ترعـى زماليـج نـوّار*ويامـا غـدا فـوق الاباهـر قناطـيـر
مثل المسوح اللي ترزّم على حوار*دار(ن) مريـه بالشتـا تسمـن الضيـر
دار(ن) بها بالقيض غدران وانهار*والتمّـن المجـروش ملـي الجواخيـر
وصلاة ربي عد ما بالسما طـار*وعـداد مـاوردن ضمايـا علـى البيـر
على الرسول المصطفى سيد الابرار*نور العباد اللي دعـا النـاس للخيـر
رد مع اقتباس
p:p
المفضلات