[ALIGN=CENTER]السلام عليكم ورحمة الله وبركاته :
وشلونكم
عساكم بخير
السالفه اللي ابقوله اليوم هي قصه حقيقيه لاحد اعز اصدقائي ( وابرمز له بالقصه باسم مسامح ) وهي خاااااصه جدا وابنقله مواساة لصديقي وعبره لكم وهي بالمناسبه لا تتناسب مع هالمضيف لكن تجاوزا ابحطه هنا .
*****************
قبل ما ندخل بمعمعة القصه خوذوا هالنكته وبعده كثروا المناديل لمحش الدموع ( ابوتس ياللغه :D )
هذا سلمكم الله بوه ثنين حشاشين متكين ويسولفون قال الاول للثاني تهقى الثعلب يولد وللا يبيض ؟؟؟
قال خويه والله ياخوي : الثعلب مكار وتوقـّع منه اي شئ :p
****************
نجي عاد للقصه
جلس مسامح وقت طويييل وهو مخبي عشقه لعمشى ولا يبي احد يدري ولا حتى قال لعمشى نفسه انه يحبه ,
كله خوف ,
من وشو !!!
ما يدري !!
ويوم جاء هكا اليوم وهو يصمم يقوله باللي هي به , انتظره ساعه وساعتين وثلاث ما جت يم القليب علشان تروي , راح يم بيت عمشى وسلم على ابو عمشى وتقهوى يبي يتبين الامر عسى مابوه خلاف ولا شين ! ويوم تطمن وهو ينكس لاهله وهو مصمم يقوله متى ما واجهه
ويوم اصبح الصبح وهو ينحر القليب ويتناه ياما جت ويوم جت وهو ينقلب حاله !!
عقب مهو متشجع تدوكرت حالته , ودلا يصب عرق
قالت لوه السلامعجز يرد المسكين وهي تقرب منه قالت عسى ماشر يا مسامح اشوفك منت كل هذا ؟؟ عجز يرد وهو مغير يرتعد ويصب عرق .
قامت عمشى وعطته شوي ماء يبل ريقه وهو يشرب من الماء شوين وتطيح الطاسه ماقوى يشيله
استغربت بنت الحلال من وضعه ودلت تنشده عن حاله ويوم رد نفسه قال اسمعي يابنت الاجواد !!
قالت سم ؟
قال واللي رفع هالسما اني ما اشوف من هالعالم الا انتي
قالت ايييييييييه بس كذا
ياخوي تر مابين عيوني الا مسامح
قال هاااااااااااااه
وهو يطيح المسكين ما قوى يتحمل الصدمه وهي ترشـّـقه بما ياما استقعد .. ما يدري هو بحلم ولا بعلم :confused:
يقول وانا ارجع للبيت بسررررعه ولو تحلفن ان مواطيي ( الله يعزكم ) مالمسن القاع اني لاحلف !!
يقول وان اجلس اتحسر على كل السنين اللي مرن ما علمته بعشقي له واتخيل اننا جالسين مع بعض ونسولف ونضحك .
ويوم جا من باتسر يامار انا ( انت يامسامح ) قايمن من الفجور وانقز للقليب واتناه وانا اسولف معه :confused:.
على ما وصلت وانا اسولف انا واياه ( مهو زي امس ما قويت احتسي ) عن حالنا واننا كنا ظالمين قلوبنا اللي ما تكلمنا الا هاللحين ثمن تواعدنا على حفظ العشق حتى لو حالوا الناس بيننا .
يقول استمرينا على هالحال شهور ما حد يدري بنا وعشقنا على النقا
المراد انه بيوم من الايام ما ادري من دري وينتشر الخبر بين الربوع كلهم بين عشيه وضحاها .
يقول وانا ادلي اتحاشى مواجهته قدام العالم خايفن من الحتسي وادلي اطلع مع عيال عمي للقنص وهم مغير يطرونه لي ويضحكون الا ممدوح ( حدى عيال عمه ) نظراته كانت مختلفه شوين ولا لقيت له بال ابد .
يقول يوم دريت يامار العالم يسولفون ان ممدوح عاشقن فلانه وانهم ما يصبرون عن بعض وان وان وان .
استغربت ان ممدوح يعشق لاني اعرفه من بد عيال عمي مايلين قلبه ابد ولولا هالعذروب تسان قلت ان ما بالارض زيه .
ويوم خذيت لي وقت يالعالم يسولفون ان ممدوح متخانقن هو ويا فلانه وانه مهو فيد عشق ومن هالحتسي .
ليا هاللحين وانا ما ادري عن ممدوح ووش اللي صابه .
صحيح اني لاحظت عليه بعض التغيرات من ناحيتي مع اني واياه قبل ما نتفارق وكل منا يفدي الثاني بعيونه .
يقول :
يوم ورا يوم واكتشف ان ممدوح ذابحته الغيره مني انا وعمشى .
حتى عشقه كان مجرد غيره وعلشان كذا ما ابطى مع اني ودي له بكل خير .
ايييييييييييييييه
وكل يوم يحاول يفرق بيننا
وكل يوم يبتدع طريقه جديده
المشكله لا مني واجهته مغير يتضحك بوجهي ولا عده سوى شين .
وقلبي يقول لي انه مهو مرتاح ياما اتفارق انا وعمشى .
قلت مدام الدعوى به غيره
استمريت شهور وانا اهاديه لكن كل يوم تزيد غيرته , وانا كل ماهذا طالعن انا واياه للقنص اغديه ينسى ومع اننا نضحك مع بعض بس كل واحد منا يحاتسي الثاني بقلبه ( انا اقوله تكفى
بس احاسيس ولا ما يعلم الغيب الا رب البيت .
صارت شوفة عمشى شفاقه
حتى هي بدت تململ مني ومن عملي مع ممدوح
وانا بين نارين
ما ودي اخسر ولد عمي ولا ودي احرم قلبي
جتن بحدى الايام وقالت اسمع يا مسامح , ياما انك تجي يم ابوي وتخطبن ولا ترن ابقبل باول خطيب ....
مهي حاله !!
قلت بس عطيني فرصه لا هاللحين ما ايست من ممدوح ولا ودي اخسره هذا يميني لا صار ما صار !
قالت العلم جاك وانا صبرت سنين , اول كل منا تسامي بنفسه واليوم يوم صار كل يدري وصرنا علك لالسنة خلق الله دليت تداري فلان وفلان .
احترت ما ادري وش اسوي واعتزلت العالم حول اسبوع ومغير اطلع يم لي حزيم واديره براسي , وش السواة وش السواة ؟؟
بالاخير قررت اني اروح يم ابو عمشى واخطبه وليتن ما رحت ؟؟
يوم جيته قال البنت مخطوبه
قلت وشلون
قال والله توه ثار ممدوح من هنا
قلت وش دخل ممدوح
قال الرجال خطب عمشى
قلت وهي وش قالت ؟؟
قال لو ما وافقت تسان ما قلت لك هالحتسي كله .....
استدارت بي القاع وشفت الزول زولين وانا انكس للبيت وانا اقول هاه يمكن ابو عمشى يتسذب
هاه بس ما اخبره تسذوب
اصلا حتى لو انه اكذب الخلق ما كذب بهالامور ؟؟
طيب وعمشى
هاه ؟؟؟
هي ما تبي غيري وانا احلف على هالشئ
حنا متعاهدين والله متعاهدين
وش اللي صار ؟؟
لا لا اكيد مهو صحيح
( اعرسوا )
لا لا مهو صحيح
يمكني متوهم
( جاهم ولد )
اكيد يبي يجي يوم ونرجع انا وعمشى
( جتهم بنت وولد )
قولي تسذب يا عمشى
تكفين قولي مهو صحيح
حسااااااااااااااافه
حسااااااااااااااااااااااااااااااافه يا محارش ( يقوله لي والدموع بالمحاجر ما ادري عزته ردتهن وللا ما باقي من دموعه الا هذولن ولا وده يفرط بهن
حسافة عمري اللي راح كذا
ليتن متولع بشئ يفيد
ااااااااااااااااااااااااااااااااااااه ليتن متولع بشئ يفيد
اما بالاخره او على الاقل بهالدنيا
والله اني احس عمري راح بدون معنى ولا فايده
تدري عاد
ليت كل هاللي جرا علمن
تدري وش المصيبه
اني لا هاللحين ما اشوف من هالدنيا الا عمشى
وبعده بتسى ليا ما صفى راسه وقال والله ما احد يدري بهالسالفه الا انت ولا ابي احد يدري مدام اني حي .
قلت خلاص وعد مني ما اقوله لاحد وانت حي .
ملاحظه :
كتبته وصديقي لا زال يتنفس ولكنه ضمن الاموات فعليا
[/ALIGN]
رد مع اقتباس
داش عرض بالموضوع 
اخينا ركز على الهامش وتجاهل اللب :p
p)[/ALIGN]
المفضلات