المهرة

أنا عمري تراني ما خذاني دونه النسيان

وانا يا اهل الملامة ما رقبت العيش وحداني

ابي لي مهرة ما عسفت صغيرة وبنت حصان

ويزبن لــه الجاني ابوها الي يفك المشكلة

واخوها لو تعزوى باسمها فزوا له العربان

يحق لها الفخر في قوله ال فلان جداني

ابيها في بحر عشرين لا زود ولا نقصان

ابيها اقصر طويلة والوصوف اشكال والوان

ابي الجبهه كما الصبح وكماالقوس اسود الحجان

وابيها ناعسيات ونرجسيه سود الاعياني

وابي رمش كما ريش يغطي الثلج في الاوجان

ابي جفن يسيل الرمش طربان وكسلاني

ابي خد كما ورد تنمى في طرف بستان

ابي خشم صغير مثل حد السيف شاماني

ابي البسمه كما البرق وثنياها كما المرجان

وشفاها جمرتين وفمها خاتم سليماني

ابي شعر مثل ذيل الفرس لا طبت الميدان

او الشلال لامن بات ليله بين الامتاني

ابي جيد سوات ابريق فضه ناتق مليان

وصدر كنه مرايه عليها طلع رماني

ابي ظهر كما الجدول وقد مثل غصن البان

وخصر مثل مجدول العنان وجسم روياني

ابيها نابيه ردف وبطن ضامر وجوعان

ابيها مدمج الساق وقدمها السان ثعباني

ابيها بنت عز من رقدهاينعم الفستان

ابي الرقه ابي الدقه لها باطرافها شاني

ابي المشية كما الي طالع من المعركة كسبان

وابيها ترش مع خطواتها مسك وريحاني

ابي الصوت الى مني سمعته كن فيه الحان

يدقدق مسمعي ويثير كل السحر باشجاني

ابيها حب واخلاص وهواجيس وفرح واحزان

ابيها مثل ما دكتور اهل العشق وصاني

ابيها لوحة ماصورتها ريشة الفنان

ابيها جوهرة ما جابها قاصي ولا داني

ابيها تنتصر لي من زمان حطني نيشان

وتبشر بالغلاء الي ما لفابه واحد ثاني

مهرها قلب وشعر يهز القلب و الوجدان

والبسها القصيد وتصبح اوزاني وقيفاني

ابي الي فات والي فات صعب ومن لقى العنوان

يرد العلم والا افضل ابقى اعيش وحداني