[c]هذه القصيدة موجهه للأخ الشاعر / حامد عبيد التريباني[/c]
[c]والقصيدة معبره عن نفسها [/c]
[c]وأتمنى أن تنال رضاكم[/c]
[c]ابو عمر[/c]
[poet font="Simplified Arabic,5,white,normal,normal" bkcolor="" bkimage="" border="double,4,white" type=0 line=200% align=center use=sp char="" num="0,black"]
عطشان .. هايم .. للمواريد
جافٍ جفا جفني على خيل وركاب=وأضحيت أنا عن غفلة العين قايم
وطارٍ طرالي بالمخاويف جلاب=ياما رمابي بالبحور اللطايم
وهجسٍ شطني والمواريد قضاب=وأنحى وينحابي على كل لايم
هماً وهاجوسٍ على الجوف صلاب=حتى انطوى قلبي أطوي البرايم
وسارٍ سرابي بين مقبل وهياب=وأصبحت مابين الندم والندايم
وقلبي تولع في طويلات الأنداب=روس العلالي مبعدات الظلايم
وكاوٍ كواني كي مبغض وطلاب=واركى على جوفي قوي الصرايم
واللي سباني سبي حايف وسلاب=وأودع ضميري عن حلا النوم صايم
يقفي ويقبل بي على كل مرقاب=وسافر وسافر بي بهوج السمايم
وانحت بي القدرة من الموج للباب=وبين البحر والبر والجو غايم
وأبا اعتزي بالقرم شغموم الأصحاب=ابن النشامى طيبين السلايم
حامد أبو غالي بحزات الأنشاب=يرخص بروحه للملازيم زايم
شهمٍ كريم بالمواجيب ما غاب=طويل باعه ما أختفى باللزايم
يا أبو غالي بالقلب تسعين نتاب=يومٍ وراء يومٍ شبوب الضرايم
لهبٍ ولاهوبٍ على الجوف شباب=وسمٍ ذحاح وبالمعاليق عايم
يا خوك ياكن الحيايا مع الداب=صباً على كبدي ازعوف وسمايم
طاعنٍ طعن قلبي بلا شلف وحراب=وأمسيت ما بين العناء والسقايم
ومن البطا والبعد أنا عارضي شاب=ومن لامني راجت عليه الحوايم
ناسٍ تلوم وللعراقيب شذاب=وعن عرفهم صديت بالحال شايم
ولا همني بالناس حاسد وكذاب=ولاني على المقفي كثير الشتايم
يا ابو غالي بالوصف ذاهب وذهاب=والسيف من فعله سهوم وسهايم
عطشان هايم للمواريد قراب=لاشك ماهي يالسنافي ولايم
والرمز ما يخفاك يا عرب الأنساب=تفهم وفاهم بالرموز الحكايم
سمٍ تسامى واستوى حيل وانساب=ومن سطوته لو نمت ماني بنايم
وداكوك وأحلام وكوابيس وأحزاب=جتني تزف أصوانها بالغنايم
وشورك ورايك بالمكاتيب وكتاب=يا اللي على العليا سبوقٍ ودايم
عدت عوامٍ ما تهنيت منصاب=وأصبر وأجاحد لا تكون الوهايم
وصلوا على المبعوث للدين نداب=إعداد ما هلت مزونٍ رزايم
ابـــو عمـــر
[/poet]
رد مع اقتباس
المفضلات