[poem=font="Simplified Arabic,5,white,bold,normal" bkcolor="transparent" bkimage="" border="inset,medium,gray" type=1 line=0 align=center use=ex num="0,black"]
قال الذي من عزة النفس ماباح=لاشك جور الوقت بيح كنينه
عديت انا حيدٍ عن الخلق منزاح=فوق الوطا ياحمود من حين حينه
يذكر مخاليقٍ قضى ذكرها وراح=واشيب عيني من توالي سنينه
قعدت في راسه ابي البال ينساح=وانسى جروحٍ بالضماير دفينه
قمت اتصبر..لكن الدمع فضاح=والوقت يفضح..والخلايق تعينه
"كذاب" منهو قايل الرجم دماح=انشهد انه للهواوي غبينه
دليت اصوت وارفع الصوت "ياصاح"=واحسب مناعير العرب سامعينه
ياحمود وقتك يافتى الجود ذباح=للذيب هزله وللحصاني سمينه
تنعاف دنيا مالفت منها الارباح=قامت تغيّر يابن الاجواد دينه
"ال ك ل ب" عاوي واصبح "الذيب" نباح=ليت السلامه للنشاما رهينه
.
.
.
وكريم يابرقٍ على ديرتي لاح=ليت المطر بديارنا ذاكرينه
بعض العرب في وسط "بيروت" مرتاح="وبيروتنا" ياحمود باطراف "لينه"
ياحلت الفرصه..وقيل الحيا طاح="والفقع" شافو له على القاع عينه
نبي لنا مع خيرة الربع مرواح=والكل منهم خوته خابرينه
ياماحلا وان هب ذعذاع الارياح=وكلن تجهز...والهدف عارفينه
من فوق جيبٍ قاطع الدو نزاح=يروج روجات البحر بالسفينه
منوة مهرب مع "هراوين" "وسلاح"=اقفى يشوح ودولته طالبينه
انشهد انه كاسبٍ كل الامداح=من صممه ياعل تسلم يمينه
يزرق كما زرق القنا زرق الارماح=ويبعد بنا عن شوف ضوح المدينه
نبي لنا عند "الشمالات" مصفاح=وسط الديار اللي جذبنا حنينه
نبي نزوره قبل نزاع الارواح=من قبل مايوضع على الراس طينه[/poem]
اولاً تكرمون عن ذكر " ال ك ل ب" بالقصيده
ثانيا" "لينه" لمن لايعرفها هي بلده شمال حايل بين حايل ورفحاء
