)) مــقــلــطــ الــحــريــــمـــ ((

‏:
.
.



متركيه عند المشب

تبيني أروح معكن يم غنم ابوعجايب :)

ياحيي إنتي والله انتس سنعه وأجوديه

بس يالغاليه أنا ماأحب الغنم !!!!

أوعدتس (وعد بلفور :) ) إنوه إذا جا الربيع

اعزمتس انتي وعجايب وقمرهم وبروق

على مخيمنا .. طبعا مهاجره وتحملت من أهل البيت مايحتاج اعزمهن

حياكن الله ولاتشيلن هم القهوة والشاي في قهوتسي :)



.
.
:

يمسيكن بالخير اقول انزحي يابالمختصر اربع وعشرين ساعه قدامي انا مدري وش تقولين لهلتس عشان

يخلونس تسيرين كل يوم طالعه ..لامالي نفس مابي قهوه عطيني شاي


اقول الصيف قرب ويمكن نسافر ونترك المنتدى للشيبان لازم نسق عطلتنا يعني نسوي مثل الشفتات ناس

تطلع وناس تستلم اوكيه ok عشان بالمختصر نكتب انقليزي يمال اللى بالي بالتس:)

8

8
وين بتهاجرين هالسنه .. يامهاجره .:) >>شفايه

[align=center]جبتلكن اليوم سالفه وأبي كل وحدتن منكن ترد على بسالفتن أزين منه :tongue:


يوم من الأيام جتنا خالتن لى تبي تقعد عندنا له كم يوم عشان رجله مسافر بله شغيله وجابت معه خدامته الفلبينيه .........................عاد هالخدامة ما جته وهى تعرف الشهادة عقب طلبات و زورات ولعنة جدف


أنا ربع قليبي على هالجيه خبركن غسل المواعين يكسر الظهر والا الكوي تمصع كتوفس وليته يعجب عاد ها كالأيام خدامتنا توه مسافره

المهم ما أمداه حطت رجيلواته بالبيت أعنى الخدامه الا وتطبز اختى بحلقي تقول وليه ما ندعيه للإسلام
لعنبو حيس تو المرة جايتن من ديرته والله لو تشرد لتفضحنا خالتس........... تقل ماهى خالتن لى بس تخبرن زعلانه
قالت : ايه حرامن عليس تبين تحرمينه الجنة ..................
قلت :يا علس ما تفيدين هو أنا ماسكتن ارقبته لا تسلم ...

وهى تنشب بحلقى صرت ليا جيته من يمين لفت يسار ويا جيته من يسار قمزت يمار هى ملوحتن فوق كتوفي

ما لكن بالطويله وهى تولجن الله لا يسلطه على صديز
وهى تجين اللى هيهى وانا أقوله : بقريحن يقرحس انتي وياه يالله تقلعي عني

عاد أنا ما روح نييه أطنى لى شوين بعدين أرجع اترضاه تقل أنا اللى مزعلته

و أنا ارجعله بزعمي إني بلعبه وأنا أقول له: بحري يا حيي المرة توه جايتن من ديرته لا وبعد مسيرتن علينا وحنا مفتشلين نكلمه بالإسلام وحنا ما ضيفنه مار برخا خلينا باكر والا اللى عقبه نفاتحه بالموضوع وهى تسكت عني

يوم جاء وقت النومه وهى تقعد تحالف ألا تبي الخدامه تنام عندنا .......... وويلي هذى آخرتس يا متركية تنام الخدامة بحضنس ولا بعد ما هى مسلمة و أحاول أقنعه وهى تحرن و تعيي و تزم خشمه هاللى تقل خشم صخلن ذارز
وأنا أرضى بأمر الله وش أسوي الحكم للأقوى ........... أقصد للأكبر


المهم نمت أكى الليلة نومتن الله أعلمبه يوم جا الصبح يمار أختي متنفضتن من الجهمه تقومن وش عندس قالت : يالله قومي نبي ندعى المرة للإسلام

قلت :لحول انتي وين جادعتن قلبس منا قيلتن لس يما نضيفه خليه يما تقعد له يوم و إلا يومين

المهم يوم جا من باكر وحنا نعزم ندعيه للإسلام ............. وحنا ندخل عليه المطبخ ونقعد نسولف عليه عن الدين والرسول اللهم صلى على محمد وعن عيسى عليه السلام – ما قلت لكن انه نصرانيه - شينن حنا نفهمه وشينن والله ما ادري منين هو طالع

وهى مبرطمتن ساكته ....... يوم خلصن وهى تقوم لدولاب السكاكين وتاخذ أكبر سكين بالدولاب وهى تناظرنا بعويناته وتقول : مدام ازا انا فى ازعل انا خوذ سكين وازبح هذا زعل

وهى تنشف أرياقن يعلس لنار جهنم اللى تفصمل عظيماتس مار هذى أخرته
وهو يجمد الدم بعروقنا وهى تراعيلى أختي وتصر على سنيناته و تقول لا تهربين عشان ما تحسبنا منخرعات ........ قلتله الا منخرعات ومارجتن بطونن مار هذى من هضايلس اللى كل شوين صاكتن بوحده وانا استاهل تقل مالي قلب اطيعس

المهم وحنا نتسحب وحدتن ورى الثانيه ونزبن امي و خالتى ونعلمهن وهى تقول خالتى : ياعلكن ما تجبن المدثره أنتن وش تبنبه أحد شاكيلكن ......وهى تطن علينا

وهو يقعد كل اللى بالبيت تصافق رجوله ............الورطه وشي إنه بالليل تبي تمرح عندنا يا من شراله من حلاله عله
وهى تقعد اختي تدعي عليه : ياعله ترتد أنا وش دخلن به
قلت : وش نوحس انتي قعدتي تخبصين المره ما أسلمت علشان ترتد
قالت: أنا وش دران عنه المهم إنه تدخل النار و بس ...... ابه هين توس اقتنعتي

وحنا نعيي ننام عنده وهى تحلف أمى الا تنمن عنده بزعمه إن شافتنا ما نمن بمكانن تبي تهم بنا وتاعدنا أمى إنه تجمع السكاكين وتغيبهن عنده

وحنا نروح نسحب رجيلتنا وي ننا وين النوم وكلن تصبط بفراشه وعويناتن عليه لو تحك خشمه قمزنا مادري وشلون عدت ها كالليلة المهم إن الله عداه على خير

ما جا الصبح ألا رجل خالتي جاي ويوم شفناوه عدنا شايفين الملك وحنا نضف اعفيش خالتي ونزنده اخوي عشان يحطه بسيارتهم و ما صدقنا على الله انهم يقولون مع السلامه

يوم رجعت خالتي لبيته وهى تنشب بحلق رجله الا ترجعه هذى ما تصلح وهو يحجز له ويركبه الطيارة وهى تطس مهف الدخان

ونحن نتنفس الصعداء وأخيراً أتى اليوم الموعود

ملاحظة : اللى ما تفهم شين من الحكى السابق تسأل عجايب ترنه أمينة السر .... امحق سر [/align]

8
8


هههههههههههههههههههه

لي عوده .....

سلام ياحبيباتي



عساكن بخير ((تزكحن وتردحن))


.......................................


اردلكن عن شوين يصوتون لي اسوي لهم شاهي ((بالصيف مدري شلون يتحملون الشاهي فوق الحررر لهووب))

عجوبه انتي ليه تسألين وين اهاجر تبين تروحين لمكان تاشيره انا بيني وبينتس مهدده اهلي نسافر يعني نسافر .هذا الله يسلمتس لنا حفنت سنين ماطلعنا الباب والصيف اللي فات قمنا نجعر نبي نروح عمره يربي سترك نبي نتعبد انتم دافنينا بالحيا والله وحنا نكسر خاطر ابوي وهوي يودينا وكل السفره وحنا طايحين تحبحب بابوي شكرا بابا شكرا ,,من الذرابه والله وهي تصير خوش سفره من الشرقيه على الطايف على مكه لجده الي المدينه الى حايل ((عا الحين نتمسكن لبوى كل ماقعدنا نتمنى تعود هكاالايام

عاد اذا تبين تخاوين زهبي شنطتس:thumb:

http://www.m5zn.com/uploads/9a2c9cedcc.jpg



جبت لكن هلتوكس والفنجال تقاسمن التوكس والفنجال كل وحده شفه((مو جغمه))

تحملت

الله يعطيتس العافية عالقهوة والتويكس والله إنه أحسن ضيافة

الله يكرمتس

ماهوب ذيك الدلّه الكحياااانه

ههههههههه

[align=center]وشى اللى خوش سفره يا مهاجرة أكيد رايحتن بالطيارة والله يا حيى قبل العام سافرنا مثل سفرتس هذى ولا بعد أقرب حنا بدينا من الرياض والله ما رجعنا ألا رجلينا متنفختن ما يعرف وجهه من قفاه صايرتن تقل رجلين فيل و جلودنا منصلختن من ها الشماس و بطوننا ما غصتنا من تقلبات المطاعم

لا وازيدس من الشعر بيت شرو بطريق الرجعه عصير وشربناه والله ما رجعت الرياض و أنا أعرف الشهادة على طول دخلون المستشفى قالوا تسمم عاد كلن شرب واشمعنى أنا أتسمم ما أدرى


مار وش رايس نقبل عزيمة بالمختصر ونخليه تستاجر لنا استراحه

وانتي يا حي عليس القهوه و الشاهى وان اخذتهن بالمختصر – تريه متزهلتن بهن لي- لا تجيبين العود

وعجايب عاد هى الراس عليه تذبح لنا من طليان الشايب و تسويه مندي وتجيب معه بوفيه على ذوقه عشاء لنا

وتحملت وهند التويجري وقموره عليهن يجبن لنا اللى يوسع صدورنا وهن وذوقهن يبي يجبن طيران أو مسجل أو إن شاء الله يحجزن لنا طقاقه نبي نرقص ونوسع صدورنا


عاد أنا أبجيب لكن أكلات شعبيه " مشوي ضبان ..... وسلطة جراد ......... وعصير فقع ............ وبرستد نعام ............... ومحشى قميري "
وان تذكرت شين ألحقته

وش رايس[/align]