مرثية الأمير : ممدوح بن عبدالعزيز رحمه الله

الشاعر : يحيى بن شيبان


الحزن له بابن على الروح مفتوح=كنت احسبه سهلن في ساع ينزاح
بس للأسف عنده تصاريح ممنوح=متولجن قلبي من ايام ما راح
جريت انا بالصوت والصوت مبحوح=ومن اولن صوتي مع الناس صداح
علمن لفاني و أودع القلب مجروح=إليامن سلينا عوّد الحزن يجتاح
يجتاح جاشن للصواديف مفتوح=مفتوح لا قفلن ولا فيه مفتاح
فقدت من روس الرجاجيل ممدوح=يا كبر حزني بعد ما شيخنا راح
لا عاد به ناصح ولا عاد منصوح=وأمسى عليّ الليل من دون مصباح
امسيت انا والروح ومكابد جروح=تدركني الشِطة ولاني بمرتاح
يا كبر حزنن بي ولا هو بمشروح=ما ينطفي حزني ولو جات الافراح
مسموح يا وقتي ولا انته بمسموح=حديتني حدن ولا ني بمرتاح
تتعبني الذكرى على غير مصلوح=في الذاكرة حزنن من ايام ما زاح
شيّن كتبه الله مكتوب باللوح=من قبل ما تنفخ على الناس الارواح
من راح ابو نواف والسعد ممسوح=ولا ظن به مثلي على الكون مرتاح
يا من خلق ممدوح يا رب ممدوح=تجعل على قبره من الطيب فواح
واذا نفخ بالصور ثم عادت الروح=تجعل له الفردوس من بين الارواح
يا رب تجعل له مقامات وصروح=في جنتن فيها المخاليق ترتاح
لو راح ممدوحن بقى ذكر ممدوح=اللي مشى دربه على نهج الاصلاح
وإحنا على الدنيا بها أيام ونروح=ما حدن بها خِلد ولا فيه مرتاح
تراك لو عمّرت مثل النبي نوح=الحي لا بده عن الكون ينزاح​


https://www.youtube.com/watch?v=WlCTy-TLr5A