فيما مضى

شيء من خطاب النفس..
ومن ذكريات الماضي البعيد


يا قلب خل مطارد البيض خله
ما عاد لك في البيض ولف ومواليف

خله لمن توّه يناظر لظله
توّه شباب والضواحك مراهيف

والشيء وش زينه إلى جاء محله
خل المِنَشّط عنك خل التكاليف

وابك الشباب اللي تصرّم ودلّه
واغنم ولو بعض النظر للغطاريف

وسولف وجر أشعارك المستهله
اللي بعد ما طبع منها ولا شيف

ولا جاك من يستاهل العلم قله
أهلا هلا والشعر بالذوق والكيف

ولو طال عمرك قلت يا ويش قله
اكثر من الثلثين صبر وتساويف

ما فيه قاع يركض فيه لله
وباقي العمر ما عاد يسوى التصاريف

فيما مضى لي ركضة مسفهله
ويا ما رميت الحيل فوق المناسيف

وفيما مضى حفت الغروس المظله
وياما تقهويت وقدعت المناصيف

وما فيه عدّ صافي الا وأدلّه
واشرب ليا وردته مخاف الصواديف

وفيما مضى بيدي رمح وسلّه
واليوم ما غير العصا والسواليف

خليتها كِبْرٍ وخشيه وذله
وحماية عن لفح هوج العواصيف

من كبر يذكر حادثاتٍ مض له
بالزين وان زاد الكبر جت خذاريف

والعفو ممن يملك العفو كله
سبحانه اللي ما يحب التطافيف
.
.
#شعر
إبراهيم عبدالرحمن المفدى
.
.