من خارج المجموعه الشمسيه

واقف واشوف الناس واسمع لها صياح = واقول رعب الناس فرصه ثمينه

اهل القلوب الساليه ليه ترتاح = مايجتمع بالقلب طهر وضغينه

ياسوق الاسهم فوق لحدود الارباح = واصرع ضعيف العزم عند الخزينه

عهد الخديوي راح والعرش قد طاح = والنيل باقي ويتجدّد معينه

آدم يقول الصبر للخير مفتاح = واقول بعض الصبر ذل وغبينه

مدينة افلاطون سكانها اشباح = ابا احكم الاشباح هم والمدينه

وابا ادخل القلعه بمليون سفاح = حتى حمورابي يشاهد بعينه

على مقابرهم يقيمون الافراح = البرمكي واللي مشا في ضعينه

مابالمغاره لأهل الكنز مصباح = افلس علي بابا وتبّت يدينه

ماتفرح الصبخى بالانتاج فلاّح = فيما مضا جاه الخبر من جهينه

سحاب صيف بروق ورعود ورياح = قض المضاجع واستباح السكينه

الجني الاعور معه جيش وسلاح = تودّدوا له لأنهم حاذرينه

وجه الغضب في كهف تحضير الارواح = شمس المعارف ماسكه في يمينه

على البحر يطفو مكاتيب والواح = وعلى شفا الجودي بقايا سفينه

هذا الغضا من حر فرقاك نوّاح = يامالك ابن الريب حاله حزينه

جرير له وارث من الناس طمّاح = ماهو من اصلابه ولا الجين جينه

حفيد ابو تمّام ترميز وايضاح = ماهو مهم ان كان تفرق سنينه

ماجيت يالنعمان للجوخ مسّاح = لو يرجح الميزان في كفّتينه