وبعض البشر يكون صمته سلاحه
لو الهديه بالضحيه لي جراح
ذكراه طيب ودافنينٍ جراحه
ارتاح ياقلبي بصدري وابرتاح
ما من ورا بعض المشاريه راحه
الليل لاعسس تقفاه الاصباح
وليلي حسب ظني بعيدٍ صباحه
يا قلب تتلي واحدٍ عنك نزّاح
ماهز قلبه صاحبك وانجراحه
روّح مع المجهول من عرض من راح
خذا حسب قوله من الوصل راحه
اللي تهنى مبعدٍ عنك بمراح
مضى ثلاث اعوام على مراحه
ماني على الكفين ولا على الراح
ما يطري الفرقا ولامن صراحه
دمعي سجنته بالمحاجر ولاطاح
لا والله الا فوق خدي مطاحه
حيثه غسل شي عن القلب وانزاح
ياما عسر قلبي نهار انزياحه
قصر بناه وصك بابه بمفتاح
ولا ترك للغير وسطه مساحه
يا ما عبير الشوق في ساحته فاح
حتى شذى عطره ملا كل باحه
ازريت بالتلميح من دون الافصاح
دفن المشاعر باحتياج الفصاحه
أخذت يوم ازريت بالصمت مسراح
وبعض البشر يكون صمته سلاحه
لو طحت كبوه كم جوادٍ ولو طاح
عزاه قلبه يوم يطلق سراحه
انا وعدتك بالصراحه والايضاح
قلبي هواك اليوم نزّل وشاحه
