قصيده رائعه أعجبتني

يقدم عزيز الساس لوكان مفهوق
....................................................ويأخذ عظيمات المراجل قلايع
................................................................................ ......

الشعر له فاتل وناقض وفاروق
.... والسوق له سايم وشاري وبايع
واللي ربح ببضاعته يمدح السوق
........والناس تطلب نادرات البضايع
يامدور الطيب تخير على الذوق
... وأحفظ معك من قول فارس ودايع
لو كان بالارشاد والنصح مسبوق
.........ذكرى لعل لها ترق السمايع
جواهر معها شذى المسك مرفوق
........ومعها التجارب مثبته بالوقايع
واللي لبس من جوهر المرجله طوق
.........مثلي مجرب والتجارب نفايع
سافرت لي طرقه وطبيت لي سوق
.....وخاويت في دربي جميع النزايع
والله خلق بالناس ميزات وفروق
.....والناس شتى بالشيم والطبايع
أحد على مبدا وله نظرة فوق
......وأحد كما ثلج على القاع مايع
ولاني وكيل أدم على كل مخلوق
.......لاكن أشوف بخلق ربي نوايع
أشفق على الطيب ولي رفقته شوق
........غريب ولا من قريب الجمايع
وراع الردى من دونه الباب مغلوق
....بيني وبين أهل السفاله قطايع
الطيب وأهل الطيب عاشق ومعشوق
....والطيب له مبدأ وحكم وشرايع
والمرجله وهبه من الرب ووفوق
....والدين رأس المرجله والطمايع
والرزق من ربي وله فرض وحقوق
ومن يطلب أرزاقه من الخلق ضايع
وألآخذ بالآسباب ثابت وموثوق
......وتوفيق ربي هو خيار الذرايع
ولا كل مطرود كما قيل ملحوق
.......قول مبالغ فيه لو كان شايع
ان ماجلبها والي العرش برفوق
.....كثر المطارد مايحوش النفايع
ومن يحسن النيه مع الناس مرزوق
......ومن يتقي ربه دروبه سنايع
والكذب ثوب مايجمل ومشقوق
......ولاينرفي شقه بكثر الرقايع
ومن لايحط أسرار قلبه بصندوق
.....ويجود المفتاح عن كل صايع
يفتح على نفسه مداخل وخازوق
.....وقناصة الفرصه تزيد الجلايع
ومن يقرب الآنذال لايمن البوق
......النذل خاين مايصون الودايع
عقرب ثرى ولا كما ناب زاروق
.....لاصادف الغرات للسم زايع
وأحذر ترى النمام للشر ناتوق
......دايم يقرب للشرار الولايع
من المكارم خارب القصد مسلوق
.وعقله لنزغات الشياطين طايع
وترى الردي شمع على الحيط ملزوق
لا أونس حميم الشمس جاك متمايع
أحذف ردي المعرفه حذف خملوق
.....ولا تنخدع بالزبرقه واللمايع
عليك بالطيب ليا صرت مزنوق
.......اللي فعوله كلبوها روايع
يشيل عنك من الصعيبات طاروق
..ولا يلحق المنه جميل الصنايع
لامن عن الواجب هبا كل مزلوق
.....يقوم بالواجب بعيد الرمايع
والشارب اللى ساعة الضيق محلوق
..وقت الرخا محد يبي له فزايع
خله ولو شفته على الوجه مصفوق
.ولا تستشير مجالسين الربايع
ون كان في صدرك قنا الوقت مزروق
..خلك على الشده قوي البتايع
وضرب على الكايد ولا يلحقك عوق
....وطلع سنود وخير ربك طلايع
والشمس لو غابت يجي صبح وشروق
..والحق له صيت مع الناس ذايع
يقدم عزيز الساس لو كان مفهوق
..وياخذ عظيمات المراجل قلايع
وبليس أخو مره مربط ومفلوق
....وفي كل يوم يزود حر ولقايع
نركي على كبده مراقيع وحروق
..وعروق قلبه من وحمنا مزايع
وصلو على الهادي عدد ما أرمش الموق
.وعسا لنا من جود ربي شفايع

هذه القصيده أعجبتني ولا أعرف قائلها وهو بالتأكيد ليس شمري من واقع الكلمات في القصيده ولاكنها قصيده جميله معبره أتمنى من من يعرف قائلها أن يرسل لي وأكون شاكرآ وممتنآ.....................تحياتي لكم جميعآ

أخوكم:أبوتركي/الظهران

صح لسان الشاعر

وسلمت يمنى الناقل

وكان الود لو اعرف شاعرها لكن للاسف

لك كل التحية اللي واضحه عليك اخوي ابو تركي

أخوك / المهيني

اختيار حلو يابوتركي

يعطيك الف عافية .. وسلمت يمناك على مانقلت

وتقبل تحياتي