البدويّه + الحضريه = ؟؟؟

كانت أول يوم بالأصل بدويــــــــــه
حملها حمل على غيره كبيــــــــر

حملها كايد ولاهي به رديــــــــــــه
تعتزم وتقول خير والف خيـــــــر

قبل مايظهر شعاع الشمس حيـــــه
ابتدت مشوارها الصعب العسيــر

نارها شبة وصاجه في يديـــــــــــه
ومن عجينتها على صاجه تديـــر

وعقب ماخلص فطور اهل الحميـــه
روحــــــــة يم الغنم تعلف شعير

وأوردتها الماء على جال الركيــــــه
دلوها فوق السواني لــه صرير

وشدة المحزم وصاحة للرعيـــــــــه
واقتفتهــا للمراعي والغديــــــــر

حافيه وعصابته عشرين طيــــــــــه
وللحطب فاعورها سيـف شطــير

ومع غروب الشمس عادت شوشليه
والحطب فوق الجحش كبر البعير

وأبتدت ترضع بهمها الاجوديــــــــه
من كبير الضان تطلب للصغيــــر

والصميل أودى وزبدتها طريــــــــه
والعشا مرقوق مامثله يصيــــــر

وانقلب حال بدويتنا حضريـــــــــــه
واختلف طبعه عن اولها كثيــــــر

حملها في حملها دايم هنيـــــــــــــه
من عسير الحمل بدل باليسيـــــر

عقب ماأسمه مع الرحل صخيـــــــه
اصبح اسمه من عقب هذا عبيـر

عقب ماثوبه على دور الضحيـــــــه
صار بالموضه لها دور خطيــــر

عقب ماهي بالغنم صبح وعشيــــــه
صارت بسوق الذهب بس تستدير

عقب مالبرقع يزين هالبنيـــــــــــــه
النقاب اصبح لها مثل الخفيـــــــر

عقب ماهي مع صلاة الصبح حيـــه
الظهر يذن وهي تعزف شخيـــــر

من عقب مانومها بأرض خليـــــــه
امرحة في غرفة كله حريــــــــــر

من عقب ماهي بعيشتها شقيـــــــه
الخدم قالولها بأمرك نطـــــــــــــير

تامر وتنها ومطلبها هديـــــــــــــه
وهي على المركاء مثل زول المدير



مشاركة لاخيكم
السنعوســــ مضحي بن سالم الشيبان ــــــــــي

احسنت احسنت احسنت
بيض الله وجهك ياشيخ عزالله ماكذبت
سجل اعجابي بك وانا من متابعينك ان شاء الله

السنعوســــ مضحي بن سالم الشيبان ــــــــــي




صح لسانك


بس أنا لي وجهة نظري الخاصه


بالبدايه : البداوه بها الزين وبها الشين
والحضاره كذلك بها الزين وبها الشين

بس وين اللي ترضي ربّها في بيتها وفي عرضها وفي أهلها

وإذا على حياة البداوه إن ماقصّرت كأنك راسمها لنا ماشاء الله عليك لوحه من رسم فنان


بس إنت لاحظ اللوحه وشف الرسمه عدل شف التعب وشف الشقى وشف الغثى وتاليها القاع ممحله وهالسنه ما جاء مطر ويالله خلّونا نرحل وندور أرضٍ أحسن من هالارض وتاليها البدو يجتمعون عند قليب بن فلان ويتخانقون على اللي يسقي بعارينه أول وعقبها فلان يذبح فلان ويجلي عن أهله.



يعني إختصار الكلام شقى في حياة كلها قحط


والحضاره ماهو معناها إن البنت لا زم تبدل ثوبها

عقب ماثوبه على دور الضحيـــــــه
صار بالموضه لها دور خطيــــر

ولا هي صفه زينه إن البنت ما تبدل ثوبها إلا من عيد لعيد(( الله جميل يحب الجمال))


وليس معنى الحضاره أن تذهب البنت وتفتر بالسوق

عقب ماهي بالغنم صبح وعشيــــــه
صارت بسوق الذهب بس تستدير

وليست ميزة بالبداوه أن تجلس البنت عند الغنم نهار وليل




وما أبي أطولها

البداوه زينها بعلوم المراجل وبعفّة النفس وبالقناعه


وإذا على الحضاره ما أعتقد ألحين فيه بدو (( إلا قليل )) وحتى البدو الآن لديهم مقومات الحضاره وأولها الجوال .

وأعيد وأقول العيب في البدو نفسهم اللي يحسبون إن الحضاره إنك تسبل بنتك بالسوق وتخليها تلبس العباة اللي يبيلها عبات تسترها


،،،،،،،،،،،

وانا أتكلم عن شيء شفته بعيوني

وحده حضريه مفرعه وماهي حاطه من المكياج شيء
ووحده بدويه لابسه البرقع ومطلعه نص خدّها والقحل واصل لإذنها والمشكله معها أخوها أبو شنب (( مسوي لي فيها يعني بدوي وماعندنا بنات تطلع من البيت ألحالهن))طيب ما يشوف إخته وش عامله بنفسها ولا إخته بنظره غير نظرتنا








والسموحه على الإطاله لأن هذا الموضوع جدا حساس وغير منتهي

صح السانك وماقصرت
يالشيباني.
أسجل أعجابي

راعي الريشا هو انت السنعوســــ مضحي بن سالم الشيبان ــــــــــي او لا ؟

على العموم يا هلابك مليون انت ومضحي الشيبان الشاعر المعروف الي نتشرف

جميعا ان يكون بيننا شاعر مثل مضحي ولا مهونة بالربع .

اما القصيده فهي قمه في وصف حال التغيير الي صار من البداوه للحضاره والرفاهيه

الي عايشين به عسى الله ما يغير علينا الا للاحسن.

مره ثانيه وثالثه مرحبا ملايين بالشاعر مضحي وبالاخ الي نقل لنا شعره كانه مهو هو.

تحياتي

[poet font="Simplified Arabic,14,black,normal,normal" bkcolor="" bkimage="http://www.shammar.org/vb//backgrounds/47.gif" border="double,4,gray" type=2 line=200% align=center use=ex char="" num="0,black"]

الاخ مضحى
مناظره جميله بين البدويه والحضريه
تسلم وتدوم وصح لسانك .
[/poet]

راعي الريشا ماهو السنعوســــ مضحي بن سالم الشيبان ــــــــــي
كل ما في الأمر إني نقلت هالمشاركه.
والأمر هذا واضح من التنويه اللي أسفل القصيده مباشره.
هذا وتقبلوا فائق الإحترام.

راع الريشا

حياك الله. واعذرني على نقل الموضوع لان هذا محله الحقيقي

عزيزي المنتدى الشعبي للقصائد التي يكتبها وينشرها الشاعر نفسه.

تحيات اخوك: الغازي

وقصيدة جزله بكلماته

لكن كلام اخوي قاسي الباس ضرب قلب الصحة وانا من المؤيدين لكلام اخونا قاسي الباس

ولكم مني التحايا والاحترام

أخوكم / المهيني