(((ان كان نفسك هواها قـام ينحاها)))
بسم الله الرحمن الرحيم
السلام عليكم ورحمة الله وبركاته
قصيده فيها من البداوه الشي الكثير والجميل
ان شاء الله تنأل على استحسانكم واعجابكم
سمعت لي كلمة مدري ويش اقصاهـا=
حزت بصدري وانا مانـي بهارجهـا
لـوكـل كلمةالياجتـنـا طردنـاهـا=
بعنا الثمينـة بسعـر مـا يخارجهـا
لومـرت السمـع ماكنـا سمعناهـا=
ونقفـل الـراس عنهـا لايبرمجهـا
ومـن يـم هـذا لهـذا مـا نقلناهـا=
الناس واجـد وتلقـا مـن يروجهـا
من جابهـا بيـن خلـق الله وداهـا=
لوبه مراجل تـرى نفسـه يسمجهـا
من عامل الناس في سابق خطاياهـا=
يقعـد بـدار خـلا مـاداج دايجهـا
في كنة تشوي الجربـوع رمضاهـا=
تيبس غصون الشجر من حر واهجها
الناس بالحق حكم الشيـخ مارضاهـا=
ماترضي النـاس لوانـك تحججهـا
يالي تبي الطيبـة خذهـا وعطناهـا=
وخـل الطريـة طريـة لاتثلجـهـا
واقضب طريق الاوادم وامش ممشاها=
اتبع دروب العرب وادرج مدارجهـا
وارسم لنفسـك حـدود ولاتعداهـاا=
من حط نفسه بدرب الضيق يحرجها
وان كان نفسك هواها قـام ينحاهـا=
حط الاعنة بروس الخيل واسرجهـا
وفكـر بمنكافهـا قـدام مغـزاهـا=
واضرب حساباتها وتشـوف ناتجهـا
وكل بعضده يمـوح الدلـو برشاهـا=
وتلقا كبود الضوامي مـن يبرهجهـا
وان كان توك على صدرك تهجاهـا=
حنا ترانـا نـدرس فـي مناهجهـا
من يـم مصباحهـا نبعـد معشاهـا=
اليا قعـد راعـي الضلّـع يدرجهـا
لو هي صعيبة اليا نعاجـت عدلناهـا=
واللي تجـي مستقيمـه مانعروجهـا
نهتم فـي وزنهـا وابـرام معناهـا=
ومـن الكرستـال واللولـو نتوجهـا
مثل الجواهـر ليـا منـا نضمناهـا=
وسلوكها من جديد الـزري ننسجهـا
مخايـل ترتـدم والصـدر منشاهـا=
ان دك بالبـال داكــوك يهيجـهـا
واليا امطرت ضاقت الوديان في ماها=
تاخذ اليا الحول مايبسـت مدالجهـا
ان صدت الناس عنـا مااعترضناهـا=
ماتقفـي النـاس عنـا ونتولجـهـا
وان جاتنا الطيبـه بالطيـب زدناهـا=
الطيبه بالعسـل والسمـن نمزجهـا
وان جاتنا الثانيـة نصبـر ونرفاهـا=
يمكن اليـا فـاق راعيهـا يعالجهـا
وان عادهـا عـودة ماعـاد ينساهـا=
من حربة في صميم الصدر نولجهـا
مسمومـة يبلـش الدكتـور بدواهـا=
مايقنع الخبـل ليـن انـه يلامجهـا
تحياتي لكم
al-shmaly
