سؤال لمن عندهم معلومه

سلام عليكم ورحمه الله وبركاته

استفسار من الاخوان الاعضا واللي عنده معرفه في واقعه حدثت بين الظفير وعبده من شمر
صارت ديار الظفير شحيحه بالمراعي وقالو نبي نحيل الى الديره الفلانيه وهي بالقرب من ديار شمر
وقالو اذا وصلنا هذا الديره شمر تغزي علينا ونحن وياهم قوم

لكن لازم نسير في وجه واحد من شمر وسارو في وجه انثا من شمر واعتقد انها جعفريه مع خوالها الظفير
وطبعا حصل مشكله بين الظفير وفخذ من عبده و حسب المسولف يقول انهم قريبين للجعفر بس ماهم جعفر
يقول فخذ اسمهم الجنده

وحسب القول ان صار معركه على شان الوجه

الســـــــــــــــــــــؤال
هل القصه صحيح ام تلفيق وهل من المعقول الظفير يرحلون لديار شمر في وجه انثا
امس انا حضرت زواج في حفر الباطن وكان جالس عند ربع لاداعي لذكر اسماهم واحد سئلني
انت منين قلت انا ظفيري من الفلان قال نعم وبداء في سرد القصه كذا وكذا

وهذا قصص من زمان فايت ولابها على جميع الاطراف معيبه

يبدو أن القصة غير صحيحة


صحيح أن الجنده ديارهم قريبة من ديار الظفير و لكن لا أعتقد بصحة تلك القصة




ولا أعلم سبب إبراز تلك القصة بهذا الشكل ؟

------------------
أبو فهد الهمزاني

والله ياعزيزي يانواش اسمح لي بان اقول الاتي
ان حصلت مثل هذه القصة سينفيها اغلب الظفير وان انت صدقت بها!
لان هناك من يرى بان هذا الامر -امر وجه المرة- غير مقبول في العرف القبلي!
وان لم تصدق هذه القصة ستحصل مناوشات واطلاق نار حدودي نحن في غنى عنه!
لهذا كله اقول لا فائدة ترجى من مثل هذه -الحفريات-!
اما فخذ الجندة وقولك اسمهم الجندة وكانك لا تعرفهم!
فاقول الجندة اخوان سعدى لايوجد من ينكرهم
حيث ان اسمهم في سنام المجد قد خطُ!.

لك تقديري وعذرا على حرارة الحرف!.

شكرا لمرور الاخوان

واليوم في الاجتماع الاسبوعي في استراحه الشله 7/5/2010 مـ بعد صلاة الجمعه وكان الموجودين
من مختلف عبده وفيهم اعضا من منتدانا هذا

وثبتو لي القصه كامله وفعلا الظفير رحلوا بوجه بنت جعفريه كانت مع امها
بعد طلاق امها من ابو البنت جعفري وتزوجها ظفيري وفعلا حصل ماحصل بين الجعفر والجنده

وليسى عند الجنده خبر بالوجه حتى جو الجعفر بدايه الامر وحصل ماحصل وبعدين تفاهمو ورجعت الابل للظفير

والوجه ماهو للبنت البنت قالت ارحلو لاتخافو انتم بوجه الجعفر

وشكرا ياخوان

اجيب على سؤالك نقلاً عن الراوي ابوعبيد / حمد العطوني

في مداخلته على موضوع الكاتب شرفان الشديد " مع التحية للراوي حمد العطوني "

الموجود في هذه االصفحة ؛ وانت اكيد اطلعت على الماضوع:)

اقتباس:

---

المشاركة الأصلية كتبت بواسطة حمد العطوني

قال الاديب عويد بن رميح الجنيدي :
راكب الي تبوج الدو بخطيه = حائلٍ منوت الي يدي امثالي
لازمن يم اخو قرحاء ملافيه = يم شيخ الضياغم طيب الفالي
(1) وين هايس ووبندر بحلت الهيه= وين هايس عريب الجد والخالي
عزنا بالضيغم من قديميه = وينكم ياضياغم يهل الفعالي
وين شيخان شمر لعن ابوحيه = ماحصل واحدن يثني على التالي
وقالن البيض تر ٍ الفرش مطويه يالسناعيس حامو دون الجلالي
مايحرب العدو هوش ٍ على الخيه = كود قبس ٍ يشيل القاع شعالي
(1) - اخو قرحاء شيخ بادية الضياغم بعيجان ال علي
(2) -هايس وهوالشيخ هايس بن عباس ال علي من اكبر شيوخ شمر
وال علي اقدم شيوخ شمروهم اوال امارة عرفة في جبل شمر
قبل حكم ال رشيد
(3) - بندر هو الشيخ بند بن سعود ال سبهان واسرة ال سبهان من ابرزاسرشمر
في حائل والرياض وجدة والطايف والمدينة وغيرها من مدن المملكة السعودية
وهم من ابناء غالب ابن خضير من الجعفر؟
والقصيدة قيلت عام 1372هـ وانا اخبره ـ حمد العطوني ـ .
سبب القصيدة هو انشقاق الجنده عن الجعفر بسبب تعرض الجندة لبعض
الظفير هم بوجه بنت محمد العطوني عند ماكانت مع خواله الظفير وعمره ثمان سنوات
وكان فيه سنة من السنين كان الربيع يم ديار شمر
وديار الظفير محل وصار راي خوال بنت العطوني يرسلون مراسل وياخذو وجه من شمر
كاعدات القبائل والعشاير البدويه
وقالوخوال بنت العطوني من الظفير يابنت العطوني نبي نسير بوجه والدك محمد العطوني
وقالت سيرو بوجه ابوي وعند مادخلوا الظفير حدود شمر
اعترضوهم الجندة الظفير وخذوهم , عند ماوجدالخبر محمد العطوني فزع جماعته الجعفر
وتناوخو هم والجندة عدة مناويخ وعند التالي رجعو الجندة حلال الظفير
وبعد هذه المشكلة انفصلو الجندة عن الجعفر وحدث بينهم وبين المفضل بعض المشاكل
على عهد قاطي بن جبرين شيخ المفضل
وعلى هذا قال شاعر الجندة عيفان بن درويش هذه القصيدة:
ياراكب من عندنا فوق نساس000عليه من وصف الوضيحي تهايا
يلفي لقاطي معرب الجد والساس 000يماشبع في رفته من هفايا
لون خشمنا يلمسه كل لماس (1)00 كان ما جينا من الضياغم طنايا
خليت سيف الهند الي يشضف الراس000يودع عضام الراس شتن شضايا
حنا ضياغم مابنا صفر وانحاس000عيال الجنيدي الي يحد السرايا
والقصيدة اطول من ذالك
ــــــــــــــــــــــــــــــــــــ
( 1 ) المقصود كان ماجينا من الضياغم طنايا
يقصد زعلهم على الجعفروالمعنى ان الجعفر هم الضياغم من عبدة
وان الجندة من الموالين للجعفر, وهذاالكلام لاينفى عبدة من انسابه الاخرى انتهى )

---

والعهدة على الراوي:wallah_hoo:

ولكم التحية

ماقصر اخي راعي الوقيد بالرد


وفقكم الله


الراسي

الاخ راعي الوقيد
الاخ بشير اللويشي

اشكركم جزيل الشكر وجواب العطوني في موضوع اخر ويمكن يكون صح او خطا
حسب قول العطوني ان البنت قريبه له او تكون بدمه القرئب بمعني ان الظفير
رحيلهم من ديارهم بوجه جده او جد ابوه

وحسب الروات ان الظفير سارو بوجه الجعفر ذلك انتظر مشاركه بعض الاعضا المختصين
بهذا الشان

مثل بن غسلان
او الحيمري
او الرويتع

انتم اكيد تقولون ليه هذا الظفيري ملزم على هذه القصه انا عندي كتب
روايات قصه وبيت ويلزم التاكيد من كذا مصدر خصوصا من الاعضا الذي
لايوجد عندهم اخذ خواطر يعطيك القصه هي وحلوه ومره علما ان هذه الايام
المجامله هي المطلوبه واخذ الخواطر والشي اللي مايمس احد ولاينقص احد

وشكرا
اخوكم نواش الظفيري

هلا وسهلا ارحب يابو ساري
القصه 100%100 صحيح وهذي معروفه عند الظفير وعند شمر قاطبه وقصايدها كلها مدونه على هذا المتندى

الظفير صحيح قالو لبنت محمد العطوني اذا جانا من شمر قوم نقول حنا بوجه ابوك بمعنى حنا بوجه محمد العطوني الجعفري يعني ويعتبر اي جعفر له الوجه ومسؤول عن كلام بنت العطوني امام الظفير وهذا سلم جميع القبايل

والرجال قالو الدخاله بالواء والكفاله بكيفك

لكن الجنده ماعندهم خبر بالوجه واخذو ابل الظفير وعلى راسهم بن عفيصان شيخهم وفزع واحدن من الظفير يخبر اليتمان يعني الجعفر

وراحو يم اخوات سعداء واخبروهم ان الظفير بوجهنا وقالو الجنده وجهكم وجهنا وردو الابل الى الظفير

هذي الزبده من القصه كلها
وانت يابو ساري تسلم
وسلام عليكم

هلا والله ببومنيف
حمدالله على السلامه ابطيت بروحتك للشرقيه انت بعمل واللا دور راعي الحسا
ههههههههه هههههههههه

واشكرك على الرد واشكر جميع من شارك بهذا الموضوع واتكلنا على الله
بتدوين المعلومه


نواش

اقتباس:

---

انا عندي كتب
روايات قصه وبيت ويلزم التاكيد من كذا مصدر خصوصا من الاعضا الذي
لايوجد عندهم اخذ خواطر يعطيك القصه هي وحلوه ومره علما ان هذه الايام
المجامله هي المطلوبه واخذ الخواطر والشي اللي مايمس احد ولاينقص احد

---

وبعدين

اقتباس:

---

واشكرك على الرد واشكر جميع من شارك بهذا الموضوع واتكلنا على الله
بتدوين المعلومه


نواش

---

المعلومة التي دونتها بعد الاتكال على الله هي جزء من المعلومة التي اوردها الراوي ابوعبيد!!

لكن ماندري وين راحت الكتب والروايات وقصة وقصيدة اللي عندك يانواش بعد افادة اخونا الحيمري؟؟