ماتت وهي تحتضن اغلى دفاترها
الخبر:
وفاة 4 طالبات بالإضافه إلى وفاة سائق السياره المتسببه وشقيقته حيث كانت الطالبات متجهات من محافظة طبرجل إلى محافظة القريات مسافة 150 كلم وذلك لعدم وجود كليّة تربيه في محافظه يسكنها 75 ألف نسمه
جوارحي يافهد فاضت مشاعرهـا
................................. مما جرالي تفجّـر سدّهـا العالـي
ولو ما إنحدر سيلها ماني بعاذرهـا
................................. حزني طغى والخبر بالحيـل قتالـي
هات الدفاتـر ولاتنسـى محابرهـا
................................. وأنسخ على أوراقها همّي وغربالـي
من قصةٍ جوّضـت قلبـي مآثرهـا
................................. قصّة فتـاةٍ بريئـه دمّهـا سالـي
أكبر طموحاتها وأغلـى جواهرهـا
................................. حلمٍ سعت له ولو مشوارها طالـي
مافكّرت بالحواجـز لـو تعثّرهـا
................................. قـوّ الإراده يخلّـي دربهـا خالـي
مير البلا من أمورٍ جابـت آخرهـا
................................. تعال وإسمع وش اللي صار بالتالـي
قبل الفجر قامت تسـرّح ظفايرهـا
................................. تضحك ونور الأمل في وجهها يلالي
صلّت وجتها امّها تبغـى تبخّرهـا
................................. دعت لها وودّعتهـا ربهـا الوالـي
وراحت مع الباص والعاده يأخرهـا
................................. إلا إذا زوّد السرعـه بالأميـالـي
بعد المسافه وضيق الخـط كدّرهـا
................................. ميّه وخمسين كيلـو حالـي حالـي
وفجئه بلا سابق إنـذار بمخاطرهـا
................................. حادث شنيع إنتهت به كل الآمالـي
ماتت وهي تحتضن اغلى دفاترهـا
................................. هو من حفظ سرها في كل الأحوالي
كانت تزخرف على أوراقه خواطرها
................................. في كل ليلـه لهـا قصّـه وموالـي
مثل الزهر حلمها غيمـه وماطرهـا
................................. لكن ظلمها الخريف وحظها مالـي
وأسبابهـا مالهـا شـيٍ يبـررهـا
................................. إلا الظليمه ومعها بعـض الأهمالـي
والمملكه عندها ثوره.. مصادرها :
................................. الأيدي العامله مـع روس الأموالـي
وش اللي يمنع طبرجل لاتسايرها.؟!!
................................. سكّانها مسلميـن ودمّهـم غالـي
تعدادها لو بعض هالنـاس صغّرهـا
................................. خمسه وسبعين ألف بوقتنـا الحالـي
إبنوا بها جامعـه نسبـه لحاضرهـا
................................. ولا إفتحوا فرعها صرحٍ للأجيالـي
اليوم دار السعـود الخيـر غامرهـا
................................. تكفى يابو متعب الموضـوع قتّالـي
نبغى تبنّـى القـرارات وتصدرهـا
................................. حقن لدمانـا وتخفيـفٍ للأهوالـي
عسى فعولك إله الكـون يآجرهـا
................................. ويجزاك عنّا وتكسب راحـة البالـي
جوارحي يافهد هـذي مشاعرهـا
................................. سبّة فتاةٍ قتلهـا بعـض الأهمالـي
قبل أمس كانت تسلّى مع دفاترهـا
................................. واليوم تحت الثرى في رحمة الوالـي
الشاعر / متعب النصّار
