كلي عنا وجروح وآلام وأحزان
كلي معاناة الغريب وهمومه
كلي هواجيس وغثا بال ولهان
شفقٍ شفوقٍ شافقٍ من يلومه
كلي امل مفقود بوجية يتمان
اللي فقد شوف الأهل والأمومه
كلي مواجع من تصاريف الأزمان
يوم ادبرت ما ساعدتني عزومه
كلي فراق وبعد بعيون خلان
ذكرى قديمه ما حياتٍ رسومه
كلي وله لمشاهدة ذيك الأوطان
اللي عليها اشتاق في كل قومه
مشتاق له لوهي صحاري وبران
حيث الطفولة عشتها في كمومه
لا من ذكرته غرق الدمع الأجفان
ذكره يشوقني لعالي رجومه
له في صميم القلب موطن ومسكان
وله في عيوني شوق محدٍ يرومه
لا حل طاريه وذكره على اللسان
يزومله قلبي ثمانين زومه
دارٍ بها ميلاد شاعر وفنان
فيها القصايد ترتشف من غيومه
أبعدت عنها واحسب البعد برهان
اثره يشقي حالت اللي يهومه
لا جيت اسولف قصته لقرب انسان
ضاقت بي الدنيا وغابت نجومه
قصته قصة مالها أي عنوان
قصه غريبه في حشاي محكومه
من الطفولة ما نطقته بديوان
ولا جبت سيرتها وخافي علومه
كتمتها في داخل القلب كتمان
وخليتها لهل المعاني اخصومه
حامد بن طرقي الذرعي الشمري
