ياطوال الاعمار ان شالله
فيه قصه بحثت عنها مع الشيبان بعضهم موجود وبعضهم الله يرحمه وتراودني اني اكتبها قبل فتره حوالي 3سنوات حتى قابلت ولد اللي جرت عليه القصه قبل رمضان 1430 وسئلته عن قصه والده واكدلي هذه القصه ولد صاحب القصه ماهو صغير حوالي 75 سنه والده متوفي له فتره ماهي قصيره حوالي 40 سنه الله يرحمه
القصه
عقيل بن عيد الجعفري من عبده من شمر كان احواله الماديه ظعيفه وكان يدور من يسرحه في ابله مقابل شرط يدفع له صاحب الابل اما بعير او فلوس حسب الاتفاق بينهم
وسرح في ابل احد شيوخ القبايل ؟؟؟ وعند ماجا فصل الصيف (( القيض )) نزلو جميع القبيله على احد الابيار اللي فيها الما وهو مارد للبدو يسمونه ((( البريت ))) شمال الصحن وجميع قطعان هذه القبيله ترد على هذا المارد متخالفه على شان الما يكفي الابل وتسرح الرعيان مده ثلاث ايام والرابع يردون يم العد اللي عليه اهلهم وهكذا
سرح عقيل بعد ماشربه ابله اللي هي ابل الشيخ وثاني يوم وهو بعيد عن العرب ولا حوله احد وقته عقب العصر شاف اول ابله تجنب عن وسط هاكالتلعه فيها شجر ونزل من ذلوله وراح يم وسط التلعه وشاف هاكالحرمه تحت هاكالشجره وقرب لها يمار بجنبها نقعه دم وقرب شوين لها يمار تون سما عليها وسئلها ولاترد
راح يم الذلول وجابها عندها ونوخها ونزل القربه وقاب يغسل وجها ويصب على راسها ويسقيها حتى فتحن عيونه ونظر لها قال انتي مابك خلاف ان شالله قالت له البنت انا صويبه مضروبه بخنجر عدة ضربات قالها ان شالله سلمتي وجاب عباته من الذلول ولفه بها بعد ماطمنها قال انا اخوك لاتخافين ويحلب لها لبن ويعطيها خبز وتمر ونزل ثوبه وقطع منه ويلف جروحها
وامرح هاكاليله عندها والبنت قامت تحكي بس ماتقدر تمشي قالها عقيل انتي سلمتي لكن وش السالفه قالت اسمع ياشمري قاطعها الحكي قال وش دراك اني شمري قالت اعرف راعي الشيخ فلان وانا بنت فلان واللي سوابي كذا اخوي فلان اتهمتني زوجته باني فعلت سالفه شينه مع عشيقي فلان وانت تعرفه وخاويته في الابل لكن انا والله ياشمري اني بريه لكن اخوي صدق زوجته وجابني هنا وطعني بالخنجر وخلاني على اني ميته قالها عقيل انتي عندك الما واللبن والتمر وان شالله اجيك الصبح
عقيل شد الذلول وجود بطانه وراح يم العرب باليل وخلا البنت تحت شجرته والابل ماعنده احد يوجد للشيخ بنت له خيمه داخل بيت الشعر وبنت الشيخ اسمها (((((( قطنه )))))) مايحتاج اكيد يوم عرفتو اسم بنت الشيخ عرفتو منهو شيخه
وياصل العرب باقي من الفجر وقت وينوخ الذلول خلف بيت الشعر ويعقلها ويروح يم بنت الشيخ يمار نايمه ويقعدها وهي تقعد قالت له انت عقيل قال نعم قالت لك سنتين معنا ماسويتها ياشمري قال اسمعي حتى لو انتي مصوته لي ماسويها
قالت وش عندك قال بنت فلان لقيتها براس الفلات مطعنها اخوها وتاركها على انها ميته والله انغذها قالت اسمع القابله جبها لي ولاحد يدري بك وفعلا نكس وجابها الليله الثانيه عند بنت الشيخ وصارت عندها حتى شفت تمامن وبنت الشيخ اخبرت والدها بالسالفه كامله
امر الشيخ على عبيده يحضرون والد البنت وسئله الشيخ يافلان وين بنتك قال ماتت والشيخ يصوت للبنت قال هذي بنتك قال نعم وهو يبكي قال حسب الله على ولدي وزوجته قال الشيخ جيبو لي فلان اللي هو عشيق البنت قال لبو البنت يالله زوجها فلان قال والدها تمون ياشيخ انت ابوها وانت تمون علينا جميعا
وهي تكلم البنت قالت جميع المهر اعطوه الشمري لانه هو اخوي اللي ماجابته امي قال الشمري والله ثم والله اني ماخذ من مهرك اي شي
على فكره شيخ القبيله احضر اخو البنت وزوجته وزوجه اخو البنت اعترفه انها ظلمتها بعد مالشيخ حطها في وجهه ان عمرها ماعليه وقام زوجها وطلقها قدام الشيخ
ســــــــــــــــــــلام
