عرض للطباعة
سمعت في احد المجالس شايب يقول
ياغرستن جباره @ والمي من تحته يجري
نذبح بها سنجاره @ يا جويهلن ماتدري
ونا استحيت لا انشده لانه كان الوقت غير مناسب لاكني كتبت البيتين بمساعده احد الاخوان بالجوال وقلت مالي الا مضايف شمر القى به الرواه اللي عندهم العلم الاكيد
خلف الرويتع وابن غسلان والمطني والغفيلي مشعل ولايهون باقي الربع:)
ارجو من اللي عنده خبر السالفه وباقي الابيات لايبخل علينا
ودمتم بخير
هذي بارك الله فيك ياولد البدو حداة بني تميم يوم هم يبون ياخذون الحفير من الزميل من ابن ثنيان عقب ماهو متفق معهم على الزرع هم يزرعون والارض لابن ثنيان وكلن له النصف وبعدين طمعوا بالارض ويوم جاء وقت نزلت البدو على الماء وارسل ابن ثنيان الرواة للحفير وامرح كلن عند حضريه قاموا بالليل وشققوا روي الرواة وقعدوا يحدون هالحداة
ياغرستن جباره @ والمي من تحته يجري
نذبح بها سنجاره @ يا جويهلن ماتدري
وراحوا الرواة لابن ثنيان وعلموه وقال انتم يالزميل تفرقوا على هالجيان وانا ابي انزل عليهم ويامني اندبت لكم تعالوا وفعلا ابن ثنيان نزل عليهم واكرموه ويوم جاء وقت الصفري والرحلة للمندى ذبح لهم ابن ثنيان لهم ناقة وقال انتم قطعوه واطبخوه وطلعوا الرجال والحريم والوغدان ابن ثنيان يوم عزمهم ارسل لزميل وقال يامنهم طلعوا كلهم الضحى يم الناقة يبون يقطعون ويطبخون ادخلوا بالبيوت وكلن ياخذ قليبه ودخلوا الزميل البيوت يوم طلعوا للناقة ويوم شافوا انه حيله قالوا بقتنا يابن ثنيان قال انا مابقتكم انتم بقتونن وانا هالحين فكيتكم من الزميل لا يذبحونكم وهالحين انتم بوجهي لياما تاصلوون الديرة اللي انتم تبون قالوا نبي قفار وراحوا لقفار ومنه للسبعان . ابن ثنيان اللي ان سمعت ان اسمه زايد ولد كنعان جده مطلق اللي عليه شيخة الثنيان
هذي الرواية اللي عندي ياولد البدو بإختصار
والله اعلم واحكم
تقبل تحيات اخوك / المطني
حياك الله ياولد البدو
وشكراً جزيلاً لإخي المطني على ماذكره هُنا فكل ماتفضل به صحيح وما سأرويه هنا لايختلف عما ذكره ولكن بتفصيل أكثر للقصة وهي :
ياغرسة جباره والما تحتها يجري
نذبح بها سنجاره ياجويهلن ما تدري
( قصة هالبيتين طويلة ومعروفة عند شيبان الزميل وشيبان قبيلة بني تميم والقصة تعود لإيام الشيخ زايد بن كنعان بن مطلق بن ثنيان شيخ الزميل . وقد كان هناك إتفاق مُسبق قبل ذلك بعقود إتفاق كان بين الشيخ مطلق بن ثنيان جد الشيخ زايد مع المفيد من قبيلة بني تميم حيث جو يم الشيخ مطلق بن ثنيان وطلبو الحفير منه بالقدمه والزميل كانوا قد ملكوا الحفير آنذاك فقدمهم بالحفير قدمية قدم به المفيد من بني تميم عشان يغرسون غراسه طبعاً الديرة له ولربعه وعشيرته الزميل وهو رجال بدوي وهم حضر وقال لهم الديرة لي وأنتم حضر أفلحوا وأنا وأياكم على النصف بالنخل والزرع لكم فتكافلوا بني تميم وتشارطوا هم والشيخ مطلق ابن ثنيان وأستمر الأتفاق على هالحال ستين سنة فكان أهل الحفير الزميل كانوا بدو يرحلون وينزلون وكانوا حسب الإتفاق كانوا وقت الصيف كل سنة ينزلون على الحفير كل زميلي بدوي ينزل عند حضريه من بني تميم بالحفير فيكون الزميلي والحضري خشرا بالماء والنما وهذا بحسب الإتفاق ويا منه لاح البارق رحلوا البدوا من الزميل يدورون المراعي لحلالهم وهكذا راحت السنين بسرعة وعلى وقت الشيخ زايد بن ثنيان (حفيد الشيخ مطلق بن ثنيان) .. طبعاً كثروا بني تميم وقووا بالحفير (فقوت شوكتهم وصاروا الأجواد بالحيل يهقون بروحهم وهم رجال شجعان ويفعلون مانسبهم فالحق يقال) ولكنهم خالفوا ماكان بينهم وبين ابن ثنيان من أتفاق وهموا بطرد أهله منه وطرد أهل الديرة (وهم الزميل) فقالوا بني تميم خلونا ننفي هالبدوا إلى الأبد من الحفير فقاموا بالفعل بتجهيز أنفسهم لطرد أهله منه حيث بنو سور حول الحفير وأحاطوها بالمتاريس وحطوا بالسور مرابيع حرب فصار لهم ثلاث ظهور بالحفير وحين جاءوا الزميل وقت الصيف ونزلوا بالنفود قريب من ديرتهم الحفير وكل راوي ينوخ على حضريه فرووا العشاء وناموا عشان يجهمون الغبشة (الصبح) فجوهم بني تميم وكانوا التمايمه متواعدين بالليل فشقوا قرب الماء بالسكاكين وقطعوا روى الرواة وشققوها بخيازرينهم ويوم أنه صدرت السواني بهالثلث الأخير من الليل ويوم أنه صرت المحاحيل غنت السواويق غناة :
ياغرسة جباره والما تحتها يجري
نذبح بها سنجاره ياجويهلن ماتدري
وكانوا رجال بني تميم يعرضون عرضه بهالبيتين دايماً في الأيام التي تلت ذلك الحادث وذلك من أجل أن يظهرون مدى ثقتهم بأنفسهم وجديتهم في هالأمر وأنهم ناوين الشر وناوين نفي وطرد الزميل من ديرتهم لدرجة أنه حتى عيالهم حفظوا هالبيتين وكانوا يغنون هالبيتين من كثر ترديد آباءهم لها على ألسنتهم في ذلك الوقت .
المهم يوم قاموا الرواة الصبح يبون يشيلون يم أهلهم بالنفود فإذا كل قربهم وصملانهم مشقوقة فقالوا الدعوى معبية وبني تميم ناوين طردتنا من ديارنا وكلً ركب ذلوله وفضوا بلا ماء وراحوا يم أهلهم وأخبروهم وكان وقتها الشيخ زايد بن ثنيان موجود يسمع فعلموه باللي صار ومافعلوا بني تميم بهم فشاش الزميل يبون الحرب فقال لهم بن ثنيان أقعدوا خلونا نتوكد من هالأمر هذولا بوجيهنا (يقصد بني تميم) وماحنا مناحين لنا ضلع وبعدين هذي متاريس وقصور وهذولا ماسووا هالشيء وتبينوا لكم بهالأفعال ولاقاموا يعرضون الا أنهم مجودين أنفسهم وهاقينن بأرواحهم هذولا (جدار ونار) بانين سور وحاطين متاريس ومجودين أنفسهم بالسلاح و(بالفتل) وكان سلاحهم أكثره من الفتل (فتايل) .. وقال ابن ثنيان بعدين هذولا حنا من أول جايبينهم بوجهنا ولايصير ناخذهم ونستحل (دماءهم وحلالهم وهم بوجهنا) ولكننا في كل الحالات نبي نرحلهم عن ديارنا بحول الله تعالى ولكم علي ماخليهم يقعدون عقب اللي سووه بكم ولكن أنتم يالزميل هالحين تفرقوا بهالجيان وأنا أبي أنوخ وأنزل عليهم براسي وأشوف الأمر وأنتم تفرقوا وأتركوهم ياما يجيكم مني ندب وياجاكم ندبي أبدأوا بالمسير لديرتكم وأدخلوها .. فتفرقوا الزميل حول الحفير ينتظرون مندوب الشيخ ابن ثنيان يامرهم بالمسير ودخول ديرتهم الحفير فمنهم اللي ورد قنا وأم القلبان واللي ورد موقق واللي أرتفع يم طوية والرمادة وأكثرهم نوخوا بالفرش حدري الحفير ينتظرون .. فرحل الشيخ زايد بن ثنيان ومعه ثلاث بيوت ونزل بدايتاً باللغف غرب الحفير وأنتظر عدة أيام وبعدين قرب أكثر فنزل بالصفيح قريب من الحفير وخلا أهله ياردون الماء على حضرية بالحفير وأمر الرعاة يوردون حلاله الماء على حضري بالحفير وكانوا الزميل قد تفرقوا وتنحوا يمين وشمال عن الديرة وحولها وابن ثنيان يرحل وينزل شمال من الصفيح وأخيراً نزل بالنقرة وسط الفلاليح بالحفير لكن كان المكان متقي عن الديرة شوي وكانوا على وقت حصاد الزروع وقت رطاب التمر وإتمارة النخل ويوم نزل عليهم أبن ثنيان وكان براسه أكرموه وصاروا يتداورونه فقال أنتم خلصتوا مني وهالحين جاء دوري أنا أبي أكرمكم أبي أسوي لكم كرامة وهو كان منزله الأخير متشطر عنهم شوي بنفود الحفير بمكان قريب جداً للديرة لكنه متقي ومايشاف وكان متواعد مع ربعه الزميل ينتظرون يامنه جوه ضيوفه من بني تميم يعقبونهم الزميل ويدخلون ديرتهم ويالونها وكانت العادة أنه كل سنة ينزل عليهم وقت المحضار ويذبح ناقة إكراماً لهم وكانت عادة له ولجدوده من قبل فقال ياجماعة أنتم لكم حق علينا وحقكم اليوم مايطبخه ويعمله الا أنتم وهاللي تشوفون جيتكم لحالي ومستعجل ونبي نرحل باكر نسرح للحمض وهالحين أبي عقر لي ناقة بمراحه ومامن اللي يطبخه لكم فأنتم ليا حطيتم عن سوانيكم هالضحى تعالوا أطلعوا أنتم وحريمكم وصحونكم وقدوركم وسنعوا غداكم فأنتم (شغالته حظايته أكالته) وأبقيم اليوم أغديكم عليه ونرحل باكر نسرح للحمض فقالوا مايخالف يابن ثنيان ويوم أنهم وافقوا على هالراي ركب ابن ثنيان بالليل لإقرب مكان للزميل يخبرهم وقال يامنه جاء تالي الليل يصيرون بحجاج المقناة يندفنون بالطعس بالبراخيص ولياشافوا الرجال والحريم والوغدان بإثرهم يمسكون الديرة ويعقبون بني تميم على الحفير ويالون ديرتهم بدون دماء ويرجعون حقهم ولجل لانذبح ولانذبح هذا إن هداهم الله وإلإ فالحرب بيننا وفعلاً جوا الزميل بقرب الحفير وكنَوا بفرش معدِي وسمي يهالأسم لإن الزميل عدوا معه خور معدي جنوب الحفير ويوم حطوا عن سوانيهم الضحى وجوك رجال بني تميم اللي بالحفير جوك كلهم رجالهم وحريمهم ووغدانهم وتكوموا عند الشيخ زايد بن ثنيان وكل واحد ومعه قدره وصحنه كل جايبه على معيده راحوا يم ابن ثنيان وقطعوا جزورهم وركبوا قدورهم ومعهم حريمهم يطبخون لهم . ويوم شافوا فريس الزميل اللي نازلين بفرش معدي بالطعوس تالي بني تميم وكان تالي اللي طلعوا هم الوغدان جوا يم العزيمة فتنهد فرسان ورجال الزميل تنهدوا مثل أنهدادة البل على حوض الما ودخلوا الديرة (الحفير) وولوها ورجعوا ديرتهم من غير حرب أوسفك دماء وكل زميلي راح يم قليبه وفتح داره وصاروا بالمناظر فقضبوا المناظر وقضبوا الديرة وكل واحد فتح داره أما بني تميم فعلى ماقلطوا وتغدوا فإذا بالصياح فقالوا وش الأمر فقال ابن ثنيان: يابني تميم أرض الحفير أنزلت شوفوا ربعي الزميل بحروهم ولوا ديرتهم ولايروح أحد منكم يذبح تروا الديرة مأهولة . ولوها أهلها الزميل ولوا ديرتهم وأنتم يابني تميم لكم مني الأمان لكم الله وأمان الله ومايجيكم الا جداد السلامة . وأنتم بوجهي مايوخذ لكم ولاعقال . وأنا لا أنا ذابحكم وماسويت هالسواة الا لإني خايف على أرقابكم من الزميل ونبي نحقن الدماء .. فقالوا بقتنا .. فرد عليهم وقال أنتم اللي بقتونن يابني تميم وأنتم اللي غيرتم نياتكم وغدرتم بنا وخنتم بالعهد اللي كان بيننا والباديء أظلم واليوم أطلعوا من ديرتنا. فقالوا حنا بوجهك يابن ثنيان فقال أنتم بوجهي ولكم الأمان وخلوا حريمكم يرحن على سوانيهن وشيلوا كل اللي لكم وكل اللي بالبيوت شيلوه على معاويدكم وأطلعوا من ديارنا واللي مايشلن معاويدكم أنا أزملكم زمايل من عندي أزملكم وأزهبكم باللي تبون وتحتاجونه من حلال ومال وسيكون كل شيء تبونه مني حاصل بحول الله تعالى والله الله يستر علينا وعليكم والديره ولوها اهله وأنتم بوجهي من هنا ياما تعقبون الجبل وأطلبوا الديرة اللي تبون قالوا نبي قفار .. قال وش يعوزكم قالوا يعوزنا خمسين جمل فقال لكم ذلك وأعطاهم فوق ذلك زمايل وصملان ودفع معهم ولده هذال بن زايد رافق بني تميم لين نزلهم بقفار مانقصهم ولاخيط وبعد ذلك راحوا للسبعان حيث قدمهم بن طواله بالسبعان وديرة السبعان في بطن جبل سلمى وبقي بني تميم في السبعان موجودين إلى يومنا هذا وصاروا من أهل الديرة ديرة(السبعان) بسلمى وصارت لهم المصاهره والنسب مع المسعود من الأسلم بل أننا نجد اكثرهم يعتبرون اهل السبعان مساعيد وليس تمايمه وذلك من زود حبهم ومودتهم لهم وطبعاً هذه القصة رويتها للتاريخ فقط وإجابة على سؤالك ياولد البدو وحتى لايكون هناك لبس في الموضوع عندما نقرأ البيتين تختلط على بعض الناس الأمور ولا نريد بها أن ننقص من شأن أحد أومن شأن قبيلة بني تميم والنعم برجال بني تميم _ رجال شجعان ويفعلون وغنيين عن التعريف وماهم بحاجة للمدح فقد سبقوا ذلك بكثير ..
هذه قصة البيتين وعذراً للإطالة .
تحياتي لك وللعزيز المطني .
وتحية للجميع .
اخي ابن البدو اشكرك حيث انك السبب في اثراء هذا الموضوع وصدقني الاخوان المطني وابن ثنيان احاطو بالموضوع كاملاً ولااعتقد ان اي راوي اخر لديه اكثر مما قالو الاخوان المطني ومطلق
واشكر الاخوان المطني ومطلق ابن ثنيان واخص مطلق فقد روها بكل تفاصيلها وحتى لو روايتها لن اصل الى مواصل لها المطني ومطلق ابن ثنيان تقبلو احترامي
بيض الله وجيهكم يا المطني ويا ابن ثنيان
والف نعم بشيخ سبع الجموع
وشكرا للاخوان اللي اثرو الموضوع
اشكر كلن من الاخوه
المطني
مطلق الثنيان
على الافاده حول سؤالي فلهم مني جزيل الشكر والعرفان
واحب اشكر الاخوه الي مروا على الموضوع وعلى راسهم الاخ الكبير
خلف الرويتع والاخ ابوروز والاخ الشميلي
دمتم بخير
[align=center]
اخي العزيز ولد البدو
شكرا لك على تساؤلك الذي حضينا من خلاله
لقصه نادره .. نشتاق لامثالها من نوادر المورورث
والتي بسببها ايضا سعدنا بوجود اعضاء ذوو اطلاع
امثال اخواني المطني ، و مطلق الثنيان
ورحم الله الابطال اللي ارثوا لنا مجدا تليدا
رحم الله ابن ثنيان ( شيخ آل زميل )
ورحم الله اموات المسلمين
ــــــــــــــــــــــــــــــــ
لكن لدي ملاحظة بسيطه كتعقيب على اخي مطلق ( وقد حاولت ارسال رساله خاصه له
ولكنه مغلق هذه الخاصيه )
المهم ... اخي مطلق طرحك وشرحك جدا رائع وممتع وشيق للمستمع والقارئ على حد سواء
ولكن يالغلا .. حسب ماسمعت من شيبان اللويش اللي منهم والدي رحمه الله
نقلا عمن سبقه من ذوو الثقه والاطلاع على الموروث الشعبي بشتى مجالاته
ان فرش معدي سمي بهذا الاسم نسبه الى معدي بن منيس اللويش
عندما كان جلاوي بسبب الدم وبعد ان صلح موضوعه وعادت المياه لمجاريها
عاد الى جماعته اللويش خاصه وآل زميل عامه وكان اكثرهم في بلدة الحفير
ونزل بالقرب من الحفير في ذلك الفرش والذي اطلق عليه اسم فرش معدي
نسبة اليه بعدما نزل فيه .
المهم ... لا اقول الا شكرا للجميع على اثراءهم مثل هذه المواضيع
ودمتم بخير
الراسي
[/align]
موضوع ثري
بالسوال........والاجابات
بيض الله وجيهكم
ونعم بسنجاره عموم والنعم بشيوخهم
العفو اخوي بشير اللويشاقتباس:
المشاركة الأصلية كتبت بواسطة بشير اللويش
ومشكور على المرور
دمت بود