حفظ ورحمة رب العالمين

صبحكم الله بالخير جميع

بصراحة احترت وين أكتب الموضوع هذا لكن أهل الاختصاص أدرى بهذا الأمر واللي يامرون به أنا حاضرة

موضوعي ياجماعة وبإختصار جلست اليوم أفكر في حفظ ورحمة رب العالمين لعباده

وكيف سخر لنا ملائكة تحفظنا وتحمينا بأمره

الموضوع هذا أنا متأكدة إنه صار مع الكل مو بس معي أنا

والمواقف عد واغلط كثر شعر الراس يمكن لو الواحد ينبش في ماضيه أو حاضره

والله يعلم وش بيصير بعد في المستقبل

الموضوع هذا فكرت إني أكتبه عشان نشوف رحمة رب العالمين وحفظه لعباده

وعشان نحمد الله ونشكره على كل نفس نتنفسه والواحد لو دقق في النعم ما راح يخلص

وطلبي من الجميع واللي يحب يشارك أي عضو أو عضوة يقولون موقف أو أكثر صارلهم

كانوا قريبين من الخطر أو لا سمح الله من الموت وربي نجاهم بأعجوبة على مايقولون

وأنا ببدا بأول مواقفي لأنها صراحة كثيــــــــــــــرة جداً لكن اللي أذكره الحين واللي دوم تذكرني

فيه الوالدة الله يحفظها ويطول بعمرها ويبقيها ذخر لي ويعيني على برها ورضاها وطاعتها

هي والوالد الله يطول بعمره ويحفظه وياعلني فداهم

هذا ياجماعة يوم إني صغيرة في إجازة الصيف كنت متخرجة من روضة أولى وعلطول دخلت أول

المهم إني في الإجازة كان وقت الظهر والشغالة المفهية حقتنا الله يذكرها بالخير كانت حاطة

قدر فيه زيت يغلي على العين اللي فوق الفرن

وأنا من لقافتي فتحت باب الفرن أبي أشوف وش اللي بالقدر

والشغالة الله يهديها واقفة جنبي ولا حركت ساكن

المهم أنا ركبت على باب الفرن وإلا الفرن باللي فيه يطيح علي

وربي ستر علي .. أمي واقفة مكانها ياحياتي تجمدت ماقدرت تحكي صابتها كهربا برجولها

جا ببالها خلاص إني تشوهت وإلا مت وإلا جاني شي

بس الحمد لله إنه شي بسيط من الزيت جا على رجلي على القدم

وعبى مكان الحرق موية

طبعاً الوالدة يوم شافتني الحمد لله مافيني شي عاقبتني وحبستني في الغرفة

لين ما جا الوالد من الدوام وشافني وفتح لي باب الغرفة اللي كنت محبوسة فيها عقاباً لي على لقافتي

والله كل ما أتذكر الموقف أقول من جد إن الله ستر علي وإلا كان أنا الحين مقلية

فألف الحمد لله على حفظه وستره

وهذا كان واحد من المواقف اللي لما أتذكرها أقول سبحان الله على حفظه وحمايته للإنسان

صدق شي يخلي الواحد يعتبر

إذا عجبكم موضوعي شاركوني فيه وإذا ماعجبكم اعتبروا انكم ماقريتوه

وألف شكر للجميع

دمتم بود

وتقبلوا أرق التحيات

أختكم
نــ بنت الفهد ــوف

الحمد لله على السلامه اختي نوف

ومن المعروف ان الانسان معرض لكثير من الاخطار ...وسبب وجودها

اختبار وابتلا من العزيز القدير

وانا اذكر من الاخطار ....كنت صغير وكان يوم عيد وكان الناس تملائهم البهجه والسرور

وكان الحبيب ضيدان يبغي شراخياات((طرطعان))((قنابل)) ويستانس مع الشباب

وعيا على الوالد قالي انت رجال وعيب عليك هالخرابيط

قمت عاد انا ونفخت صدري....وقمت ,,,وجلست بالحوش

وقمت افكر قلت ايه انا رزال....يعني(رجــــال)
خل الشراخيات تولي (القنابل )...وانطلق واخذ الي اعبر منها
ادخل يدي بالمنضد حق الفرش واطلع ذاك التسعه حق الشايب(((مســـــــدس))

والمخزن مليان واقعد اطرد اعيال الشارع واقول لهم شوفو الرجال...عندي مسدس

واقعد ارمي الي بالمسدس وكنت اوجهه للاولاد الي بالشارع
والحمد لله لم يتضرر اي منهم ...ولكن ماعاد اشوف ولا ورع بالشارع

لمده يومين.....مدري وش عندهم.........؟
على بالهم العيد خلص ....ولا شنو السببب

حقيقة موضوع جميل .. في تذكر .. حفظ الله لعباده ..
بفضله ورحمته ..
المواقف .. كما ذكرتِ .. كثيره ..
وأنا والله يصعب علي حصرها .. فالحمدلله .. على حفظه ..
ولكن مادعاني للمشاركة سؤال .. أحببت أن أنال عليه جواب بكل صدق وتجرد ..
وبما أنك شاعره .. والشعار .. يقولون هم مرهفي الإحساس ..
فأريد جواب من هذا المنطلق .. كرماً لا أمراً ..
أعلم ويعلم الكثير بأن والدتك .. كاد قلبها أن يقف ..
من هول ما رأت ..ومن خوفها .. وفرط حبها لكِ ..
ولم تتخذ ذلك العقاب إلا كي لا تعودي الكره ..
وبما أنك صغيره في العمر حين ذاك ..
فالسؤال يكون .. هل أدركتِ لما عوقبتِ .. ؟؟
وهل كنتِ بحاجة إلى من يسكن خوفك .. ويعلمك خطورة فعلك .. حين ذاك ؟؟
أم من يعاقبك ؟؟
وما هو شعورك حين ذاك .. هل هو الخوف .. من ماذا بعد ذلك ..
وماذا عن ألم الحرق .. وألم العقاب ..
فما شعورك حيال كل ذلك ...

نتعلم .. وهنا مكان تعلم .. بإنتظار جوابك ...

السلام عليكم ورحمة الله وبركاته

انا صارلى موقف وناصغير جدتى الله يرحمه حبة تساعدنى دخلة خرزه داخل اذنى وجابة ابره وتبي

تطلع الخرزه خربت الطبله جة بتكحلها عمتها :) وهذا الى صار معي وفكره حلوه منك اخت نوف ان

نتذكر ايام الطفوله والمغامرات الى صارة والان الواحد وش يبي من الدنيا الارضاة رب العباد سبحانه

والحتام سلام

أخوي ضيدان التومي

ياحليلك والله إنك ضحكتني من قلب

لا وتسأل بعد ليش الورعان هجوا الله يهديك

زين بس اللي محد تصاوب

وزين اللي ماصاوبت نفسك

الحمد لله على حفظه وستره

أجل رزال هاه .. أنا أشهد والله ياضيدان إنك رزال ولد أجواد

والوالد الله يطول بعمره يارب ويخليه ذخر وتاج فوق روسنا يارب عمي أبو ضيدان مالقى يوزي الفرد إلا بمنضد الفرش

مسيكين مايدري إنك كلمة رزال طلعت عليه أغلى من بيع السوق

ياجعل ربي يحفظه ويطول بعمره ويخليه تاج فوق روسنا يارب

ضيدان ألف شكر على المشاركة وشرفت ياخوي وفعلاً أمتعتنا يارزال

دمت بكل التقدير والإحترام

أختك
نــ بنت الفهد ــوف

أخوي راعي البيرق

أولاً شرفني حضورك وردك الراقي ووجودك بحد ذاته شهادة فخر لنوف الفهد

ثانياً ياخوي بالنسبة لسؤالك

الوالدة ياعل يومي قبل يومها ربي حط فيها طيبة الكون كله

وأنا ياخوي على كلام الوالدة الله يطول بعمرها تقول إن تفكيري كان سابق عمري

ومن بديت أوعى على هالدنيا وأنا أعرف إن كل شي غلط له عقاب

وأنا كنت عارفة ومتأكدة إن الشي هذا اللي سويته غلط

وأستاهل اللي جاني وزيادة .. وفي نفس الوقت كنت مصدومة من اللي صار ومو مستوعبة إني للحين عايشة

يعني من قوة الصدمة والروعة اللي جاتني ما همني عقاب الوالدة لي ولا زعلني

لأني كنت في مرحلة صدمة .. كل الأحاسيس عندي متجمدة يعني لا زعل ولا رضى

حتى الألم ماكنت حاسة فيه

الصدمة سيطرت علي .. مابديت أحس بالألم إلا بالليل

وبعدين الحمد لله ما كان ذاك الشي اللي يشوه وإلا يستدعي إني أروح مستشفى

مع ذلك ودوني وتطمنوا علي

والله لو برجع للأشياء القديمة اللي صارت لي وفجعت أمي فيها أقول الله يستر إذا تزوجت وجبت بنت ماتطلع علي :)

فعلاً عذبت الوالدة كثير الله يقدرني بس على طاعتها ورضاها هي والوالد

وأمي وأبوي ما أوفيهم لو قدمت لهم روحي هدية بعد ماتكفي ولا توفي عشر معشار من حقهم

ما أقول إلا الله يقدرنا على برهم

شرفني وجودك ياخوي وألف شكر على الرد الراقي

دمت بكل التقدير والإحترام

أختك
نــ بنت الفهد ــوف

الحقيقة موضوعك جد جميل ... وجماله يكمن في بساطته .. وموضوعيته ..


وحفظ الله واضح متجلي للعيان ..

وأكثر ما يتضح حفظ اله في الاطفال ..

سبحان الله ..

كم تحصل حوادث لاطفال نظن انهم لن ينجو منها .. ويقومون معافين بفضل الله ..

ربما لان الله يعلم ضعف اجسادهم .. فوهبهم من احمايو مالم يهبه للكبار ..


انا شخصيا ..

عندما كنت صغيرا ..

صعدت على المكتبة اللي في صالة البيت ..

ونقزت منها على الارض وانا ماسكها بايدي ..

فطحت وطاحت المكتبة بالتلفزيون .. وباغراضها وزينتها فوقي ..

الكل ظن اني مت ...

لكن الله سلم ..

وخرجت معاى لا اشكو من شئ ...

لا ورحت للمدرسة يومها بعد :)

وذبح الوالد حفظه الله ذبيحة لوجه الله .. على سلامتي ..


اييييييه ذكريات قديمة


جزاك الله كل خير ...

نشكره ونحمده سبحانه وتعالى
لرحمته بنا وحفظه لعباده المؤمنين
فحفظ القلوب و الأرواح
و الأجساد فلا يصيبها الا ماكتب الله لها..
ومع ذلك تتجلى رحمته سبحانه وتعالى في أشد مواقف الحياة صعوبة..
موضوعك يخاطب الروح والعقل شاعرتي الجميلة نوف
ولا يسعفني القلم للتعبير ...أكثر
ونسأله سبحانه وتعالى أن يحفظنا ويرحمنا
وجزاك المولى خير الجزاء
لهذا الطرح الراقي المفعم بالانوار الايمانية

لي موقف
لكن التعبير عنه صعب و تصديقه صعب حيل..


لكن شي مهم بقوله لك
لما تذكرين هذي الامور دايم وتكررينها , شي ايجابي وفيه فايده للانسان


حمدلله علي السلامه اختي نوف

الذيب حياك الله ياخوي

والله يرحم جدتك ويجعل مثواها الجنة يارب

ياحبنيلها .. مايخالف وأنا أختك إذا فيه طبلة خربت عندك طبلة ثانية

وإذا تبي بس آمر نجيب لك مراويس وطيران إنت آمر بس

وبعدين وش اللي جاب الخرزة بإذنك

الحمد لله اللي جات على الطبلة بس ما زادت أكثر

وألف الحمد لله على سلامتك ياخوي

أشكر لك هذا التواجد الرائع

دمت بكل التقدير

أختك
نــ بنت الفهد ــوف