اعذر ليا عذرني صبر الراسيات
اشوف صورتك بين لحظة ولحظات
وتفز لك مشاعري من سباتٍ عميـق
والمحاني ترتجفلك خابره انك فوات
والمدامع صابره عن مسيلٍ عــويـق
والمعاني في سراديب الفكرصافنات
هايبٍ من حضورك وابتلع ألف ريق
ما محاك الوقـت ولا يغيّبـك الرفـات
اذكرك في نهاري وفي سباتي شهيق
يا خليلي إن تخـلى ساكنين الجافيات
ويارفيقي إن تعذر لي بالموانع رفيق
ويا سميرٍ بالسمرلي مـعــك ذكـريات
ويا خصيم بالمشاهد وبالسراير شفيق
ما شفاني مـن غـلاك رب الشافـيات
ولا نفعني وصف البــوادي والرحيق
ولا كتمت السر واعلنه حتى الممات
ولا تعيبن دمعتي ليا طـرا لـه دفــيـق
اعذر ليــاعــذرني صبـرالــراسيات
واسمح ليا سمح راع الحساب الدقيق
واذكرن في ما مضى من الخــاليات
ربما شفـع لي عـندك صدق الصديق
في غيابك.. احسد الثـكالـى الباكيات
وفي مجيّك.. لا تحمّلني مالا أطيـــق
من طلبني كلمتين..يستمــع للكافيات
وفي مقامك ما كـفاني جيب العـقيــق
ماكفاك انك سكنت القصورالمشرفات
معجبك جلستك على الضلع الرقيق؟
