البارحه عيني قزت عن منامه
عافت يابو نايف لذيذ المنامي
الحزن والتفكير دايم علامه
في وجه من حطت عليه التهامي
نفسٍ من التفكير ضاق انسجامه
الله يعينه يابعيد العلامي
والله يلوم اللي من الناس لامه
عسا الذي لامه يذوق الملامي
يامتعب الزحزيح راع الفهامه
يامعرب الجدين نسل الحشامي
ياشيخ يامشكاي نفسي مرامه
ترحل وتبعد عن قليل الفهامي
ترحل عن اللي يدعون الشهامه
خباث النفوس اهل الخناء والخمامي
اهل الخساسه والحسد والبعامه
اللي يدورن الخطاء والحرامي
النفس طول يالمنيعي صيامه
عامين انا والضد والرامي حامي
انا اكن المرجله والقرامه
مما يسبب للخبيث الخزامي
اهلاً هلا باللي لفاني كلامه
يامرحبا واثني عليه السلامي
ممدوح ابن سلمان راع الشهامه
شاعر بليغٍ مبدعٍ بالكلامي
وعقب الثناء والمدح اكتب علامه
واحطها قوسين فوق الوسامي
دنياك هاذي كل ابوها ملامه
صبحك سعيد وعند نومك امضامي
هذا زمانٍ فيه الاجواد ضامه
والا الردي يلقاء لذيذ المنامي
ناسٍ بها يدعون زين الفهامه
وتر الفهم عنهم بعيد المرامي
لامن مشيت الصبح قالو غشامه
ولامن مشيت الليل قالو حرامي
الغلطة اللي من بعيدٍ سلامه
الموت لاجت من خوال وعمامي
اضحك مع الطيب وعطه ابتسامه
والا الردي خله بدرب الضلامي
ودامك تكن المرجلة والقرامه
الحر مايزعله صف الحمامي
