وسياقها خمسين نيرة..الشمري جوزوه هويته..أهل العليا الفرجــه؟
وسياقها خمسين نيرة..الشمري جوزوه هويته..أهل العليا الفرجــه؟
[[خطوات على درب الإبل.....نقتفي أثارهم]]
سلســـــــــــــلة..... في حلقات
الزمان: في حدود 1330هـ - 1910 م
المكان: بادية العراق .
المصدر: من رجالات الكواكبه .
بطل هذه الحلقة: عيال بن هويشل من الفرجه من الرولة .
الحلقة : [[12]]
(( يقول الراوي ...ماعندي علم وكاد أنهم عيال(ن) لبن هويشل ,بس الوكاد الأكيد إنهم من الفرجه,هاك العيال الثنين إخوان راحوا يم جهة العراق يبون يشرون لهم أباعر , كل منهم معه خمس وعشرين نيرة ذهب (عصملي - مجيدي ) الكل منهم داسهن بلهن كيس تحت محزمه اللي تحت ثيابه (الحقو).
وهم يضيفون لهم راعي هاك البيت من شمر من عرب الشيخ الجرباء (من الجربان من شمر) اللي هو الطرفاني من العرب صار دربهم عليه[ سلوم العرب إن الظيف مايتعدى البيوت – يعاد هو غريب – أول بيت يناطحه من العرب يظيفه ] , الزبده يوم وصلوه ياهو وحيد أمه ولد(ن) توه على طلعته , ماشاء الله عليه حي فاله هاك الولد المذورع اللي زوله تنصبه, وهم وينوخون ركابهم عنده , ويقوم يهلي ويرحب بهم :ياهلا وغلا يالله أنت حيهم ياهلا ومسهلا ,ويقلطهم بالشق (الربعة ) وأمه على طول وهي توقد النار وتركب طاستها تسوي لهم عشاء , من هالتمن (التمن نوع من الأرز لا يوجد سوى بالعراق ) عشان إنهم جوعقب عقب العصر , وراع البيت عقب ماقلطهم بالشق وهو ياخذ هاك الدقية (وعاء يوضع به الحليب مصنوع من الخشب ) اللي يالله يالله ترفعها بيدك وينحر هاك الخلفة اللي مع اباعره اللي من جاها وهي تفهق وهو يملئ منها الدقيه ويجيبها للظيوف ( ماعنده قهوة ولامعاميل )؟!ويركدها عندهم وله تهلي وترحب :يالله حيهم يابعد حيي والله ياهلا ومسهلا , ويروح لوسط البيت ويفج خصم هاك العدل اللي بها من عينة هالتمر الطوقاني (تمر العراق ) اللي مامثله ويقلط التمر والحليب لهم وتعذرمنهم من القصور , وله تهلي وترحب ,قالوا له الظيوف: ياولد مامن قصور قال لا بالله عشاكم ومراحكم الليلة هنيا ماأنتم سارين بهالليل وحلف عليهم وراح لأشدة الركايب ويرميها عنها ويشد على عقلهن زين .
الظيوف قاعدين بالشق وملقين المحرم ظهورهم؟!! وهاذا هو المعزب بس رايح جاي وله تهلي وترحب "" يابعد حيي ياهلا ومسهلا براعين العليا ..يالله أنت حيهم "" عرفهم من منطوقهم ومن الوسم اللي على الركايب !!. ويتعشون هاك الليلة ويمرحون عنده ويوم انهم اصبحوا ياهذاك هو معزبهم قاعد(ن) ينهم على البل ويمتح لها بالدلو من القليب ويصلق بالحوض (يسقي ) وله قصيد مانا حلوه ووحيه دنداني , وبس إيلافت يم جهة بيت (ن) بقصرهم من مشرق , وإحداته على القليب :
{ لزاقي يشرب الدهان - - - لزاقي يشرب الدهان - - - ياهل البيت – لــــزاقي }
ويوم قضى من السقي وجى يم بيته وظيوفه الروله الأخوان اللي عرفوا انه ولد هويان وذابحه الهوى, ولد(ن) خفيف نفس وهاللسان الحلو وهو يحلف عليهم بعد انهم غير يقضون حق الظيفة عنده [ حق الظيف ثلاث ليال ] , وهاك الليلة (الليلة الثانية) عقب ماتعشوا من المقسوم ويتعلل مع ظيوفه قال لهم: أنتم ياهل العليا يالرولة يابعد حي ين رجال(ن) دايم(ن) محضضين دعوتكم تصيب !! تمنوا ان الله يجيب لنا قوم مغيرة وأني افزع مع الفزعة واصوب صواب(ن) سلومي (جرح خفيف براني ) قالوا وش هذا يامعزب الرحمان ؟؟! وشلون هداك الله نتمنى عليك الموت وانت لحية(ن) غانمه مكرمنا ومانت مخل(ن) علينا قاصر ابد ابد ؟؟! لابالله هذا مايصير ولا حنا قايلينه !! ياولد مايصير هالحكي ابد !! قال لهم الشمري : أنا سايق عليكم الله وجاه أربعين نبي أنكم تمنون لي هالمنوة يابعد حيي!! . قال حدى العيال الفرجه : ياولد أكيد ان فيه سبب هاللي خلاك تمنى هالمنوة القشرا على روحك ؟؟! قال: يابعد حي فيه وحدتن بهذا قريب راعيت هالبيت اللي شرقينا , أكيد اني ياصوبت اكيد انها تزورني !!وأشوفها ومالي حيلة(ن) على شوفتها!! عاشقها عشاقه وغلاها يمشي بدمي , وان انتشر بهالقاع فدوة(ن) لها يابعد حي ين فدوه !!هو بس تحصل شوفتها ؟؟! أويليههههههه ويقوم يفرك ايديه ابعض ...والفرجه يبحرون لبعضهم ويتبسمون , قالوا له عين خير ياولد واللي الله كتابه ألينه غير يصير أبد.
والصبح وهم يصبحونهم لهم قوم صباح , ويصر الصياح بالعرب ""القوم القوم اخذت البل "" وهو مثل ماتنمى البارحة عند ظيوفه وهو يفزع مع الفزعه ويوم نكسوا الحلال وردوه من القوم اللي بعضهم غدى منيع عندهم وبعضهم ذبح بالفلاة , ياهذا هو معزبهم الولد الشمري حصانه يقاد به , وثيابه كلها دم وهو مصوب(ن) بكتفه اليمنى بله رصاصة ,وهي تنطحهم أمه قبل لا ياصلون به البيت ياجرحه دمه يسيل ويغدي لها نعى ,وهو يحكي عليها ويطمنها ويحولونه الرجال اللي معه للشق ويجضعونه ويرسلون على الحكيم عشان يطلع الرصاصه من كتفه , ويومنه جا وقام وحهز موسه اللي غدى احمر من النار والولد الشمري وهو يضحك قاله حدى الرجال اللي من ربعه عنده :أنالله وانا له أقول ماهي حزة ضحك؟؟! وهو عينه يم جهة ظيوفه الرولة :ماعليك يابعد حي مامن خلاف علّي هذا صواب(ن) سلومي ,يقولها ويتبسم والحكيم هو يكويه عقب ماطلع الرصاصة ومن حر النار انصرع وهم ويقومون ظيوفه الفرجه ويمسكونه , قالهم الحكيم خلاص ماعليه خلاف بإذن الله ساعة زمان وياعي , وعرفوا الرولة أنه وحيد امه وماله قرايب(ن) بالحيل عند العرب هاذولا .
ويوم اخذوا لهم شوين ياهي هاذي جت هاك البنت اللي مانا حلو زولها ومنطوقها يوم قامت تهني ام الولد بسلامته , قالت لها أمه هاذا هو بالشق يابنتي مايدري عن اللي حوله ,تعالي يمه وهي تجي وتاقف عند راسه لها شوين وتهايق على صوابه يومنها محشت دموعها بطرف شيلتها وهي تقفي بسرعة من عنده . ويومنه وعي و يسولوفون له اللي صار من البنت وقالوا ياعاد هالبنيه تغليك كل هالغلا !! انت وشنت بطلبه ؟؟ ليه ماتاخذها وتحطها بيتك يعاد من حمدالله وشكره الله مره(ن) عليك ؟؟!بيت وحلال وماعليك قاصر ابد !! قال الشمري : عقب ماتنهت وكص من جرحه اللي نسيه بكبره !! وحط يده اليسرى على متنه المصوب واستقعد وتربع : أيه ياراع العليا هذا هو اللي قاصم(ن) ظهري وجرحي اللي مايبرئ ؟؟! هذا ياوجيه الخير مرتين اللي اطلبها من ابوها وسقت بها خياره من حلالي اللي شوفت عينكم بس انه مارضي بي وعارف(ن) اني ماني من العرب ولالي بني عم(ن) قريب واجد بهالديرة !! وحط له شرط سنع طردت(ن) يابعد حي !! عشان يعجزني به , قال : الحلال هذا كله مالي لزمة(ن) به سياق بنتي خمسين نيرة عصملي ذهب كان عندك تعال , والمرة الثانية بعد اسوق عليه له جاهه وقال مثل ماقال بالأوله , وهو يدري انهن ماهن عندي بس وش أقول يابعد حي ين ماغير حسبي الله عليه من ابو !! وكل هذا والعيال الفرجة سمعو وشافو , وهم بليلتهم يقطعون الراي بينهم يومنه نام معزبهم بفراشه أنهم يدفعون الذهبات الخمسين اللي معهم كلها سياق للبنت ويجوزونها للولد .
ويوم انهم اصبحوا وافلحوا وفكو الريق قال له حديهم : من هو من عربك اللي تثق به وتهقى ينشد به الظهر سمه لنا ؟؟! قال الشمري : وشو من جهنه يابعد حي ين ؟؟! قالوا خلاص ياوجه الخير حنا قطعنا على الراي البارح ماحنا شراية أباعر , اللي عندنا جاك سياق(ن) للبنت مار أرسل للي تهقى به الهقوة الغانمة خله يقضب الرجل لا يتراجع عن وعده لك ياعرف ان طلبه عندك !! قال الشمري عقب ما برك على ركبه وبغى ينهض : وشنتوا بطلبه يابعد حي ين وشهوه هااللي اسمع ؟؟! مايصير ياهل العليا وحياة ....قالوا لاتحلف ياولد اللي مايصير هو انه ينكس كيس هالذهب معنا لأهلنا !! وكل منهم يقرط الكيس اللي معه على الشمري , ويوريه الذهب اللي به (خمس وعشرين نيرة عصملي ) ويحطونها بكيس(ن) واحد عقب ماعدوها قدام معزبهم !! .
ويرسل للي سماه من عربه ويروح معهم لأبو البنت ويطلبونها منه , قال لهم مثل كل مرة هو عارف(ن) طلبي قال له الشمري اللي معهم سم طلبك يارجل هاذي جيزة ؟! قال خمسين نيرة ذهب عصملي نيرة تنطح نيرة , قاله ياولد طلبك عندنا مار أنهد على كفيلك وانا قبيلك ؟!!( طلب كفيل عليه – وصار هو خصمه) وهو يعطيه الرويلي الكيس اللي به النيرات ويعدها على ابو البنت نيرة نيرة لها صليل ياما كملن , وبالليل يملك له على البنت وياخذها الوليده معزبهم لبيته , ويصير عرس بسيط هاك الليلة .
والصبح وهم يمشون من عنده وقالوا له : اسمع ياوجه الخير أنت عرفتنا وحنا عرفناك ولا بيننا شين غير الخوة الزينة لا تضغط على روحك بالحيل من شان النيرات , معك معك متى ماسهل الله عليك ردهن .
وعقب فترة وهو يجمع الشمري له خمسين وضحى من خيار البل اللي الوحدة تسوى إلحالها نيرتين ذهب وبعضهن ثلاث , ويجيبها للفرجة يسوقها رحولها معها , ويومنه وصلهم وشافوا البل قالوا: ياولد ماهاذا الرأي اللي بيننا وبينك ؟؟! هالبل هاذي الوحدة تسوى لها نيرتين ولا بعد بعضهن أكثر !! وهذا أكثر من حقنا اللي لنا عندك !! هالسواة ماتصير ابد ابد !! قال الشمري : مثل ماقلتوا لي يومنا بالعراق أقولكم هنيا !! اللي مايصير أن ناقة وحدة تنكس معي يم أهلي , انتم يأهل العليا راعين الأوله يابعد حيي !! وراعي الأوله ما ينلحق ابد ابد ......))
كتبه / اخوصيته
حرر- في [13- رجب -1429]ِ
منقول من منتديات الرولة .
