مساجلة الشقيقين: ممدوح - زاهي
بسم الله الرحمن الرحيم
بعد غياب اود ان اهديكم هالمساجلة بيني وبين اخوي الاكبر ممدوح
قلت:
ياراكبن شاصن من احدث جداده
شاصن لتمتير المسافات هاوي
شاصن كما ضوح برقن ضج رعاده
واسرع من البرق للمشتاق والهاوي
هو منوة اللي خذا للقنص مزواده
وهو للغريب الحزين علاج ومداوي
ياطا عروق النفود وياسم اخداده
ماطا اربعه تحسبه اوسام ومكاوي
ياصل لأمن قليبي تملك قياده
وبغيرها من جميع الخلق مااساوي
هي نور قلبي وغاية غاية اسعاده
وهي روح روحي وشوفه اكبر مناوي
يوصل تحيات قلبن حار ببعاده
يسكب على الخد دمعه صبح ومساوي
لولا دراسة وراها علم وشهاده
مااترك دياري تقل مطرود وجلاوي
والحر يالغالية يشتاق لبلاده
وشلون والدار لاهل المرجله حاوي
وشلون وابوي فيها دامت اسعاده
ألفين نعمن ولاتكفي ولاتساوي
لو امدحه القلم مايكفي مداده
والشعر في عد فعله لامهو قاوي
وشلون ممدوح ساكنها ويرتاده
هو السند بالشدايد واطلق مخاوي
وشلون وكل الغوالي به وتعتاده
ومن ينتسي ديرته غاوي وابن غاوي
ممدوح:
ياراكب اللي يوم قرب هداده
مشي السما والارض عنده تساوي
لفت وكفت القدم بارتداده
وطارت وصارت عبر خطن سماوي
بوسط السما متمكنة بالرياده
وفيها وفيها من ردار وبلاوي
تاصل لحرن ابتعد عن بلاده
للعلم والتعليم حيلن هواوي
اخون عزيزن قال لي من فؤاده
اشتقت للي يحكرون القهاوي
للي خذوا الطيب سلمن وعادة
لمفارق النمصان ماني بقاوي
قلت انتظر وقال اسمى قياده
ياعز من جاهم دخيل وجلاوي
وقلت صادق مالكين السياده
بصدق الفعول ولانقوله هقاوي
ولو للكرم ياخوي درس وشهاده
تلقاه معهم يذكره كل راوي
وياخوي زين الصبر ماقوى عناده
لاشك علمي بك على الصعب قاوي
وترا الفتى لو طال وقت ابتعاده
يجيك هو للعلم والطيب حاوي
ولا الحطب ياخوي يرث سماده
والفرق واضح مايجي بالتساوي
