طلعت عليه أغلى من بيع السوق هالزيارة.
يش تقولون بهالعادة اللتي نحسبها إنقرضت وهي مازالت موجودة ولكنها بشكل محدود جداً ، ولكن بالرغم من محدوديتها فهي كثيرة بالنسبة لي يعني Too much مثل مايقولون ربع رام سام.
مايخفى عليكم بأن شايبكم يبالغ جداً في كلامه وإنه يركب حصانه الأشهب أحياناً ولكن أن ماحصل معه يوم الخميس الماضي حقيقة وليسة من سوالف فرس الليل الشهباء .
إنها حقيقة واقعة وقد كانت من العادات القديمة والعادية وأقل من عادية في زمن الآبا والأجداد وفعلاً كان الوالد موجود وإنبسط منها وشكر صاحب هذه العادة كثيراً وطلب منه أن يكررها مرة إسبوعياً على أقل تقدير ويمكن أن الوالد على حق ومحدثكم هو الذي قد تنكر لهذه العادة وإستهجنها وهي مستحسنة عند البعض.
السالفة ومافيها هي الزيارة المفاجئة من قبل البعض دون تنسيق أو موعد وخاصة إن كان هذا الزائر مجرد شخص عادي ومتطرف نوع ما يعني ليسى من الأصدقاء الذين تفرح لمقدمهم ولا من الأقارب الذين تأخذ راحتك والبيت بيتك.
بل مجرد شخص من طرف الجماعة وضايق صدره وجاي يبي يقضي عند يوم توسعة صدر ونقنقه.
لقد وقف على الباب الساعة الثامنة والنصف صباحاً وضغط الجرس هذا فقط بعد خمسة أيام من قيامي بواجبه الرسمي مع آخرين ولكنه عاد هذه المرة بمفرده وياليته جاب من يسامره ويقابله طيلة النهار ..
قلت شرف الساعة 8.5 من صباح يوم الخميس نعم عطلة الإسبوع هنا في بريطانيا بالتوقيت الشتوي هلا هلا يالله حيه ياهلا ومرحبا تفضل تفضل إقلط ياهلا والله ومرحبا شرفتنا ويش هالساعة المباركة إجلس بهذا لاوالله بهذا والله إلا على يسراك هنا يالله حيه.
الوالد منهو هذا يا ابو عارف هذا فلان يبه ولد فلان آه أرا ياحبيبي وينهو هالحين هذا هو قدامك بالمجلس أييييه أبي أروح له أسلم عليه الله الله سلام عليك يفلان أمبا أمبا أمبا حب ومطق تخبر الأطجم حبه تقل مطق علك لبان ، عطوناالقهوة والفطور إقدع تقهو .
تقهو خذ هذا خذ هذياء تقهو شاي خذ هالكويسه خذ هذي تقهو خذ هالفنيجيل خذ والله تأخذ تقهو خذ هذياء والله إن تقهوا بس هذا يلزمك تقهو يابعد حيي هذا نوع من تطفيش الكرم الزايد.
جت الساعة 11 صباحاً قمت وقلت للأهل إعملوا لنا غداء طيب تروا عندنا ضيف الله الله إستمرينا وشلون فلان ويش شغل علان وخذ هذا وخذ هذياء حتى أدن الظهر تبي نصلي بالمسجد أو هنا قال بكيفك قلت بالمسجد أفضل قال توكلنا على الله رحنا نصلي رجعنا كيف الحال ويشلونك عساك مرتاح بهالشرقية؟
قلطنا غدانا تفضل نبي نتغداء يخبر المقلط على طول غسل يديه ودخلنا مع الوالد تفضل على غدانا وسامحنا بالقصور والله إعتبرناك راعي محل مار وأنت راعي محل قال لإيوالله سم الله يحييك تغدوا كل والله إن تأكل ماورانا أحد أضاف الوالد والله إن اللي يبقى إلا ينثر ماتلقاء من يدللي به تغد يابعدحيي تغد ياشيخ.
المهم خلٌف الرجال ورجعنا للمجلس حول الساعة 1.5 م مثل هالوقت عادة شايبكم يأخذ له تعسيلة ، ولكن اليوم هيهات تسمر عند الضيف الكريم أما الوالد نام بجانب الصحن بالمقلط الله يحفظه.
تقهو من هالشاي قال لاوالله كثرت من هاللبن ولا إشدهيه بس إسترح على كيفك يقولون العرب إكرام النفس هواه ، ماتبي تنام لك شوين قال لله مابي نوم أبي أسولف معك لي شوين ومن ثم أروح يم خوياي ليه ماجبتهم معك ياشيخ والله مار مشيت وهم نوما لله الله يجيرك مايشبعون نوم يوم الخميس/
ابو عارف جلس مقابله بالمجلس على كنب والسوالف خلصن والظهر بداء يتيبس شوي وهناك تنمل في الأقدام حتى أذن العصر أشهد أن لاإله إلا الله تسمع الأذان قال نعم قلت عن إذنك أبي أقوم الوالد يصلي قال إذنك معك.
تر أبو عارف بين الظهر والعصر مامن هكالسوالف الزينة خرب الشويب بس مقابله وجه لوجه وإذا الضيف حط رجله اليسرى على اليمنى عمل مثله ابو عارف وإذا تعب من هالوضعية نسف اليمنى على اليسرى وشايبكم وراه معه خطوة بخطوه طير شلوى.
قام ابو ابو عارف فلان هو نهج وإلا بهذا قلت لاموجود يبه قم لصلاة العصر هه هو أذن أييييه أذن يبه أراولد أبوي عوذا ماقومتونن بدري شوين حنا تأخرنا لا يبه توه أذن يالله مشينا يافلان للصلاة توكلنا على الله ، صللينا ورجعنا للمجلس حتى قبل المغرب بنصف ساعه وقال الضيف إبي رخصتك يا ابو عارف أبي أمشي .
الوالد لا يابيي تعش معنا ياشيخ ابو عارف أطع الوالد تعش معنا وأمش لاوالله ماودي أمشي بهالليل وإلا سوالفكم والله ماتنمل بس إستأذن أكرمكم الله ومشى الحبيب.
ويوم دخلت على الأهل يمار كلهم زعلانين على اللي يبي يتمشى واللي يبي أغراض واللي يبي حاجه المهم كل مصالحنا ذلك اليوم الأغر توقفت بسبب هذا الضيف العزيز وكان ثقيلاً على الجميع ماعدى الوالد مرتاح ما شاء الله عليه.
وناقد علي يوم قلت ما بغى يروح قال والله يوليدي إننا نجلس على دلالنا من الصبح حتى تغيب الشمس هذا يقوم وهذا يقعد طول اليوم أنت سير عليك إبن عمك هذا اليوم وتقول مابغى يروح؟
-------------------------------------------------------------
هل مثل هذه الزيارات بهذا الشكل إذا أنتم عاد قراءتم السالفه ، هل هي تتناسب مع وضعنا بالوقت الحالي أم لاء ؟.
