الــــــــغـــــرووووووووووووووووب
.
[poem=font="Simplified Arabic,4,white,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
نظرتي للشمس حزّات الغروب=عادةٍ تِيّمتْ فيها من صباي
هي هوايه عن هوى الخل اللّعوب=وهي طراتي بالغرابيل ودواي
لا شتكى قلبي تباريح الذنوب=واصطفق همّي على ساحل حشاي
سانحتني للخلا كل الدروب=وقمت دون اشعور تمشي بي اخطاي
وسقت جيبي كنّي ناوي للهروب=مسرعٍ لا طيح في عين اخوياي
ولا عقبت الكمب رايح للجنوب=يم ضلع البويت ميّل بي هواي
اعتلي به لا وصلته دُوب .. دُوب=واتّجه للشمس واضبط متّكاي
مامعي من واقعي ياكود ثوب=اقفل الجوال والدنيا وراي
ولا جلست الوقت ماهوب امحسوب =مبتداي عصير واجهل منتهاي
ينقطع صمتي على دق القلوب=و ينشغل بالي وكنّه مو معاي
النظر مذهول واصوات الهَبوب=كنّهن في مسمعي نغْمات ناي
لولا قرص الشمس يسري للغيوب=صرت " لوحة حزن " في معرض مساي
اسبح بفكري ورا همي واثوب=واتذكّر ما مضى لي من شقاي
واتمنّى والمنى سهل الركوب=واتعشم به وهذا من رداي
يذبل الهاجس مع الأفق ويذوب=لاسرى مع خاطري لاقصى مداي
وان لبس جوّي سرابيل الشحوب=واكتست بالاسوَد الحالك سماي
فقت كنّي كنت عن عقلي امحجوب=وقمت اعيد الذّهن لاول مبتداي
وقلت يافرّاج صكّات الكروب=يا ملاذي ساعة الهمّ ورجاي
سقني للتوبه ترى ودّي أتوب=واغفر الزلاّت وادمح عن خطاي
واستر عيوبي ترى كل عيوب=ولا تشمّت بي ولو لحظه اعداي
وعقبه ارجع للبلد تقل امغصوب=وابتدي رحله جديده من عناي
هذي اسواتي على وقت الغروب=ماهي طَفّه عادةٍٍٍٍٍٍٍٍٍٍ لي من صباي
.[/poem]
.
