ياعل ما اسهم

هذه القصيدة بعد الإنهيار الأخيرللأسهم

الله لا يجـزاك ياسـوق بالخـيـر
أنا اشهد انـه راح مالـي خسـارة
عوّدت اجر الصوت عقب المخاسير
واقول انـا مالـي ومـال التجـارة
اصبحت عقب المال مديـون للغيـر
وعقب الجيوب اصبحت راكب غمارة
والراس شيّب واشتغـل بالتفاكيـر
والفقر في بيت الغنـا شـب نـاره
والراتب أقسـاط وايجـار وفواتيـر
لاعندي ارض ولا بملكـي عمـارة
رحنا ضحايا فـي يديـن الهواميـر
الحـظ تـارة والهواميـر تــارة
في سوقنا الغاشـم أكلنـا خوابيـر
سوقٍ مع الهزة تناثـر غبـاره
الشعب صاروا في صفوفه طوابيـر
لكنـه أعلـن للجميـع إنهـيـاره
هـذي زراعيـة وهذيـك تعمـيـر
طاحت مثل ما طاح بـرج التجـارة
قلنا يبي له وقـت ويصيـر تغييـر
يرتـد وضعـه ويتعـدل مـسـاره
لكن تعلقنا ... ويالله عسـى خيـر
مادام راسك حـي مابـه خسـارة

منقوله ولا اعرف شاعرها لكن اعجبتني لانها تتكلم عن واقع الاسهم المر